ទីក្រុងប៉ារីស៖ យន្តហោះចម្បាំងរបស់បារាំងម៉ាករ៉ាហ្វាល់បានបាញ់ទម្លាក់ដ្រូនមួយគ្រឿងដែលបើកចូលដែនអាកាសរបស់រដ្ឋជាសមាជិកអង្គការណាតូ។ នោះគឺប្រទេសឡាតវី។ ដ្រូននោះហោះចេញពីប្រទេសរុស្ស៊ី។ នេះជាឧបទ្ទវហេតុពាក់ព័ន្ធនឹងសន្តិសុខថ្មីបំផុតតាមបណ្ដោយព្រំដែនអឺរ៉ុបខាងកើត។ យោធាឡាតវីមិនបានបញ្ជាក់ថាតើប្រទេសណាជាអ្នកបញ្ជូនដ្រូននោះទេ។ ឡាតវីថាដ្រូននោះហោះពីរុស្ស៊ីចូលដែនអាកាសរបស់ខ្លួន និងជាលទ្ធផលនៃសង្គ្រាមអេឡិចត្រូម៉ាញ៉េទិចរបស់រុស្ស៊ី។
ឡាតវីបានបង្ហោះសារនៅលើបណ្ដាញអ៊ិចថាយន្តហោះរបស់សម្ព័ន្ធមិត្តបានបាញ់ទម្លាក់ដ្រូនដោយជោគជ័យ។ អាជ្ញាធរបានប្រកាសអាសន្ននៅតំបន់ឡាតវីខាងលិចដើម្បីឱ្យប្រជាជនស្នាក់នៅក្នុងផ្ទះ។ បន្ទាប់ពីដ្រូននោះត្រូវបានបាញ់ទម្លាក់ អាជ្ញាធរក៏ដកបម្រាមនោះមកវិញ។ ករណីដ្រូនហោះវង្វេងផ្លូវចូលដែនអាកាសប្រទេសជិតខាងរុស្ស៊ីបានក្លាយជាការបារម្ភថាសង្គ្រាមអ៊ុយក្រែនអាចនឹងរីករាលដាលទៅដល់ប្រទេសជាសមាជិកអង្គការណាតូ។
ប៉ុន្មានខែចុងក្រោយនេះ អ៊ុយក្រែនសម្រុកវាយប្រហាររុស្ស៊ីដោយប្រើប្រាស់ដ្រូនរយៈចម្ងាយឆ្ងាយ។ ក្នុងនោះមានការវាយប្រហារសមុទ្របាល់ទិច។ ពេលខ្លះដ្រូនរបស់អ៊ុយក្រែនហោះវង្វេងផ្លូវ និងជ្រុលចូលដែនអាកាសប្រទេសហ្វាំងឡង់ ឡាតវី លីទុយអានី និងអេស្តូនី។ អ៊ុយក្រែនថាបញ្ហានេះបណ្ដាលមកពីរុស្ស៊ីប្រើសង្គ្រាមអេឡិចត្រូម៉ាញ៉េទិចឆក់ដ្រូនរបស់អ៊ុយក្រែនឱ្យវង្វេងវង្វាន់ទើបបានជាហោះហើរតែពាសចូលដែនអាកាសប្រទេសដទៃយ៉ាងដូច្នេះ។
យន្តហោះចម្បាំងរបស់បារាំងដែលបាញ់ទម្លាក់ដ្រូនហោះពីរុស្ស៊ីចូលឡាតវីនោះស្ថិតនៅមូលដ្ឋានទ័ពអាកាសមួយកន្លែងនៃប្រទេសលីទុយអានី និងជាផ្នែកមួយនៃបេសកកម្មឃ្លាំមើលដែនអាកាសរបស់អង្គការណាតូនៅតំបន់បាល់ទិច។ យន្តហោះនេះមានភារកិច្ចបើកល្បាតនៅលើដែនអាកាសប្រទេសឡាតវី លីទុយអានី និងអេស្តូនីចាប់តាំងពីពួកគេចូលរួមជាមួយអង្គការណាតូកាលពីឆ្នាំ២០២៤៕ ប្រភព Reuters
ចែករំលែកព័តមាននេះ