សង្ស័យលេង ៤សន្លឹកហើយ បានជាឈ្នះមិនឈប់
- ក្រចេះ
ខេត្តក្រចេះ ៖ ដំណើរការដេញថ្លៃគម្រោងសាងសង់ហេដ្ឋារចនាសម្ព័ន្ធនៅក្នុងឃុំដំរីផុង ស្រុកឆ្លូង កំពុងរងការរិះគន់យ៉ាងចាស់ដៃពីមជ្ឈដ្ឋានមហាជន និងអ្នកទទួល ការលទ្ធកម្ម ជុំវិញភាពមិនប្រក្រតីនៃការកែប្រែទិន្នន័យតម្លៃទឹកប្រាក់ «ពីអ្នកឈ្នះទៅជាអ្នកចាញ់ ពីអ្នកចាញ់ទៅជាអ្នកឈ្នះ» យ៉ាងក្រឡាប់ចាក់ ដែលគេសង្ស័យថា លេង ៤សន្លឹកហើយមើលទៅ ដែលមើលទៅហាក់បីដូចជាការរៀបចំទុកមុនដើម្បីបម្រើប្រយោជន៍បក្សពួក ។
យោងតាមប្រភពព័ត៌មាន បានឱ្យដឹងថា កាលពីថ្ងៃ ទី ០៥ ខែមិថុនា ឆ្នាំ ២០២៦ វេលាម៉ោង ៩:០០ នាទីព្រឹក នៅរដ្ឋបាលឃុំដំរីផុង មានការរៀបចំកិច្ចប្រជុំបើកស្រោមសំបុត្រដេញថ្លៃជាសាធារណៈមួយ លើគម្រោងសាងសង់ផ្លូវបេតុងអាមេប្រវែង ០.៩៥ គីឡូម៉ែត្រ ទទឹង ៦ ម៉ែត្រ កម្រាស់ ១៥០ មីលីម៉ែត្រ រួមទាំងការថែទាំ ចំនួន ០៦ ខែ ដែលមានតម្លៃប៉ាន់ស្មានទឹកប្រាក់ចំនួន ៥៧៦,៩៨៣,៦២៩ រៀល ។ កិច្ចប្រជុំនេះ មានការចូលរួមដឹងឮពីប្រធានគណៈ កម្មការក្រុមប្រឹក្សាឃុំ ស្មៀនឃុំ អ្នកជំនួយការឃុំ (ម្ចាស់គម្រោង) ប្រធានគណៈកម្មាធិការលទ្ធកម្ម រួមទាំងមន្ត្រីគាំទ្រឃុំមកពីថ្នាក់ស្រុក និងមន្ត្រីជំនាញបច្ចេកទេសមកពីទីចាត់ការផែនការនិងវិនិយោគខេត្តផងដែរ ។
ភាពមិនប្រក្រតីបានស្តែងឡើង បន្ទាប់ពីក្រុមហ៊ុន ចំនួន ៣ បានដាក់សំណើប្រកួតប្រជែង ៖ លទ្ធផលដំបូងមុនចូលបន្ទប់សម្ងាត់ ក្រោយការបើកស្រោមសំបុត្រ និងពិនិត្យវាយតម្លៃ ព្រមទាំងកត់ត្រាក្នុងតារាងទម្រង់ទី ៤៤ រួចរាល់ គឺក្រុមហ៊ុន ម៉ៅ សារ៉េត ជាអ្នក ដេញថ្លៃបានតម្លៃទាបជាងគេបំផុត គឺចំនួន ២៧៣, ០៦០,០០០ រៀល ។
នៅចំពោះមុខគណៈកម្មការ ក្រុមហ៊ុនទាំងអស់ក៏បានបញ្ជាក់ទទួលស្គាល់ថា តម្លៃដែលបានកត់ត្រានេះពិតជាត្រឹមត្រូវហើយ ។លទ្ធផលក្រោយចេញពីបន្ទប់សម្ងាត់ អ្វីដែលធ្វើឱ្យគេហួសចិត្តនោះគឺ បន្ទាប់ពីប្រធានគណៈកម្មាធិការលទ្ធកម្ម យកឯកសារទៅធ្វើការ «កែតម្រូវនៅក្នុងបន្ទប់សម្ងាត់» រួចមកស្រាប់តែលទ្ធផលត្រូវបានប្រកាសផ្លាស់ប្តូរទាំងស្រុង ដោយក្រុមហ៊ុន «ចាំង ម៉ានីម៉ិច» របស់លោក សេង គឹមចាំង (មេឃុំឆ្លូង) ដែលដាក់តម្លៃខ្ពស់ជាង រហូតដល់ ៣៩៨, ០៥០,០០០ រៀល ត្រូវបានប្រកាសឱ្យឈ្នះជាផ្លូវការក្នុងឋានៈជាអ្នកដាក់តម្លៃទាបទី ១ ទៅវិញ ។
ដោយឡែក ក្រុមហ៊ុន «ម៉ៅ សារ៉េត» ដែលជាអ្នកឈ្នះពិតប្រាកដកាលពីដំបូង បែរជាត្រូវគេកែទិន្នន័យតំឡើងតម្លៃពី ២៧៣,០៦០,០០០ រៀល ទៅជា ៥១៣,០០០,០០០ រៀល ដែលបង្ខំឱ្យក្រុមហ៊ុននេះធ្លាក់ទៅជាអ្នកចាញ់ (ជាប់ចំណាត់ថ្នាក់តម្លៃទាបទី៣) យ៉ាងអយុត្តិធម៌ ។ សកម្មភាពកែប្រែទិន្នន័យត្រឡប់ត្រឡិននៅក្នុងតារាងទម្រង់ទី ៤៤ តាមអំពើចិត្តបែបនេះ បានធ្វើឱ្យផ្ទុះការរិះគន់យ៉ាងខ្លាំងពីសំណាក់មហាជន និងក្រុមអ្នក ទទួលការលទ្ធកម្មឃុំ-សង្កាត់ឯទៀត ។
គេបានលើកឡើងថា នេះជារូបភាពដដែលៗដែលបានកើតឡើងទាំងឆ្នាំ ២០២៥ និងឆ្នាំ ២០២៦ ពោលគឺរៀងរាល់ឆ្នាំឱ្យតែមានការប្រកាសដេញថ្លៃគម្រោងក្នុងឃុំដំរីផុង គឺក្រុមហ៊ុន «ចាំង ម៉ានីម៉ិច» របស់លោកមេឃុំឆ្លូង តែងតែទទួលបានជោគជ័យជានិច្ច ដែលគេសង្ស័យប្រើប្រាស់ឥទ្ធិពលមកកែប្រែស្ថានភាពដេញថ្លៃក្នុងបន្ទប់សម្ងាត់ បំផ្លាញគោលការណ៍ប្រកួតប្រជែងដោយស្មោះត្រង់ មិនត្រឹមតែបង្កើតជាភាពច្របូកច្របល់ប៉ុណ្ណោះទេ ប៉ុន្តែវាក៏បានបង្ហាញពីសញ្ញានៃការឃុបឃិតគ្នាជាប្រព័ន្ធ ដើម្បីបម្រើផលប្រយោជន៍បុគ្គល និងបក្សពួកនិយម ដែលផ្ទុយស្រឡះពីគោលនយោបាយអភិវឌ្ឍន៍តម្លា ភាពរបស់រាជរដ្ឋាភិបាល ។ មហាជនក៏ដូចជាអ្នកដេញថ្លៃដទៃទៀត សំណូមពរយ៉ាងទទូចដល់ថ្នាក់ដឹកនាំខេត្តក្រចេះ ជាពិសេសអង្គ ភាពប្រឆាំងអំពើពុករលួយ (ACU) មេត្តាជួយបើកការ៊ស៊ើបអង្កេត និងពិនិត្យឡើងវិញលើទម្រង់កត់ត្រាលទ្ធ ផលទី ៤៤ នៃឃុំដំរីផុង ដើម្បីផ្តល់យុត្តិធម៌ និងតម្លា ភាពក្នុងប្រព័ន្ធលទ្ធកម្មសាធារណៈឡើងវិញ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ