រឹតបន្តឹងច្បាប់ជលផល! ក្រុមការងារចម្រុះខេត្តកំពង់ចាមបើកប្រតិបត្តិការវាយឆ្ម.ក់បង្ក្រាបបទល្មើសនេសាទខុសច្បាប់ ៥កន្លែងផ្សេងគ្នា
- កំពង់ចាម
ខេត្តកំពង់ចាម ៖ នាយខណ្ឌរដ្ឋបាលជលផលកំពង់ចាម ដឹកនាំក្រុមការងារ សហការជាមួយអាជ្ញាធរ ចុះបង្ក្រាបបទល្មើសជលផល ០៥ករណី នៅក្នុងភូមិសាស្ត្រស្រុកព្រៃឈរ និងស្រុកកងមាស ខេត្តកំពង់ចាម ។ នេះបើយោងតាមផេក រដ្ឋបាលខេត្តកំពង់ចាម បានប្រកាសនាថ្ងៃទី៦ ខែមិថុនានេះ ។
រដ្ឋបាលខេត្តកំពង់ចាម បានបន្តថា លោក លី ស្រ៊ី នាយខណ្ឌរដ្ឋបាលជលផលកំពង់ចាម បានដឹកនាំក្រុមការងារជលផលនា ថ្ងៃទី៥ ខែមិថុនា ឆ្នាំ២០២៦ សហការជាមួយអាជ្ញាធរស្រុកព្រៃឈរ អាជ្ញាធរស្រុកកងមាស និងសហគមន៍នេសាទសាមគ្គីឃុំមៀន ចុះប្រតិបត្តិការបង្ក្រាបបទល្មើសជលផល ចំនួន ០៥ករណី នៅក្នុងភូមិសាស្ត្រស្រុកព្រៃឈរ និងស្រុកកងមាស ខេត្តកំពង់ចាម ។
បើតាម លោក លី ស្រ៊ី នាយខណ្ឌរដ្ឋបាលជលផលកំពង់ចាម បានឲ្យដឹងថា ការចុះប្រតិបត្តិការបង្ក្រាបបទល្មើសជលផល ទាំង០៥ករណីនេះ គឺមានការសម្របសម្រួលពីឯកឧត្តម ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម ហើយបានអនុវត្តនៅកន្លែងផ្សេងៗគ្នា ដែលក្នុងនោះ ៖ ០៣ករណី នៅចំណុចបាំងដៃ(បឹងធំ) ឃុំមៀន ស្រុកព្រៃឈរ ។ និង០២ករណីទៀត នៅចំណុចច្រកបឹងព្រលឹត និងនៅចំណុចមុខទួលសំពៅ(បឹងធំ) ឃុំរការគយ ស្រុកកងមាស ខេត្តកំពង់ចាម ។
លោកនាយខណ្ឌ បានបន្តថា នៅក្នុងបេសកម្ម ខាងលើ ក្រុមការងារបានរុះរើ និងបំផ្លាញចោលនូវឧបករណ៍ខុសច្បាប់នៅនឹងកន្លែង ដែលក្នុងនោះមាន ៖ ឧបករណ៍លូស្បៃមុង ចំនួន ០៩មាត់ របាំងស្បៃមុងប្រវែង ៥០០ម៉ែត្រ បង្គោលចំនួន ២៦០ដើម រុះរើសម្រាស់ ៥ម៉ែត្រ×៨ម៉ែត្រ ចំនួន ០៣កន្លែង ឧបករណ៍រ៉ាវចំនួន ០២មាត់ របាំងរ៉ាវប្រវែង ៦០ម៉ែត្រ និងបានចាក់លែងកូនត្រីចម្រុះទម្ងន់ប្រមាណ ០៦គីឡូក្រាម ចូលបឹងធម្មជាតិវិញផងដែរ ៕
ចែករំលែកព័តមាននេះ