ព្រឹត្តិការណ៍ «ចាក់បា.ញ់ឆែវសាមគ្គី» លើកទី២ នៅស្រុកកោះសូទិន ទាក់ទាញពលរដ្ឋចូលរួមរាប់ពាន់នាក់យ៉ាងកុះករ
- កំពង់ចាម
ខេត្តកំពង់ចាម: «ផ្ដើមចេញពីការចាក់បាញ់ឆែវជាលក្ខណៈគ្រួសារក្នុងរង្វង់ ២០ទៅ៣០នាក់ហើយបានពង្រីកខ្លួនមករាប់ពាន់នាក់បង្កើតជាសហគមន៍មួយដើម្បីឲ្យប្រជាពលរដ្ឋចូលរួមសប្បាយរីករាយ» ។ នេះជាប្រសាសន៍លើកឡើងពីសំណាក់ឯកឧត្តមអ៊ុន ចាន់ដា អភិបាលខេត្ត ក្នុងឱកាសជួបសំណេះសំណាលជាមួយបងប្អូនប្រជាពលរដ្ឋនៅភូមិថ្មី ឃុំកោះសូទិនស្រុកកោះសូទិន នាព្រឹកថ្ងៃទី៧មិថុនាឆ្នាំ ២០២៦។ ជាមួយនោះមានការអញ្ជើញចូលរួមពីសំណាក់ឯកឧត្តមខ្លូត ផនប្រធានក្រុមប្រឹក្សាខេត្ត អភិបាលរងខេត្តអាជ្ញាធរមូលដ្ឋានព្រមទាំងឯកឧត្តម
ចាន់ ណារ៉ុង រដ្ឋលេខាធិការក្រសួងអភិវឌ្ឍន៍ជនបទនិងលោកជំទាវ។
ឯកឧត្តមអ៊ុន ចាន់ដា អភិបាលខេត្តមានប្រសាសន៍ឲ្យដឹងថា: ក្នុងនាមរូបលោកពិតជាមានភាពសប្បាយរីករាយដែលបានចូលរួមក្នុងកម្មវិធីចាក់”បាញ់ឆែវសាមគ្គី” ជាលើកទី២ដែលកាលពីគ្រាលើកទីមួយគឺបានចូលរួមក្នុងសកម្មភាពប្រមូលផ្ដុំសាមគ្គីធ្វើត្រីឆ្អើរ៣០០០ចង្កាក់ ដើម្បីផ្ញើជូនដល់បងប្អូនវិរយុទ្ធជនជួរមុខនូវព្រំដែនកម្ពុជា-ថៃ។
ឯកឧត្តមអភិបាលខេត្តមមានប្រសាសន៍បន្តថា ជាការពិតណាស់កម្មវិធីចាក់បាញ់ឆែវនេះមិនត្រឹមតែមានបងប្អូនប្រជាពលរដ្ឋនៅភូមិថ្មីចូលរួមនោះទេគឺមានការចូលរួមយ៉ាងផលផុសក្នុងនោះមានអ្នកនៅរាជធានីភ្នំពេញ ព្រមទាំងអញ្ជើញមកពីតាមបណ្ដាខេត្តមួយចំនួនទៀតដោយពួកគាត់មកជាលក្ខណៈគ្រួសារដើម្បីទទួលទានបាញ់ឆាវ ដោយបានរៀបចំធ្វើឡើងក្រោមម្លប់ដើមគរជាប់មាត់ទន្លេតែម្ដង។ លោកថាបងប្អូនដែលបានមកចូលរួមក្នុងនោះមានអ្នកខ្លះបានទទួលទានបាញ់ឆាវរួចរាល់ហ្នឹងខ្លះទៀតបានបញ្ចេញកម្លាំងជួយកិនម្សៅនេះបង្ហាញពីសាមគ្គីភាពរបស់ប្រជាពលរដ្ឋ។អភិបាលខេត្តបានរំលឹកថាសកម្មភាពចាក់បាញ់ឆែវដំបូងមានគ្នាពី២០ទៅ៣០នាក់ប៉ុណ្ណោះ តែមកដល់ពេលនេះគឺបានចូលដល់ខ្ទង់ពាន់នាក់តែម្ដង។
សូមរំលឹកដល់អតីតកាលជំនាន់ប៉ុល ពត ពេលប្រជាជនប្រមូលផលបានត្រូវយកទៅទុកនៅសហករហើយមិនមានណាម្នាក់មានសិទ្ធិទទួលទានរបស់ទាំងនោះទេ បើសិនមានការតវ៉ាគឺអង្គការគេយកយើងទៅសម្លាប់ចោល។ ដោយទទួលបានការណែនាំពីសម្ដេចមហាបវរធិបតី រដ្ឋបាលខេត្តបានរៀបចំព្រឹត្តិការណ៍សង្ក្រាន្តលៀសហាលដោយឆ្នាំ២០២៥គឺមានទម្ងន់តែ៣តោន តែមកដល់ឆ្នាំ២០២៦ បានឡើងដល់ទម្ងន់៥តោនឯណោះ ។
ទាំងនេះកើតចេញពីសាមគ្គីភាពរបស់ប្រជាជនដោយម្នាក់ៗ បានលះបង់កម្លាំងកាយចិត្តដើម្បីចូលរួមព្រឹត្តិការណ៍លៀសហាលចម្ងាយ១២០០ម៉ែត្រនៅក្រុងកំពង់ចាមកន្លងទៅ ដែលបានទាក់ទាញមនុស្សមកលេងប្រមាណជាង ៤លាននាក់។ សូមឱ្យសហគមន៍របស់តាសុខ នៅភូមិថ្មី ឃុំកោះសូទិន ចេះតែមានការរីកចម្រើនទៅមុខហើយប្រជាពលរដ្ឋមានជំនឿទុកចិត្ត ហើយសកម្មភាពចាក់បាញ់ឆែវសាមគ្គីនេះនឹងធ្វើឡើងនៅឆ្នាំក្រោយៗបន្តទៀតដើម្បីបង្កើតភាពសប្បាយរីករាយជូនដល់ប្រជាពលរដ្ឋក្រោមម្លប់សន្តិភាព ។
ប្រជាពលរដ្ឋម្នាក់ឈ្មោះសារាយ ណាហ្វុងភេទស្រីអាយុ៣០ឆ្នាំ ជាអ្នកភូមិមេមត់ផ្សារ ឃុំមេមត់ ស្រុកមេមត់ ខេត្តត្បូងឃ្មុំជាប់ព្រំដែនជាមួយប្រទេសវៀតណាមបានមកចូលរួមក្នុងព្រឹត្តិការណ៍ចាក់បាញ់ឆែវសាមគ្គីនៅភូមិថ្មី គឺឃើញមានប្រជាពលរដ្ឋចូលរួមច្រើនកុះករជាមួយនោះថែមទាំងបានទទួលទានបាញ់ឆែវ ជាលក្ខណៈគ្រួសារគឺមានរសជាតិឆ្ងាញ់ដោយទឹកត្រីបានផ្សំឡើងពីក្រូចឆ្មារសុទ្ធសាធ ហើយសំណូមពរឲ្យមានសកម្មភាពបែបនេះបន្តទៀតណាមួយគាត់មានស្រុកកំណើតនៅទីនេះផងដែរ ៕
ចែករំលែកព័តមាននេះ