ដេញថ្លៃធ្វើផ្លូវចុះច្រើនពេក សង្ស័យអត់គុណភាព
- កំពង់ចាម
ខេត្តកំពង់ចាម: គម្រោងស្ថាបនាផ្លូវបេតុងនិងក្រាលគ្រួសក្រហមតម្លៃប្រមាណជិត៣០០លានរៀល ត្រូវបានរៀបចំដាក់ឲ្យដេញថ្លៃជាសាធារណៈធ្វើឡើងនៅសាលាឃុំល្វាលើ ស្រុកចំការលើនាព្រឹកថ្ងៃទី៣មិថុនា ឆ្នាំ២០២៦។ចំពោះការដេញថ្លៃត្រូវបានរឹតបន្តឹងពង្រឹងសន្តិសុខនិងសណ្ដាប់ធ្នាប់ តែលទ្ធផលការដេញថ្លៃមានការធ្លាក់ចុះច្រើនគួរឱ្យព្រួយបារម្ភពីគុណភាពផ្លូវ។
ចំណែកក្រុមហ៊ុនដេញថ្លៃបានអះអាងថាក្រុមហ៊ុនខិតខំស្ថាបនាផ្លូវបេតុងឲ្យត្រូវតាមស្តង់ដា។
លោកញឹម សុភាព ប្រធានលទ្ធកម្មឃុំល្វាលើ មានប្រសាសន៍លើកឡើងថា ចំពោះគម្រោងដេញថ្លៃផ្លូវទាំងពីរប្រភេទក្នុងនោះរួមមាន ៖
១-ប្រភេទផ្លូវក្រាលគ្រួសក្រហមប្រវែង១៨៧០ម៉ែត្រតម្លៃដាក់ឲ្យដេញថ្លៃជាង៩៤លានរៀល ក្នុងនោះមានក្រុមហ៊ុនចំនួន៥ បានចូលរួមប្រកួតប្រជែងដោយដេញបានលើក្រុមហ៊ុនយ៉េន ប៊ុនថេងត ម្លៃជាង៧៣លានរៀល។
២-ផ្លូវបេតុងប្រវែង៣២៥ ម៉ែត្រតម្លៃដាក់ដេញថ្លៃជាង១៨០លានរៀលមាន ៧ក្រុមហ៊ុនចូលរួមប្រកួតប្រជែងដោយដេញបានលើក្រុមហ៊ុនយ៉េន ប៊ុនថេង ជាអ្នកនៅស្រុកចំការលើ ដោយដេញបានក្នុងតម្លៃជាង៧៩លានរៀល។
ប្រធានលទ្ធកម្មឃុំល្វាលើមានប្រសាសន៍បន្តថាចំពោះគម្រោងផ្លូវទាំងពីរខ្សែនេះគឺមានការស្នើសុំពីសំណាក់បងប្អូនប្រជាពលរដ្ឋនៅក្នុងមូលដ្ឋាន។ហើយរូបលោកចង់ឃើញការដេញថ្លៃមានការប្រកួតប្រជែងដោយតម្លាភាព ក្រុមហ៊ុនដែលបានចូលរួមដេញថ្លៃត្រូវតែប្រកាន់ភ្ជាប់នៅក្រោមសីលធម៌ឲ្យបានល្អជៀសវាងកុំឲ្យមានការប្រទាញប្រទង់ពេលដាក់សំណើ។ គម្រោងផ្លូវដីគឺត្រូវដាក់ស្លាកសញ្ញាចរាចរណ៍មានចំនួន១៤កន្លែងដោយឆ្លងកាត់ចំនួន៥ភូមិ ចំណែកផ្លូវបេតុងមួយខ្សែទៀតក៏ត្រូវដាក់ស្លាកសញ្ញាចរាចរណ៍ចំនួន៤ នៅត្រង់ទីតាំងផ្លូវកែង។
សូមបញ្ជាក់ថា ការដេញថ្លៃនៅឃុំល្វាលើ កន្លងមកគឺមិនដែលមានបញ្ហាណាមួយកើតឡើងនោះទេ ហើយក្នុងនាមប្រធានលទ្ធកម្មឃុំគឺចង់ឃើញសមិទ្ធផលក្រុមហ៊ុនដែលដេញបានស្ថាបនាទៅតាមស្តង់ដារបច្ចេកទេស។
ក្រុមហ៊ុនយ៉េន ប៊ុនថេង ដែលដេញថ្លៃគម្រោងផ្លូវបានទាំងពីរខ្សែប្រាប់តាមទូរសព្ទឱ្យដឹងដែរថា សម្រាប់គម្រោងផ្លូវបេតុងដែលបានដាក់ឲ្យដេញថ្លៃជាង ១៨០លានរៀល គឺក្រុមហ៊ុនរបស់លោកបានដេញចុះទាបជាងគេក្នុងតម្លៃជាង ៧៩លានរៀល ។
ទោះបីជាដេញបានក្នុងតម្លៃបែបនេះក៏ដោយគឺរូបលោកមិនលក់ឈ្មោះនោះទេ ដោយបានអះអាងថាក្រុមហ៊ុនមានគ្រឿងចក្រគ្រប់គ្រាន់មានរណ្ដៅដីសម្រាប់កាយស្ថាបនាផ្លូវ ។ ហើយតម្លៃដែលដេញបាននេះគឺសម្រាប់ឲ្យកម្មកររបស់ក្រុមហ៊ុនមានការងារធ្វើអាចទទួលបានលុយបង់ធនាគារឯកជនជាដើម មួយវិញទៀតក្រុមហ៊ុនរបស់លោកនិងខិតខំស្ថាបនាធ្វើយ៉ាងណាឱ្យត្រូវតាមស្តង់ដាបច្ចេកទេស ទោះបីតម្លៃដេញចុះច្រើនបែបនេះក៏ដោយ ។ មានពេលខ្លះក្រុមហ៊ុនដេញបានទទួលបានប្រាក់ចំណេញតិចឬចូលដើមក៏មានដែរ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ