មហាជនរាយការណ៍ថា បុរស២នាក់មានកាំភ្លើ.ងខ្លីឈរលើដំបូលផ្ទះ នគរបាលក៏ឡើងទៅឃាត់ខ្លួន និងដកហូតបានកាំភ្លើ.ងខ្លីជ័រ១ដើម
- ភ្នំពេញ
រាជធានីភ្នំពេញ៖ មហាជនបានរាយការណ៍ជូនកម្លាំងនគរបាលថាបានឃើញបុរស២នាក់មិនស្គាល់សមាសភាព ប្រដាប់ដោយកាំភ្លើងខ្លីឈរនៅលើដំបូលផ្ទះមួយកន្លែង ធ្វើឲ្យពួកគាត់មានការភ័យខ្លាច ។ គ្រាន់តែបានទទួលដំណឹងនេះភ្លាម កម្លាំងប៉ុស្តិ៍នគរបាលរដ្ឋបាលចោមចៅទី១ ក៏បានឡើងទៅធ្វើការឃាត់ខ្លួនបុរស២នាក់នោះឲ្យដេកផ្កាប់មុខ រួចវាយខ្នោះដៃទៅក្រោយភ្លាមៗ ហើយដកហូតបានតែកាំភ្លើងខ្លីជ័រ១ដើមប៉ុណ្ណោះ ។
ការឃាត់ខ្លួននោះបានធ្វើឡើងកាលពីវេលាម៉ោង៤រសៀលថ្ងៃទី០៣ ខែ មិថុនា ឆ្នាំ២០២៦ នៅលើដំបូលផ្ទះមួយកន្លែង ដែលមានទីតាំងស្ថិតនៅក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានី ភ្នំពេញ ។
ជនសង្ស័យទាំង២នាក់នោះមិនទាន់ត្រូវបាននគរបាលប្រាប់ឲ្យដឹងអំពីអត្តសញ្ញាណនិងសមាសភាពនៅឡើយទេ ដោយក្រោយពេលឃាត់ខ្លួនត្រូវបាននគរបាលនាំទៅកាន់ប៉ុស្តិ៍នគរបាលរដ្ឋបាលចោមចៅទី១ដើម្បីសាកសួរនិងកសាងសំណុំរឿងភ្លាមៗ ។
យោងតាមប្រភពព័ត៌មានបឋមបានឲ្យថា នៅវេលាម៉ោងខាងលើមហាជនបានរាយការណ៍ទៅកាន់នគរបាលប៉ុស្តិ៍ចោមចៅទី១នោះថា បានប្រទះឃើញជនសង្ស័យ២នាក់ ប្រដាប់ដោយកាំភ្លើងខ្លី កំពុងឈរនៅលើដំបូលផ្ទះ ។ ភ្លាមៗនោះលោក អនុសេនីយ៍ឯក សាយ ចំរើន នាយប៉ុស្តិ៍នគរបាលចោមចៅទី១ បានដឹកនាំកម្លាំងនគរបាលប៉ុស្តិ៍មានទាំងឯកសណ្ឋានជានគរបាលនិងស៊ីវិល ពាក់អាវក្រោះការពារគ្រាប់ ប្រាប់ដោយអាវុធវែងនិងខ្លីគ្រប់ដៃផង ចុះទៅកាន់ទីតាំងខាងលើ ហើយក៏បានធ្វើការឃាត់ខ្លួនជនសង្ស័យទាំង២នោះភ្លាមៗតែម្ដង ។
ប្រភពដដែលបានប្រាប់ឲ្យដឹងបន្តទៀតថា បន្ទាប់មកបានធ្វើការឆែកឆេររកឃើញតែកាំភ្លើងខ្លីជ័រ១ដើមប៉ុណ្ណោះ មិនបានឃើញមានកាំភ្លើងពិតនោះទេ ដោយពុំដឹងថាពួកគេបោះចោលមុនពេលនគរបាលទៅដល់ ឬបែបណាឡើយ ។ បន្ទាប់មកនគរបាលក៏បាននាំខ្លួនជនទាំង២នាក់នោះយកសាកសួរនៅប៉ុស្តិ៍ ហើយពុំទាន់ដឹងពីគោលបំណងរបស់ជនសង្ស័យក្នុងប្រើប្រាស់កាំភ្លើងខ្លីជ័រនោះដើម្បីអ្វីនោះទេ ៕
ចែករំលែកព័តមាននេះ