ខេត្តស្វាយរៀង ៖ កម្លាំងសមត្ថកិច្ចកងរាជអាវុធហត្ថខេត្តស្វាយរៀង បានធ្វើការចុះបង្ក្រាបបទល្មើសប៉ុនប៉ងឆបោកតាមប្រព័ន្ធបច្ចេកវិទ្យា (Online Scams) នៅក្រុងបាវិត ឃាត់ខ្លួនជនសង្ស័យបានចំនួន ៤៥នាក់ និងវត្ថុតាងមួយចំនួនធំ ។
ប្រតិបត្តិការនេះធ្វើឡើងនៅថ្ងៃទី៣០ ខែឧសភា ឆ្នាំ២២៦ នៅភូមិបាវិតកណ្តាល សង្កាត់បាវិត ក្រុងបាវិត ។
បើតាមមន្ត្រីកងរាជអាវុធហត្ថបានឲ្យដឹងថា កាបង្ក្រាបនេះដោយបញ្ជាផ្ទាល់ពីលោកមេបញ្ជាការកងរាជអាវុធហត្ថខេត្ត កម្លាំងកងរាជអាវុធហត្ថខេត្តស្វាយរៀង ដឹកនាំលោកវរសេនីយ៍ឯក ស្រី វត្ថា មេបញ្ជាការរង និងមានការចូលរួមពីលោកអភិបាលរងក្រុងបាវិត លោកមេភូមិបាវិតកណ្ដាល និងការសម្របសម្រួលពីលោក ហួត វិចិត្រ ព្រះរាជអាជ្ញារង ស្ថិតនៅបន្ទប់ជួលមួយកន្លែង ស្ថិតនៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ។
ក្នុងប្រតិបត្តិការចុះបង្ក្រាបនេះ កម្លាំងសមត្ថកិច្ចបានរកឃើញវត្ថុតាង រួមមាន ៖ តុចំនួន២១, កៅអីចំនួន៥៩, ទូរសព្ទដៃចំនួន៦៩គ្រឿង, ទូរសព្ទដៃ(ក្រុមហ៊ុន) ចំនួន៥៨គ្រឿង, សៀវភៅកត់ត្រា ចំនួន៨ក្បាល, កាតបញ្ចូលទូរស័ព្ទ ១$ (មិត្តហ្វូន) ចំនួន១៨០សន្លឹក, ដុំWIFI ចំនួន២, សៀវភៅការងារជនបរទេស ចំនួន៥៦សន្លឹក, លិខិតឆ្លងដែន ចំនួន៥៥ក្បាល, ស៊ីមកាត ចំនួន១០៨, អត្តសញ្ញាណប័ណ្ណ ចំនួន២៤សន្លឹក, ប័ណ្ណបើកបរចិន ចំនួន២ និងកាតធនាគារចិនចំនួន១៩ ។
បច្ចុប្បន្នជនសង្ស័យ និងវត្ថុតាង ត្រូវបាននាំខ្លួនទៅទីបញ្ជាការកងរាជអាវុធហត្ថខេត្តស្វាយរៀង ដើម្បីកសាងសំណុំរឿងអនុវត្តតាមនីតិវិធី ៕
ចែករំលែកព័តមាននេះ