ខេត្តកំពង់ស្ពឺ ៖ លោក អូលីវីយេ រីស្ហា ឯកអគ្គរដ្ឋទូតបារាំង បានអញ្ជើញទៅបំពេញទស្សនកិច្ចនៅ មជ្ឈមណ្ឌលជាតិរក្សាសន្តិភាព ក្នុងខេត្តកំពង់ស្ពឺ ដើម្បីចូលរួមពិនិត្យមើលវគ្គហ្វឹកហ្វឺនស្តីពី «សកម្មភាពបោសសម្អាតមីនមនុស្សធម៌»។ នេះបើយោងតាមផេកស្ថានទូតបារាំងប្រចាំកម្ពុជា បានប្រកាសនារសៀលថ្ងៃទី០១ ខែមិថុនានេះ ។
ស្ថានទូតបារាំងប្រចាំកម្ពុជា បានបន្តថា លោកបានអញ្ជើញចូលរួមពិនិត្យមើលវគ្គហ្វឹកហ្វឺនស្តីពី សកម្មភាពបោសសម្អាតមីនមនុស្សធម៌ ដែលរៀបចំឡើងដោយបេសកកម្មសហប្រតិបត្តិការការពារជាតិ នៃស្ថានទូតបារាំង ។
ចំពោះវគ្គហ្វឹកហ្វឺនរយៈពេល ៥សប្តាហ៍នេះ ដឹកនាំដោយអ្នកជំនាញបំផ្លាញគ្រាប់មិនទាន់ផ្ទុះ (EOD) ចំនួន ២ រូប មកពីកងវរសេនាធំវិស្វកម្មលេខ១៣ ដែលអនុញ្ញាតឱ្យកងកម្លាំងមួកខៀវកម្ពុជា អាចអភិវឌ្ឍន៍សមត្ថភាពចាំបាច់ ក្នុងការធានាសុវត្ថិភាពជូនដល់អ្នកដោះមីន និងប្រជាពលរដ្ឋ អំឡុងពេលគ្រប់គ្រង និងបោសសម្អាតសំណល់ជាតិផ្ទុះពីសង្គ្រាម ។
នាយកដ្ឋានសហប្រតិបត្តិការសន្តិសុខ និងការពារជាតិ បានគាំទ្រដល់ការបណ្តុះបណ្តាល នាយទាហាន និងនាយទាហានរង នៃសាលាជាតិរក្សាសន្តិភាព (NPMEC) នៅកម្ពុជា អស់រយៈពេលជាង១៥ ឆ្នាំមកហើយ ដើម្បីត្រៀមលក្ខណៈបញ្ជូនពួកគេទៅចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ ៕
ចែករំលែកព័តមាននេះ