ប្រទេសចិន ៖ តម្លៃផ្លែទុរេននៅក្នុងប្រទេសចិនបានធ្លាក់ចុះ ដោយសារតែការផ្គត់ផ្គង់ការកើនឡើង ជំរុញដោយការនាំចូលកាន់តែច្រើន ការដឹកជញ្ជូនកាន់តែលឿន ចំពេលរដូវកាលប្រមូលផល។ នេះបើតាមការចេញផ្សាយពី VnExpress នៅថ្ងៃទី១ ខែមិថុនា ឆ្នាំ២០២៦។
ទិន្នន័យពីទីផ្សារបោះដុំ និងអ្នកលក់រាយចិនបង្ហាញថា ទុរេនមួយចំនួននាពេលបច្ចុប្បន្ននេះ មានតម្លៃថោកជាងឆ្នាំមុនពី ១០ ទៅ ២០ %។ បើកាសែត China Daily បានរាយការណ៍ថា នៅតាមកន្លែងខ្លះ ទុរេនដែលធ្លាប់លក់ក្នុងតម្លៃរហូតដល់ ៤០០ យន់ ឬ ៥៩ ដុល្លារអាមេរិកក្នុង១ផ្លែ ឥឡូវនេះមានតម្លៃក្រោម ១០០ យន់ ឬ ១៤ ដុល្លារទៅវិញ ដែលបង្កឱ្យមានការជជែកដេញដោលយ៉ាងផុសផុលតាមបណ្តាញទំនាក់ទំនងសង្គមអំពីភាពងាយរកបានដោយស្រួលនូវផ្លែទុរេន ដែលពីមុនមានតម្លៃថ្លៃ និងពិបាករកទិញ។
នៅទីផ្សារបោះដុំ Xinfadi ស្ថិតនៅក្នុងទីក្រុងប៉េកាំង ប្រទេសចិន កាលពីថ្ងៃទី ២៦ ខែឧសភា ឆ្នាំ២០២៦ កន្លងទៅ ទុរេនពូជខ្នើយមាស ឬ ម៉ាន់ថង (Monthong) របស់ថៃ ដែលជាពូជពេញនិយមបំផុតនៅក្នុងប្រទេសចិននោះ មានតម្លៃជាមធ្យមកន្លះគីឡូត្រឹម ២៤,១៥ យន់ ឬ ៣,៥៦ ដុល្លារ ពោលធ្លាក់ចុះដល់ ១៤ % បើធៀបនឹងដើមខែមេសាកន្លងទៅ។ ក្រុមអ្នកលក់រាយក៏បានចាប់ផ្តើមបញ្ចុះតម្លៃលក់បន្តជូនដល់អតិថិជន ទៅតាមតម្លៃបោះដុំដែលបានធ្លាក់ថ្លៃនោះផងដែរ។
បើតាមសម្តីរបស់លោក He Huaxin ប្រធានក្រុមសហគមន៍ទិញទំនិញនៅផ្សារលក់ដុំ Xinfadi បានឱ្យដឹងថា «បរិមាណលក់សរុបបានកើនឡើងជាង ២០% បើធៀបនឹងរយៈពេលដូចគ្នា កាលពីឆ្នាំមុន។ ទុរេនមកពីប្រទេសជាច្រើនឥឡូវនេះកំពុងចូលមកកាន់ទីផ្សារចិន ដោយពូជទុរេនវៀតណាមបង្ហាញពីសន្ទុះកំណើនខ្លាំងជាពិសេស»។
គួរបញ្ជាក់ថា ចិន គឺជាប្រទេសនាំចូល និងទទួលទានផ្លែទុរេនធំជាងគេបំផុតនៅលើពិភពលោក ដែលមានចំនួនប្រហែល ៨២% នៅទូទាំងពិភពលោក។ តម្រូវការកើនឡើងបានជំរុញឱ្យអ្នកផលិតនៅទូទាំងអាស៊ីអាគ្នេយ៍ ជាពិសេសប្រទេសថៃ និងវៀតណាម ពង្រីកការដាំដុះ និងនាំចេញទៅកាន់ទីផ្សារដ៏ធំមួយនេះ៕
ចែករំលែកព័តមាននេះ