លោកគ្រូម្នាក់បើកបង្រៀនកួរនៅផ្ទះ ត្រូវអ្នកជិតខាង២នាក់ប្ដឹងថារំខាន អ្នកប្ដឹងរងការរិះគ.ន់ដូចទឹកបា.ក់ទំនប់
- ភ្នំពេញ
រាជធានីភ្នំពេញ ៖ លោកគ្រូម្នាក់បានបើកបង្រៀនកួរពិសេសដល់សិស្សចាប់ពីថ្នាក់ទី១ ដល់ថ្នាក់ទី១២ ប្រមាណ៣០នាក់នៅផ្ទះរបស់ខ្លួនស្ថិតនៅផ្ទះលេខH៧B ផ្លូវលេខ៧ បុរីDL ភូមិពង្រ សង្កាត់ស្នោរ ខណ្ឌកំបូល រាជធានីភ្នំពេញ ។ ស្រាប់តែមានអ្នកជិតខាង២នាក់បានដាក់ពាក្យប្ដឹងសុំឲ្យអាជ្ញាធរ សង្កាត់និងខណ្ឌខាងលើជួយរកដំណោះស្រាយ ដោយបានអះអាងថា រំខានដល់ការរស់នៅរបស់ពួកគាត់ ។
ក្រោយកើតរឿងប្ដឹងផ្ដល់គ្នានោះ ខាងលោកគ្រូបង្រៀនបានយកលិខិតអញ្ជើញរបស់សាលាខណ្ឌកំបូលបង្ហោះលើបណ្ដាញសង្គមហ្វេសប៊ុក ហើយត្រូវបានលោកបណ្ឌិតគិន ភា យកទៅបង្ហោះបន្តលើផេកផ្ទាល់ខ្លួនលោក ។ ព្រមទាំងអមដោយការបញ្ចេញមតិយោបល់លើរឿងនេះទៀតនោះ បានធ្វើឲ្យមហាជនរិះគន់ប្រមាថកាតទៀនដល់អ្នកប្ដឹងគ្រូបង្រៀននោះ តាមបណ្ដាញសង្គមហ្វេសប៊ុកដូចទឹកបាក់ទំនប់ ។
លោកគ្រូបង្រៀនខាងលើឈ្មោះចាន់ សុភា មានទីលំនៅទីតាំងកើតហេតុខាងលើ ដោយឡែកបុគ្គល២រូបដែលជាអ្នកប្ដឹងនោះម្នាក់ឈ្មោះឡេង ដារ៉ា និងម្នាក់ទៀតឈ្មោះលី សុខជា ពួកគាត់ទាំង២នាក់នេះគឺជាអ្នករស់នៅជិតខាងលោកគ្រូបង្រៀនរូបនោះដែរ ។
អាជ្ញាធរបានប្រាប់ថា ទីតាំងនោះបានបើកបង្រៀនកួរដល់សិស្សចាប់ពីថ្នាក់ទី១ដល់ថ្នាក់ទៅ១២ ដោយចាប់បង្រៀនពីវេលាម៉ោង៣រសៀលដល់ម៉ោង៨យប់ជារៀងរាល់ថ្ងៃ ហើយបង្រៀន៣វគ្គ ដែលក្នុង១វគ្គៗមានសិស្ស១០នាក់ប៉ុណ្ណោះ ។ ដោយឡែកសិស្សដែលទៅរៀននោះមានការរត់លេង ឬយកបាល់ទៅលេង និងការនិយាយគ្នាខ្លាំងៗ ព្រមទាំងមានសម្លេងអូសតុ កៅអីឮៗ ផង ទើបអ្នកជិតខាងទាំង២នាក់ខាងលើ យល់ថាជាការរំខានដល់ខ្លួន ក៏កើតទៅជារឿងប្ដឹងផ្ដល់គ្នាតែម្ដងទៅ ។
ប្រភពដដែលបានប្រាប់ឲ្យដឹងបន្ថែមថា បន្ទាប់មករដ្ឋបាលសង្កាត់ស្នោរ បានអញ្ជើញភាគីទាំងអស់ទៅជួបសម្របសម្រួលគ្នានៅសាលាសង្កាត់ ហើយពេលនោះអ្នកប្ដឹងទាមទារឲ្យបិទទីតាំងខាងលើឈប់ឲ្យបង្រៀន ប៉ុន្តែភាគីលោកគ្រូបង្រៀនមិនព្រមសុខចិត្តនោះទេ ដោយអះអាងថា គាត់មិនបានខុសរហូតបិទទីតាំងរបស់គាត់ឡើយ ។
ដោយឡែករដ្ឋបាលសង្កាត់ស្នោរក៏មិនមានសិទ្ធិបិទថ្នាលបណ្ដុះចំណេះវិជ្ជានេះបានដែរ ទើបពេលនោះដោះស្រាយអត់ចប់ ហើយ រដ្ឋបាលសង្កាត់ ក៏បានបញ្ជូនសំណុំរឿងមួយនេះទៅកាន់រដ្ឋបាលសាលាខណ្ឌកំបូល ដើម្បីដោះស្រាយបន្តទៀត ។
ប្រភពខាងលើបានបញ្ជាក់ប្រាប់បន្តទៀតថា ក្រោយមកនៅថ្ងៃទី២៥ ខែឧសភា ឆ្នាំ២០២៦ កម្លាំងរដ្ឋបាលសាលាខណ្ឌកំបូល ក៏បានចុះទីពិនិត្យទីតាំងនោះនិងធ្វើការដោះស្រាយ១ជំហានរួចហើយ ប៉ុន្តែនៅតែមិនត្រូវគ្នា ទើបចេញលិខិត១ទៀតអញ្ជើញភាគីទាំងសងខាង ដើម្បីជួបដោះស្រាយគ្នានៅថ្ងៃទី៣ ខែមិថុនា ឆ្នាំ២០២៦ខាងមុខ ។ បន្ទាប់មកលោកគ្រូបង្រៀនរូបនោះបានយកលិខិតអញ្ជើញរបស់រដ្ឋបាលខណ្ឌកំបូលនោះ ទៅបង្ហោះលើបណ្ដាញសង្គមហ្វេសប៊ុក ហើយលោកបណ្ឌិត គិន ភា ក៏បានយកលិខិតអញ្ជើញនោះទៅបង្ហោះនៅលើផេករបស់លោកបន្តទៀត ។
លោកគិន ភា ក៏បានសរសេរសារបន្ថែមដូច្នេះថា «គេបើកខារ៉ាអូខេ បើកបនល្បែង បើកហាងផឹកស៊ី មិនព្រមនាំគ្នាប្ដឹង ទៅប្តឹងគ្រូបង្រៀនបើកបង្រៀនកួរក្មេងៗ ស្រុកនេះបើមិនរលាយទើបចម្លែក» ។ បន្ទាប់ពីការបង្ហោះរបស់លោក បានធ្វើឲ្យមហាជនឃើញហើយចូលទៅខមិនរិះគន់ទៅលើបុគ្គល២នាក់ដែលអ្នកប្ដឹងគ្រូបង្រៀននោះយ៉ាងចាស់ដៃ ដូចទឹកបាក់ទំនប់ ។
ក្រោយពេលរឿងនេះផ្ទុះខ្លាំងតាមបញ្ដាញសង្គមនោះ ទើបនៅវេលាព្រឹកថ្ងៃទី១ ខែមិថុនា ឆ្នាំ២០២៦ លោកឃឹម ស៊ុនសូដា អភិបាលខណ្ឌកំបូល បានដឹកនាំមន្ត្រីរដ្ឋបាលខណ្ឌរបស់ខ្លួន រួមទាំងមន្ត្រីរដ្ឋបាលសង្កាត់ស្នោរ និងមេភូមិពង្រ ចុះទៅកាន់ទីតាំងកើតហេតុអញ្ជើញភាគីទាំង២ជួបដោះស្រាយគ្នានៅមុនថ្ងៃកំណត់តែម្ដង ។ ខណៈនោះភាគីគ្រូបង្រៀនបានសុំទោសអ្នកជិតខាងទាំង២របស់ខ្លួន ហើយជាលទ្ធផលបានដោះស្រាយគ្នាចប់រឿង ដោយភាគីជម្លោះទាំង២បានឯកភាពទទួលយកនូវលក្ខខណ្ឌដូចខាងក្រោម៖ ១,លោកចាន់ សុភា(គ្រូបង្រៀន) ធ្វើការកែសម្រួលទីតាំងចំណតកង់ ម៉ូតូនិងណែនាំសិស្សឲ្យមានសណ្ដាប់ធ្នាប់ល្អ ។
២,កែសម្រួលសម្លេងរំខានខាងក្នុង កុំឲ្យមានសម្លេងរំខានទៀត ត្រូវយកក្រណាត់រុំជើងតុកៅអីកុំឲ្យអូសឮទៀត ៣, ណែនាំសិស្សនៅពេលបង្រៀនចប់ឲ្យប្រញាប់ត្រឡប់ទៅផ្ទះវិញ ។ ៤,ស្នើសុំឲ្យអ្នកជិតខាងមានការយោគយល់អធ្យាស្រ័យគ្នា ក្លាយជាអ្នកជិតខាងល្អ ៥, លោកអភិបាលលខណ្ឌកំបូល បានណែនាំឲ្យអាជ្ញាធរ សង្កាត់និងភូមិតាមដានសកម្មភាពក្មេងៗ(សិស្ស) ថាតើអនុវត្តតាមលក្ខខណ្ឌខាងលើឬអត់ ៕
ចែករំលែកព័តមាននេះ