អភិបាលខេត្តបញ្ជាឱ្យលោកស្នងការខេត្ត ស្រាវជ្រាវរករថយន្តដឹកទុរេនមកពីក្រៅចូលបែកអន្លូង ដើម្បីបន្លំភ្នែកពលរដ្ឋ
- កំពង់ចាម
ខេត្តកំពង់ចាម ៖ ដើម្បីលើកកម្ពស់និងរក្សាកេរ្តិ៍ឈ្មោះទុរេនបែកអន្លូង ដែលមានទីតាំងស្ថិតនៅឃុំអារក្សត្នោត ស្រុកស្ទឹងត្រង់ មានរសជាតិឆ្ងាញ់ត្រូវបានប្រជាពលរដ្ឋខ្មែរគ្រប់ទិសទីចូលចិត្តទិញយកទៅពិសារហើយមិនតែប៉ុណ្ណោះបាននាំចេញទៅកាន់ទីផ្សារប្រទេសចិនច្រើនតោនទៀត ព្រោះពួកគាត់បានដាំដុះទៅតាមលក្ខណៈបច្ចេកទេសត្រឹមត្រូវរបស់ក្រសួងកសិកម្ម។
ឯកឧត្តមអ៊ុន ចាន់ដា អភិបាលខេត្តមានប្រសាសន៍ឲ្យដឹងនាព្រឹកថ្ងៃទី២៨ ខែឧសភាឆ្នាំ២០២៦ ក្នុងឱកាសជួបសំណេះសំណាលជាមួយអតីតយុទ្ធជននិវត្តជនចំនួន២០០នាក់ នៅបរិវេណសាលាស្រុកស្ទឹងត្រង់ បានលើកឡើងថាក្នុងមួយរយៈនេះមានគេរាយការណ៍មករូបលោកដោយមានរថយន្តពាក់ស្លាកលេខដដែលៗ ដែលបានដឹកទុរេនពីតំបន់ខាងក្រៅយកមកស្តុបទទុកនៅតាមចំការមួយចំនួននៅបែកអន្លូងសកម្មភាពដឹកនេះគឺធ្វើឡើងតែពេលយប់ៗប៉ុណ្ណោះ។
ឯកឧត្តមអភិបាលខេត្តមានប្រសាសន៍បន្តថា តាមរយៈស្លាកលេខរថយន្តដែលបានស្គាល់និងសង្ស័យដឹកទុរេនមកពីខាងក្រៅ ក៏បានប្រគល់ឱ្យទៅលោកស្នងការនគរបាលខេត្តដើម្បីធ្វើការស្រាវជ្រាវរករថយន្តដែលដឹកបទល្មើសនោះ។ក្រោយពីមានសេចក្តីរាយការណ៍បែបនេះរូបលោកបានឲ្យដាក់កម្លាំងមួយក្រុមយាមប្រចាំការនៅក្បាលស្ពានស្ទឹងត្រង់-ក្រូចឆ្មារ ត្រើយខាងលិចទឹកដីស្រុកស្ទឹងត្រង់ខេត្តកំពង់ចាម ក្នុងករណីបើឃើញរថយន្តដែលដឹកទុរេននៅពេលយប់ត្រូវតែចាប់ឃាត់ទុកដើម្បីមានវិធានការតាមច្បាប់។
កន្លងទៅមានស្ត្រីម្នាក់ឈ្មោះយ៉ាដា រស់នៅស្រុកព្រៃឈរ បានលក់ទុរេននាំមកពីប្រទេសថៃ ហើយបានឡាយលក់តាមបណ្ដាញសង្គមភូតកុហកប្រជាពលរដ្ឋថាទុរេនកំពង់ចាម។ កន្លងទៅថ្មីៗរូបលោក(អភិបាលខេត្ត)បានដឹកនាំមន្ត្រីជំនាញក្នុងនោះមានមន្ទីរពាណិជ្ជកម្មបានចុះសំណេះសំណាលជាមួយសហគមន៍ទុរេនបែកអន្លូង ហើយមានផ្ទៃដីប្រមាណ៥០ហិកតាប៉ុណ្ណោះកំពុងតែផ្ដល់ផល បើគិតទៅយកមកចែកចាយលក់នៅកំពង់ចាមគឺមិនទាំងគ្រប់រឿងអីថាទុរេនបែកអន្លូង ទៅវិញនោះ តាមពិតនាំមកពីផ្ទះលេខ២សោះ។ ហើយករណីស្ត្រីឈ្មោះយ៉ាដា នៅស្រុកព្រៃឈរ ក៏ត្រូវបានឃាត់ខ្លួនបញ្ជូនទៅកាន់ខេត្តបាត់ដំបងចាត់ការតាមនីតិវិធី។
ឯកឧត្តមអភិបាលខេត្តកំពង់ចាម បញ្ជាក់ថា ក្នុងនាមរដ្ឋបាលខេត្តគឺបានយកចិត្តទុកដាក់ធ្វើយ៉ាងណារក្សាគេឈ្មោះទុរេនបែកអន្លូង ដោយអាចប្រើពេលកន្លះខែទៀតជាមួយមន្ទីរពាណិជ្ជកម្មខេត្តនិងមានQRកូដ បិទនៅលើផ្លែទុរេនបែកអន្លូង ដូច្នេះមិនអាចមានជនណាមកបន្លំបាននោះទេ។ ហើយសកម្មភាពដែលមានក្រុមឈ្មួញខិលខូចលួចដឹកទុរេនពីតំបន់ខាងក្រៅមកចូលចំការនៅបែកអន្លូងគឺសូមឱ្យសមត្ថកិច្ចនិងអាជ្ញាធរពាក់ព័ន្ធត្រូវតែយកចិត្តទុកដាក់ប្រឹងប្រែងទប់ស្កាត់ឱ្យខាងតែបានគឺមិនឱ្យមានបន្តទៀតនោះទេ ។ សំខាន់គឺរក្សានៅគុណភាពទុរេនបែកអន្លូង ធ្វើយ៉ាងណាមិនឲ្យសាបដូចនៅតំបន់ផ្សេងនោះឡើយ។ ហើយក្នុងករណីបើរកឃើញរថយន្តដឹកទុរេនមកពីតំបន់ខាងក្រៅពាក់ព័ន្ធនិងមន្ត្រីណាមួយនោះគឺមិនអត់ឱនឱ្យទេ ៕
ចែករំលែកព័តមាននេះ