ខេត្តកំពត ៖ អ្នកនាំពាក្យ​សាលាដំបូង​ខ​ត្ត​កំពត នៅ​ថ្ងៃ​ទី​២៧ ខែឧសភា ឆ្នាំ​២០២៦ បាន​ចេញ​សេចក្តី​ប្រកាស​ព័ត៌មាន ស្តី​ពី​ការ​ផ្ដន្ទាទោស​ជនជាប់ចោទ ពាក់ព័ន្ធ​នឹង​ករណី​សំណុំរឿង​ឃាតកម្ម​ដោយ​មាន​ទារុណកម្ម អំពើ​ឃោរឃៅ និង​ឆបោក​មាន​ស្ថាន​ទម្ងន់ទោស ជា​ក្រុម​មានការ​ចាត់តាំង ( ករណី​ឃាតកម្ម​លើ​និស្សិត​ជនជាតិ​កូរ៉េ​ខាងត្បូង​ឈ្មោះ PARK MINHO ) ។

អ្នកនាំពាក្យ​សាលាដំបូង​ខេត្តកំពត ជម្រាប​ជូន​ថា កាលពី​ថ្ងៃ​ទី​៦ ខែឧសភា ឆ្នាំ​២០២៦ ក្រុមប្រឹក្សា​ជំនុំជម្រះ នៃ​សាលាដំបូង​ខេត្តកំពត​បាន​បើក​សវនាការ​ជំនុំជម្រះ​លើ​សំណុំរឿង ព្រហ្មទណ្ឌ​លេខ ៦០០-I ចុះ​ថ្ងៃ​ទី​១១ ខែសីហា ឆ្នាំ​២០២៥ ដែល​មាន​ជនជាប់ចោទ​ឈ្មោះ JIN TIAN_LONG ជនជាតិ​ចិន​, ឈ្មោះ VIN_SONG_WAN ជនជាតិ​ចិន​, ឈ្មោះ LI GUANG IIAO ជនជាតិ​ចិន​, ឈ្មោះ LI XING PENG ជនជាតិ​ចិន​, ឈ្មោះ LIU HAOXING ជនជាតិ​ចិន និង​ឈ្មោះ ZIIU RENZHE, ជនជាតិ​ចិន ពី​បទ ឃាតកម្ម​ដោយ​មាន​ទារុណកម្ម អំពើ​ឃោរឃៅ និង​ឆបោក​មាន​ស្ថាន​ទម្ងន់ទោស​ជា​ក្រុម​មានការ​ចាត់តាំង ប្រព្រឹត្ត​នៅ​ចំណុច​អាគារ​លេខ ១៧៣ តំបន់​៣(​បុរី​ក្រោ​ន​) ស្ថិត​នៅ​ភូមិ​រលួស សង្កាត់​បឹង​ទូក ក្រុង​បូកគោ ខេត្តកំពត កាលពី​ថ្ងៃ​ទី​៨ ខែសីហា ឆ្នាំ​២០២៥ បទល្មើស​ព្រហ្មទណ្ឌ​ដែល​មាន​ចែង និង​ឱ្យ​ផ្តន្ទាទោស​តាម​បញ្ញត្តិ​មាត្រា ២០៥, មាត្រា ៣៧៧ និង​មាត្រា ៣៨០ ចំណុច​ទី​៥ នៃ​ក្រមព្រហ្មទណ្ឌ ។

ក្រោយ​ពី​ការ​ធ្វើ​កិច្ច​ពិភាក្សា​ដេញដោល​លើ​ជនជាប់ចោទ ភាគី​ពាក់ព័ន្ធ និង​បាន​ពិនិត្យ​ភស្តុ​តាង អង្គហេតុ និង​អង្គច្បាប់​រួច​មក ឃើញ​ថា មាន​ភស្តុ​តាង និង​ពិរុទ្ធភាព​គ្រប់គ្រាន់​លើ​ជនជាប់ចោទ ទាំង ៦​នាក់​ខាងលើ ។

ហេតុ​ដូច្នេះ ក្រុមប្រឹក្សា​ជំនុំជម្រះ នៃ​សាលាដំបូង​ខេត្តកំពត បាន​ប្រកាស​ជា​សាធារណៈ នូវ​សាលក្រម​ព្រហ្មទណ្ឌ​លេខ​: ២៨១ (​គ​) ចុះ​ថ្ងៃ​ទី​២៧ ខែឧសភា ឆ្នាំ​២០២៦ ដោយ​បាន​សម្រេច​ផ្តន្ទាទោស​លើ​ជនជាប់ចោទ​ដូច​ខាងក្រោម ៖
១. ឈ្មោះ LI XING PENG ហៅ YOU FU ភេទ​ប្រុស កើត​ថ្ងៃ​ទី​៥ ខែមករា ឆ្នាំ​១៩៩១ ជនជាតិ​ចិន
២. ឈ្មោះ LIU HAOXING ហៅ ‘TA THOV ភេទ​ប្រុស កើត​ថ្ងៃ​ទី​១០ ខែមេសា ឆ្នាំ​១៩៩៦ ជនជាតិ​ចិន
៣. ឈ្មោះ ZHU RENZHE ហៅ CHEA KER ភេទ​ប្រុស កើត​ថ្ងៃ​ទី​២ ខែកញ្ញា ឆ្នាំ​១៩៨២ ជនជាតិ​ចិន
៤. ឈ្មោះ YIN SONG WAN ភេទ​ប្រុស កើត​ថ្ងៃ​ទី​២២ ខែមីនា ឆ្នាំ​១៩៧២ ជនជាតិ​ចិន
៥. ឈ្មោះ JIN TIAN LONG ហៅ KIN CHEOL LYEONG ភេទ​ប្រុស កើត​ថ្ងៃ​ទី​៥ ខែមិថុនា ឆ្នាំ​១៩៨១ ជនជាតិ​ចិន
៦. ឈ្មោះ LI GUANG IIAO ហៅ XIAO PIANO ភេទ​ប្រុស កើត​ថ្ងៃ​ទី​២២ ខែមេសា ឆ្នាំ​១៩៩១ ជនជាតិ​ចិន ដាក់​ពន្ធនាគារ​កំណត់​ក្នុង​ម្នាក់​ៗ អស់​មួយ​ជីវិត ពី​បទ ឃាតកម្ម​ដោយ​មាន​ទារុណកម្ម អំពើ​ឃោរឃៅ និង​ឆបោក​មាន​ស្ថាន​ទម្ងន់ទោស​ជា​ក្រុម មានការ​ចាត់តាំង ប្រព្រឹត្ត​នៅ​ចំណុច​អាគារ​លេខ​១៧៣ តំបន់​៣ (​បុរី​ក្រោ​ន​) ស្ថិត​នៅ​ភូមិ​រលួស សង្កាត់​បឹង​ទូក ក្រុង​បូកគោ ខេត្តកំពត កាលពី​ថ្ងៃ​ទី​៨ ខែសីហា ឆ្នាំ​២០២៥ បទល្មើស​ព្រហ្មទណ្ឌ ដែល​មាន​ចែង និង​ឱ្យ​ផ្ដន្ទាទោស​តាម​បញ្ញត្តិ​មាត្រា ២០៥, មាត្រា ៣៧៧ និង​មាត្រា ៣៨០ ចំណុច​ទី​៥ នៃ​ក្រមព្រហ្មទណ្ឌ ព្រមទាំង​សម្រេច​រឹបអូស​វត្ថុ ដែល​ចាប់​យក​ពាក់ព័ន្ធ​បទល្មើស​ខាងលើ​ផង​ដែរ ។

គួររម្លឹកថា យោង​តាម​របាយការណ៍​លទ្ធផល​ប្រតិបត្តិការ​ស៊ើបអង្កេត​ស្រាវជ្រាវ​របស់​អគ្គស្នងការដ្ឋាន​នគរបាល​ជាតិ បាន​បញ្ជាក់​ថា ក្នុង​ខណៈ​ដែល​នគរបាល​ចុះ​ល្បាត​ជំនាញ បាន​ប្រទះ​ឃើញ​រថយន្ត​ដឹក​សាកសព​មួយ​គ្រឿង ក្នុងភូមិ​កំពង់បាយ​ខាងត្បូង សង្កាត់​កំពង់បាយ ក្រុង​កំពត វេលា​ម៉ោង ០២:០០ នាទី រំលង​អធ្រាត្រ ថ្ងៃ​ទី​៨ ខែសីហា ឆ្នាំ​២០២៥​។ ភ្លាម​នោះ នគរបាល​បាន​ឃាត់ខ្លួន​ជនសង្ស័យ​ជនជាតិ​ចិន ចំនួន​២​នាក់ ដែល​ទី​១.​ឈ្មោះ LI XINGPENG ហៅ YOU FU ភេទ​ប្រុស អាយុ​៣៥​ឆ្នាំ និង​ទី​២.​ឈ្មោះ ZHU RENZHE ហៅ CHEA KER ភេទ​ប្រុស អាយុ​៤៣​ឆ្នាំ ដែល​ក្នុង​នោះ​ម្នាក់​ជា​អ្នកបើកបរ និង​ម្នាក់ ទៀត​រួម​ដំណើរ​ដឹក​សព​។ ចំណែក​ជនសង្ស័យ​ម្នាក់​ទៀត​ឈ្មោះ ប៉ា​ជា ភេទ​ប្រុស អាយុ​ប្រហែល​៣៥​ឆ្នាំ បាន​រត់គេច​ខ្លួន ។

ក្រោយ​ពិនិត្យ​អត្តសញ្ញាណ ឃើញ​ថា សព​ឈ្មោះ PARK MINHO ភេទ​ប្រុស អាយុ​២២​ឆ្នាំ ជា​និស្សិត​ជនជាតិ​កូរ៉េ​ខាងត្បូង បាន​ធ្វើ​ដំណើរ​មក​ដល់​កម្ពុជា នៅ​ថ្ងៃ​ទី​១៧ ខែកក្កដា ឆ្នាំ​២០២៥​។ បន្ទាប់​ពី​ការ​ធ្វើ​កោសល្យវិច័យ​បឋម​រក​ឃើញ​ថា សព​ជន​រង​គ្រោះ​បាន​ស្លាប់​ដោយ​គាំងបេះដូង ដែល​បណ្តាល​មក​ពី​ការ ធ្វើ​ទារុណកម្ម ដោយ​មាន​ស្នាម​ជាំ​ជា​ច្រើន​កន្លែង​លើ​រាង​កាយ​។ អង្គ​ហេតុនេះ​បញ្ជាក់​ថា នគរបាល​កម្ពុជា​ពុំ បាន​ទទួល​ព័ត៌មាន ឬ​បណ្ដឹង​ពី​ក្រុម​គ្រួសារ​សព ឬ​ក៏​ពី​ស្ថានទូត​កូរ៉េ​ខាងត្បូង ដូច​ការ​ចុះ​ផ្សាយ​របស់ សារព័ត៌មាន South China Morning Post ដែល​ថា គ្រួសារ​សព បាន​ស្វែងរក​កិច្ច​អន្តរាគមន៍​ជួយ​សង្គ្រោះ​តាម​រយៈ​ស្ថានទូត និង​នគរបាល​មូលដ្ឋាន​នោះ​ទេ ។

តាម​ការ​វិភាគ​ជំនាញ អគ្គស្នងការដ្ឋាន​នគរបាល​ជាតិ​ក្រសួងមហាផ្ទៃ ដឹកនាំ​កម្លាំង​ស្នងការដ្ឋាន នគរបាល​ខេត្តកំពត បាន​បន្ត​ស៊ើបអង្កេត និង​ឈាន​ទៅ​បង្ក្រាប​ផ្ទះ​វីឡា​មួយ​កន្លែង ស្ថិត​នៅ​ភូមិ​រលួស សង្កាត់​បឹង​ទូក ក្រុង​បូកគោ ខេត្តកំពត ដែល​ជា​កន្លែង​ស្នាក់​នៅ​របស់​ជន​រង​គ្រោះ​មុន​ពេល​ស្លាប់ និង​ជាទី​តាំង​ដែល​ត្រូវ​បាន​កំណត់​មុខសញ្ញា​ថា មាន​សកម្មភាព​អន​ឡាញ​ខុសច្បាប់ ។

ក្នុង​ការ​បង្ក្រាប​នោះ នគរបាល​បាន​ចាប់ខ្លួន​ជនសង្ស័យ​ម្នាក់​ឈ្មោះ LIU HAOXING ហៅ TA THOV ភេទ​ប្រុស អាយុ​២៩​ឆ្នាំ ដែល​ជា​អ្នកគ្រប់គ្រង​អគារ និង​បាន​ដកហូត​សម្ភារ​វត្ថុ​តាង​ពាក់ព័ន្ធ​មួយ​ចំនួន​។ ដោយឡែក ជនសង្ស័យ​ម្នាក់​ទៀត​ឈ្មោះ ហា​យ ភេទ​ប្រុស ជនជាតិ​ចិន អាយុ​ប្រហែល​៣០​ឆ្នាំ បាន​រត់គេច​ខ្លួន​បាត់ ។

ក្រោយ​ពី​ការ​ប្រមូល​ភស្តុ​តាង ការ​ស្តាប់​ចម្លើយ​ជនសង្ស័យ ការ​បំពេញ​កិច្ចការ​ជំនាញ​ស្រប​តាម​នីតិវិធី​កំណត់​ដោយ​ច្បាប់ នគរបាល​យុត្តិធម៌ បាន​កសាង​សំណុំរឿង​យ៉ាង​មូល និង​គ្រប់​ជ្រុងជ្រោយ ព្រមទាំង​បញ្ជូន​ជនសង្ស័យ​ទៅ​កាន់​អយ្យការ​អម​សាលាដំបូង​ខេត្តកំពត នៅ​ថ្ងៃ​ទី​១១ ខែសីហា ឆ្នាំ​២០២៥ ដើម្បី​បន្ត​នីតិវិធី ។

ក្រោយ​បំពេញ​នីតិវិធី​ស៊ើបអង្កេត ផ្ទៀងផ្ទាត់​ភស្តុ​តាង និង​ស្តាប់​ចម្លើយ​ជនសង្ស័យ​ទាំង​បី​នាក់ តំណាង​អយ្យការ បាន​សម្រេច​ចោទប្រកាន់​លើ​ជនសង្ស័យ​ទាំងនោះ និង​បក្ខពួក​ចំនួន​២​នាក់​ទៀត ពី​បទ​ឃាតកម្ម ដោយ​អំពើ​ឃោរឃៅ និង​បទ​ឆបោក (​តាម​ប្រព័ន្ធ​បច្ចេកវិទ្យា​) ក្នុង​មាត្រា​២០៥, មាត្រា​៣៧៧ និង​មាត្រា​៣៧៨ នៃ​ក្រម​ព្រហ្ម​ទ​ណ្ធ ៕