ប្រទេសវៀតណាម៖ អាជ្ញាធរទីក្រុងហូជីមិញ បានបើកប្រតិបត្តិការបង្ក្រាបយ៉ាងក្តៅគគុកទៅលើអាជីវកម្មអនឡាញខុសច្បាប់ធំៗចំនួនពីរ ដោយបានរឹបអូសទំនិញក្លែងក្លាយម៉ាកល្បីៗរាប់ពាន់មុខ។ នេះបើយោងតាមការចុះផ្សាយរបស់សារព័ត៌មាន VNexpress នៅថ្ងៃទី២៧ ខែឧសភានេះ។

ក្នុងនោះ ទីតាំងទីមួយជាឃ្លាំងស្ដុកស្បែកជើងក្លែងបន្លំម៉ាក Nike, Adidas និង Converse ជាង ១,០០០គូ (តម្លៃជាង ១០ម៉ឺនដុល្លារ) ដែលលួចលក់តាម Facebook, TikTok និង Shopee។ ចំណែកទីតាំងទីពីរ ស្ថិតនៅតំបន់ចូឡុង ​ដោយសមត្ថកិច្ចដកហូតបានកាបូប សម្លៀកបំពាក់ និងនាឡិកាដៃក្លែងក្លាយម៉ាកប្រ៊េនៗដូចជា Gucci, LV, Dior, និង Rolex ជិត ២,០០០មុខ ដែលរកចំណូលបានរហូតដល់ទៅជាង ១៧ម៉ឺនដុល្លារ គិតចាប់តាំងពីដើមឆ្នាំ២០២៤ មក។

ម្ចាស់អាជីវកម្មទាំងពីរបានសារភាពថា ពួកគេដឹងច្បាស់ថាជាទំនិញក្លែងក្លាយ ប៉ុន្តែនៅតែបន្តលក់ព្រោះបានចំណេញខ្ពស់ ដោយប្រើល្បិចលក់តែតាមអនឡាញ និងផ្ញើតាមអ្នកដឹកជញ្ជូន​ដើម្បីគេចពីភ្នែកសមត្ថកិច្ច។

គិតត្រឹមឆ្នាំ២០២៦ នេះ អាជ្ញាធរក្រុងហូជីមិញបានបំបែកក្តីទំនិញក្លែងក្លាយបានចំនួន ៨៨២ករណី និងរឹបអូសទំនិញខុសច្បាប់បានសរុបជាង ៧៧,១០០មុខហើយ៕