ខេត្តព្រះសីហនុ ៖ នៅថ្ងៃទី២៤ ខែឧសភា ឆ្នាំ២០២៦ វេលាម៉ោងប្រមាណ ១៤និង០០នាទី កម្លាំងនាយកដ្ឋាននគរបាលព្រហ្មទណ្ឌ បានស្នើសុំសហការជាមួយកម្លាំងផែនការងារនគរបាលព្រហ្មទណ្ឌ នៃស្នងការដ្ឋាននគរបាលខេត្តព្រះសីហនុ ដើម្បីស្រាវជ្រាវ និងតាមឃាត់ខ្លួនជនសង្ស័យជនបរទេស ចំនួន២នាក់ តាមសំណើសហប្រតិបត្តិការពីសមត្ថកិច្ចប្រទេសវៀតណាម ពាក់ព័ន្ធករណីឃាតកម្ម ។
ដោយអនុវត្តតាមអនុសាសន៍ដឹកនាំដ៏ខ្ពង់ខ្ពស់របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងដោយមានការចង្អុលបង្ហាញរបស់ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ និងមានការសម្របសម្រួលនីតិវិធីពីលោក លាវ ស្រេង ព្រះរាជអាជ្ញា កម្លាំងជំនាញបានស្រាវជ្រាវយ៉ាងយកចិត្តទុកដាក់ រហូតដល់វេលាម៉ោង ១៥និង៣០នាទី ថ្ងៃដដែល បានឃាត់ខ្លួនជនសង្ស័យទាំង ២នាក់ នៅផ្ទះជួលមួយកន្លែង ស្ថិតក្នុងភូមិ៣ សង្កាត់លេខ២ ក្រុងព្រះសីហនុ ។
ជនសង្ស័យរួមមាន ៖
១.ឈ្មោះ VAA VAA ភេទប្រុស ជនជាតិសាម័រ អាយុ២៧ឆ្នាំ ។
២.ឈ្មោះ TAFIA STEVE ភេទប្រុស ជនជាតិសាម័រ អាយុ២៣ឆ្នាំ ។
វត្ថុតាងចាប់យករួមមាន លិខិតឆ្លងដែន ២ក្បាល ទូរស័ព្ទ ៣គ្រឿង និងសម្លៀកបំពាក់មួយចំនួន ។
បច្ចុប្បន្ន ជនសង្ស័យទាំង ២នាក់ ត្រូវបាននាំមកស្នងការដ្ឋាននគរបាលខេត្តព្រះសីហនុ ដើម្បីសួរនាំ និងរៀបចំប្រគល់ជូននាយកដ្ឋាននគរបាលព្រហ្មទណ្ឌ ដើម្បីបន្តនីតិវិធី (បញ្ជូនទៅប្រទេសវៀតណាម) ។
ដោយឡែក បើតាមការចុះផ្សាយរបស់សារព័ត៌មានវៀតណាម នៅថ្ងៃទី២៦ ឧសភា ២០២៦នេះថា ប៉ូលិសទីក្រុងហូជីមិញ បានឃុំខ្លួនមនុស្ស ៨នាក់(ជនជាតិវៀតណាម) ពីបទជួយជនសង្ស័យជនជាតិសាម័រ២នាក់ (ចាប់ខ្លួននៅកម្ពុជា) ដែលបានបាញ់ប្រហារ បណ្តាលឲ្យបុរសអូស្ត្រាលីម្នាក់ស្លាប់ និងម្នាក់ទៀតរងរបួសធ្ងន់ កាលពីសប្តាហ៍មុន ។
ករណីឃាតកម្មកើតឡើង កាលពីម៉ោង១០និង១០យប់ថ្ងៃទី២១ ខែឧសភា នៅភោជនីយដ្ឋាន Cee’f ក្នុងទីក្រុងហូជីមិញ។ នៅកន្លែងកើតហេតុ មន្ត្រីប៉ូលិស បានរកឃើញជនជាតិអូស្ត្រាលីឈ្មោះ Lemalu Lorenzo Tovia អាយុ ២៥ឆ្នាំ បានស្លាប់ និងពលរដ្ឋអូស្ត្រាលីម្នាក់ទៀត ឈ្មោះ Sauni Sam អាយុ ២៧ឆ្នាំ បានរងរបួសធ្ងរ ដោយសារគ្រាប់កាំភ្លើង កំពុងសម្រាកព្យាបាលក្នុងមន្ទីរពេទ្យ ។
ក្នុងរយៈពេលមិនដល់២៤ម៉ោង ក្រោយបាញ់ប្រហារ និងរត់គេចខ្លួន ក្រុមអ្នកស៊ើបអង្កេត បានកំណត់អត្តសញ្ញាណជនសង្ស័យទាំង២នាក់ ថាឈ្មោះ Vaa Vaa ជាជនជាតិសាម័រ អាយុ ២៧ឆ្នាំ ត្រូវបានចោទប្រកាន់ថា ជាជនដៃដល់បាញ់ជនរងគ្រោះ និងឈ្មោះ Tafia Steve អាយុ ២៣ឆ្នាំ ជនជាតិសាម័រ ដែលត្រូវបានចោទប្រកាន់ថា ជាអ្នកសមគំនិត ។
ក្រោយពីបញ្ជូនខ្លួនពីប្រទេសកម្ពុជា ជនសង្ស័យទាំង២នាក់ ត្រូវបាននាំខ្លួនទៅកាន់ទីស្នាក់ការកណ្តាល នៃទីភ្នាក់ងារប៉ូលីសស៊ើបអង្កេត ក្រោមនាយកដ្ឋានក្រុងហូជីមិញ ប្រទេសវៀតណាម ។
ក្នុងអំឡុងពេលសួរចម្លើយបឋម ជនសង្ស័យទាំង២ បានសារភាពចំពោះឃាតកម្មនេះដោយអះអាងថា ពួកគេបានធ្វើសកម្មភាព ក្រោមការណែនាំពីបុគ្គលម្នាក់ ដែលមានមូលដ្ឋាននៅក្រៅប្រទេស ។
បុរសទាំង២នាក់ បានចូលទីក្រុងហូជីមិញ តាមរយៈអាកាសយានដ្ឋានអន្តរជាតិតាន់សុនញ៉ាត នៅថ្ងៃទី១៤ ខែឧសភា ហើយបានចំណាយពេលជាច្រើនថ្ងៃ តាមដានសកម្មភាពរបស់ជនរងគ្រោះអូស្ត្រាលីទាំងពីរនាក់ ។
នៅយប់ថ្ងៃទី២១ ខែឧសភា ពួកគេបានបាញ់ប្រហារដោយកាំភ្លើង ចំនួន៣គ្រាប់ បន្ទាប់ពីជនរងគ្រោះ និងមិត្តភក្តិរបស់ពួកគេ បានញ៉ាំអាហារនៅភោជនីយដ្ឋាន Cee’f ក្នុងសង្កាត់ប៊ិនថាញ់ នៅទីក្រុងហូជីមិញ ។
ដោយផ្អែកលើភស្តុតាងដែលប្រមូលបាន មន្ត្រីប៉ូលិស សម្រេចឃុំខ្លួនជនជាតិសាម័រទាំង២នាក់ សម្រាប់ការស៊ើបអង្កេតបន្ថែម លើបទចោទប្រកាន់ករណីឃាតកម្ម ។
ប៉ូលិស ក៏បានសុំដីកាឃុំខ្លួនជនជាតិវៀតណាម០៨នាក់ផ្សេងទៀត ដែលសង្ស័យថា មិនបានរាយការណ៍អំពីករណីឃាតកម្ម និងជួយជនសង្ស័យទាំង២នាក់ អោយរត់គេចខ្លួន ៕
ចែករំលែកព័តមាននេះ