សង្គ្រាមអ៊ុយក្រែន ៖ រុស្ស៊ីបានធ្វើការគំរាមកំហែងថ្មីទៀត ពីការវាយប្រហារខ្លាំងក្លាថ្មីលើរដ្ឋធានីអ៊ុយក្រែន ក្រុងគៀវ បន្ទាប់ពីការវាយប្រហារខ្លាំងក្លាបំផុត កាលពីយប់ថ្ងៃទី២៣ មក ២៤ ឧសភា។ ក្រសួងការបរទេសរុស្ស៊ី នាថ្ងៃទី២៥ ឧសភា អំពាវនាវដល់បណ្ដាជនបរទេសដែលរស់នៅក្នុងក្រុងគៀវ និងបុគ្គលិកការទូតឲ្យចាកចេញពីរដ្ឋធានី អ៊ុយក្រែនមុនការវាយប្រហារថ្មីៗទៀតរបស់រុស្ស៊ី តែអ៊ុយក្រែនថា ចូរកំចុះញ៉មចំពោះការចាប់បង្ខំរបស់
រុស្ស៊ី ។
ការប្រកាសនោះ ធ្វើឡើងបន្ទាប់ពីការវាយប្រហារខ្លាំងក្លា ជាពិសេសរបស់រុស្ស៊ីលើអ៊ុយក្រែន កាលពីចុងសប្ដាហ៍មុននេះ ពិសេសលើក្រុងគៀវដែលបណ្ដាលឲ្យមនុស្សស្លាប់យ៉ាងតិច៤នាក់ និង១០០នាក់រងរបួស ។ រុស្ស៊ី រហូតដល់វាយប្រហារដោយមីស៊ីលល្បឿនលឿនជំនាន់ថ្មីមានសមត្ថភាពនុយក្លេអ៊ែរធុនORECHNIKលើក្រុងគៀវ ដែលជាលើកទី៣តាំងពីចាប់ផ្ដើមសង្គ្រាមមកទៀតផង ។ ការវាយប្រហារនោះ កើតមានបន្ទាប់ពីអ៊ុយក្រែនវាយប្រហារសាលាវិទ្យាល័យមួយក្នុងតំបន់រុស្ស៊ីកាន់កាប់ បណ្ដាលឲ្យមនុស្ស១៨នាក់ស្លាប់ ហើយលោកពូទីនសន្យាពីការតបតវិញ ។
ក្នុងសេចក្ដីប្រកាសមួយក្រសួងការបរទេសរុស្ស៊ីបានព្រមានថា ការវាយប្រហារថ្មីៗនឹងកើតមានប្រឆាំងបណ្ដាមជ្ឈមណ្ឌលចេញការសម្រេចចិត្ត និងបណ្ដាសហគ្រាសឧស្សាហកម្មយោធានៅក្រុងគៀវ។ យើងព្រមានដល់បណ្ដាជនបរទេស ក្នុងនោះរួមទាំងបណ្ដាបុគ្កលិកការទូតនិងបណ្ដាតំណាងអង្គការអន្តរជាតិពីភាពចាំបាច់នៃការចាកចេញដោយឆាប់រហ័សពីទីក្រុងនោះ។ ចំណែកពលរដ្ឋក្រុងគៀវចៀសវាងកុំទៅក្បែរបណ្ដាហេដ្ឋារចនាសម្ព័ន្ធយោធានិងរដ្ឋបាល ។
រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ នាថ្ងៃទី២៥ ឧសភា បានស្នើដល់សហរដ្ឋអាមេរិក ឲ្យជម្លៀសបុគ្គលិកការទូតនិងពលរដ្ឋខ្លួនចេញពីរដ្ឋធានីអ៊ុយក្រែន ពេលលោកជួបសន្ទនាតាមទូរស័ព្ទជាមួយសមភាគីអាមេរិកលោកម៉ាកូរ៉ូប៊ីយ៉ូ។ សេចក្ដីប្រកាសរបស់ក្រសួងការបរទេសរុស្ស៊ី ក៏ស្នើផងដែរដល់សហរដ្ឋអាមេរិក ព្រមទាំងដល់រដ្ឋដទៃៗទៀតដែលមានបេសកម្មការទូតប្រចាំក្រុងគៀវ ឲ្យធានាដល់ការជម្លៀសបុគ្គលិកការទូតនិងជនជាតិខ្លួនចេញពីរដ្ឋធានីអ៊ុយក្រែន ។
រដ្ឋមន្ត្រីការបរទេសអ៊ុយក្រែន លោកអានឌ្រីអ៉ីស៊ីប៊ីហ្គា បានអំពាវនាវដល់បណ្ដាដៃគូក្រុងគៀវ កុំឲ្យចុះញ៉មចំពោះការចាប់បង្ខំរបស់រុស្ស៊ី ហើយឲ្យផ្ដល់អាវុធថែមទៀតដល់អ៊ុយក្រែន ៕
ចែករំលែកព័តមាននេះ