ប្រទះឃើញជនបរទេ.សម្នាក់ដេកស្លា.ប់ដោយមានស្នាមរបួ.ស តាមចិញ្ចើមផ្លូវទួលពង្រ ជិតស្តុបឫស្សីផ្អែម
- ភ្នំពេញ
រាជធានីភ្នំពេញ៖ បុរសជាជនជាតិបរទេសម្នាក់ត្រូវបានប្រជាពលរដ្ឋប្រទះឃើញដេកស្លាប់នៅក្រោមធ្នើរលក់ដូរតាមចិញ្ចើមផ្លូវមួយកន្លែង ដោយមានស្នាមរបួសផងដែរ ប៉ុន្តែពុំទាន់ដឹងថា គាត់ស្លាប់ដោយឧប្បត្តិហេតុគ្រោះថ្នាក់ចរាចរណ៍ ឬក៏ជាអំពើឃាតកម្មនៅឡើយទេ ។
ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង៦ព្រឹកថ្ងៃទី២៦ ខែឧសភា ឆ្នាំ២០២៦ នៅតាមបណ្តោយផ្លូវបេតុងទួលពង្រ ត្រង់ចំណុចជិតភ្លើងស្តុបឫស្សីផ្អែមស្ថិតនៅក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ ។
បុរសរងគ្រោះរូបនោះពុំទាន់ត្រូវបានស្គាល់អត្តសញ្ញាណនោះទេ តាមការប៉ាន់ស្មានគាត់អាចមានអាយុចន្លោះពី៥០ទៅ៦០ឆ្នាំ ស្លៀកខោជើងខ្លីពណ៍ខ្មៅ ពាក់អាវយឺតដៃខ្លីពណ៍ស ហើយក៏មិនទាន់ដឹងថាជាជនជាតិអ្វីដែរ ។ ដោយឡែកនៅលើខ្លួនប្រាណ មានស្នាមរបួស ហើយក្បាលនិងផ្ទៃមុខ ព្រមទាំងដៃប្រឡាក់ទៅដោយឈាម រីឯជើងស្ដាំរបស់គាត់បានបាក់ចេញឆ្អឹថែមទៀតផង ។
ប្រជាពលរដ្ឋរស់នៅជិតកន្លែងកើតហេតុនោះបាននិយាយថា ពួកគាត់មិនបានដឹង ឬបានឃើញថាបុរសជាជនជាតិបរទេសខាងលើនេះមានរឿងអ្វី និងស្លាប់តាំងពីពេលណានោះទេ ។ នៅវេលាព្រឹកថ្ងៃកើតហេតុ មានបុរសម្នាក់ក្រោកពីដេកបើកទ្វារដើរចេញពីផ្ទះបានបន្តិច ក៏ស្រាប់តែប្រទះឃើញសាកសពជនបរទេសនោះដេកស្លាប់នៅត្រង់ចំណុចខាងលើបាត់ទៅហើយ ។ ខណៈនោះបុរសដែលជាអ្នកប្រទះឃើញសពបានស្រែកប្រាប់អ្នកជិតខាង បង្កឲ្យមានការភ្ញាក់ផ្អើលទាំងព្រឹក និងនាំគ្នាទៅចោមរោមមើល រួចបានរាយការណ៍ជូននគរបាលខណ្ឌដង្កោ និងកម្លាំងប៉ុស្តិ៍នគរបាលរដ្ឋានព្រៃសឲ្យចុះទៅមើលភ្លាមៗតែម្ដង ។
ក្រោយពេលទទួលបានដំណឹងនេះ កម្លាំងនគរបាលខណ្ឌដង្កោ និងកម្លាំងប៉ុស្តិ៍នគរបាលរដ្ឋបាលព្រៃសបានចុះទៅកាន់ទីតាំងកើតហេតុ និងបានចងខ្សែហ៊ុមព័ទ្ធទីនោះបណ្ដោះអាសន្នរង់ចាំកម្លាំងនគរបាលការិយាល័យបច្ចេកទេសនិងវិទ្យាសាស្ត្រ នៃស្នងការដ្ឋានរាជធានីភ្នំពេញចុះទៅពិនិត្យកោសល្យវិច័យ ។ ពេលនេះនគរបាលខាងលើកំពុងធ្វើការស្រាវជ្រាវរកមូលហេតុនៃការស្លាប់របស់ជនជាតិបរទេសនេះ និងស្វែងរកសាច់ញាតិរបស់គាត់ ដើម្បីនាំយកសពទៅធ្វើបុណ្យតាមប្រពៃណី ៕
ចែករំលែកព័តមាននេះ