សហរដ្ឋអាមេរិក ៖ ជនសង្ស័យម្នាក់ត្រូវបានបាញ់សម្លាប់ដោយភ្នាក់ងារសម្ងាត់អាមេរិក (Secret Service) បន្ទាប់ពីបុរសរូបនោះបានដកកាំភ្លើងចេញពីកាបូប ហើយបើកការបាញ់ប្រហារទៅលើក្រុមភ្នាក់ងារនៅក្បែរប៉ុស្តិ៍ត្រួតពិនិត្យសន្តិសុខនៃសេតវិមាន (White House) តែម្តង។…
សហរដ្ឋអាមេរិក ៖ ជនសង្ស័យម្នាក់ត្រូវបានបាញ់សម្លាប់ដោយភ្នាក់ងារសម្ងាត់អាមេរិក (Secret Service) បន្ទាប់ពីបុរសរូបនោះបានដកកាំភ្លើងចេញពីកាបូប ហើយបើកការបាញ់ប្រហារទៅលើក្រុមភ្នាក់ងារនៅក្បែរប៉ុស្តិ៍ត្រួតពិនិត្យសន្តិសុខនៃសេតវិមាន (White House) តែម្តង។ នេះបើយោងតាមប្រភពពី BBC, CNN, CBS News, Reuters រួមទាំងប្រភពផ្សេងទៀតបានចេញផ្សាយ។
ហេតុការណ៍នេះ បានកើតឡើងនៅល្ងាចថ្ងៃទី២៣ ឧសភា ឆ្នាំ២០២៦ (ម៉ោងនៅសហរដ្ឋអាមេរិក) ត្រង់ចំណុចផ្លូវលេខ ១៧ និងផ្លូវផេនស៊ីលវីញ៉ា (Pennsylvania Avenue) ដែលតភ្ជាប់រវាងវិមានកាពីតូល (U.S. Capitol) និងសេតវិមាន (White House) ក្នុងទីក្រុងវ៉ាស៊ីនតោន ឌីស៊ី (Washington DC)។
ជនសង្ស័យត្រូវបានកំណត់អត្តសញ្ញាណមានឈ្មោះ Nasire Best អាយុ២១ឆ្នាំ ហើយ ធ្លាប់មានប្រវត្តិព្យាយាមចូលបរិវេណសេតវិមានដោយខុសច្បាប់ចំនួន២ដង កាលពីឆ្នាំ២០២៥ និងជាមនុស្សមានបញ្ហាសុខភាពផ្លូវចិត្តផងដែរ។
របាយការណ៍ក្នុងស្រុកបានឱ្យដឹងថា បន្ទាប់ពីជនសង្ស័យបានបើកការបាញ់ប្រហារនោះ ភ្នាក់ងារសម្ងាត់បានបាញ់តបតវិញភ្លាមៗ បណ្តាលឱ្យជនសង្ស័យរងរបួសធ្ងន់ និងស្លាប់បាត់បង់ជីវិតក្រោយពេលបញ្ជូនទៅដល់មន្ទីរពេទ្យ។ មិនមានភ្នាក់ងារសម្ងាត់ណាម្នាក់រងរបួសឡើយ ប៉ុន្តែមានអ្នកដំណើរឆ្លងកាត់ម្នាក់ បានរងរបួសនៅក្នុងការបាញ់ប្រហារនេះ ហើយកំពុងស្ថិតនៅមន្ទីរពេទ្យ។
ការបាញ់ប្រហារនេះកើតឡើង ខណៈដែលលោកប្រធានាធិបតី ដូណាល់ ត្រាំ (Donald Trump) កំពុងស្ថិតនៅក្នុងសេតវិមាន ប៉ុន្តែមិនមានផលរំខានណាមួយឡើយ។ ទោះជាយ៉ាងណាក៏ដោយ សេតវិមានត្រូវបានបិទខ្ទប់រយៈពេលខ្លីប្រមាណ៤០នាទី មុនពេលស្ថានភាពត្រូវបានគ្រប់គ្រងទាំងស្រុង។
បច្ចុប្បន្ន ទីភ្នាក់ងារស៊ើបអង្កេតសហព័ន្ធ (FBI) រួមជាមួយប៉ូលិសតំបន់ កំពុងសហការគ្នាដើម្បីស៊ើបអង្កេតបន្ថែមទៅលើមូលហេតុ និងការជម្រុញជនសង្ស័យនៅពីក្រោយការវាយប្រហារនេះ៕
ចែករំលែកព័តមាននេះ