បង្ក្រាបទីតាំងឆបោកតាមអនឡាញ ១កន្លែង នៅខេត្តប៉ៃលិន ឃាត់ខ្លួនជនបរទេស១៧នាក់
ខេត្តប៉ៃលិន ៖ ថ្ងៃទី២៣ ខែឧសភា ឆ្នាំ២០២៦ ដោយអនុវត្តយ៉ាងហ្មឺងម៉ាត់តាមបទបញ្ជារបស់រាជរដ្ឋាភិបាលកម្ពុជា លោកជំទាវ បាន ស្រីមុំ អភិបាល…
ខេត្តប៉ៃលិន ៖ ថ្ងៃទី២៣ ខែឧសភា ឆ្នាំ២០២៦ ដោយអនុវត្តយ៉ាងហ្មឺងម៉ាត់តាមបទបញ្ជារបស់រាជរដ្ឋាភិបាលកម្ពុជា លោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន និងជាប្រធានគណៈបញ្ជាការឯកភាពខេត្ត បានដឹកនាំសមត្ថកិច្ចចម្រុះ សហការជាមួយព្រះរាជអាជ្ញាអមសាលាដំបូងខេត្ត បន្តចុះធ្វើរដ្ឋបាលត្រួតពិនិត្យ នៅតាម ផ្ទះជួល សណ្ឋាគារ ផ្ទះសំណាក់ និងរីសត ដែលសង្ស័យមានការលួច បង្កប់ បទល្មើស បច្ចេកវិទ្យា (Online Scams) និងធ្វើការបង្ក្រាប ១ទីតាំង និងរឹបអូសសម្ភារជាច្រើន សម្រាប់ធ្វើសកម្មភាព ដែលលាក់ទុកក្នុងបន្ទប់ជួល ១ទីតាំង ព្រមទាំងបានឃាត់ខ្លួនជនបរទេសចំនួន ១៧នាក់ ស្នាក់នៅជិតទីតាំង ដើម្បីត្រួតពិនិត្យឯកសារ និងកសាងសំណុំរឿងទៅតាមនិតិវិធីច្បាប់ ។
សមត្ថកិច្ចចម្រុះ បន្តយុទ្ធនាការ ចុះត្រួតពិនិត្យរដ្ឋបាល នៅតាមទីតាំងស្នាក់នៅប្រមូលផ្តុំ និងការដាក់ប៉ុស្តិ៍ត្រួត ពិនិត្យនៅតាមដងផ្លូវជាតិ សំខាន់ៗក្នុងខេត្ត ក្នុងគោលបំណង រឹតបន្តឹង នៃការអនុវត្តរបបសន្តិសុខសង្គម និង សណ្តាប់ ធ្នាប់សាធារណៈ នៅក្នុងខេត្ត ទាំងមូល ស្របតាមវិធានការចាំបាច់របស់រាជរដ្ឋាភិបាល ដោយត្រូវយកចិត្តទុកដាក់ខ្ពស់លើការងារគ្រប់គ្រងសុវត្ថិភាព តាមរយៈការលួចចូលមករស់នៅដោយខុសច្បាប់ នៅតាមទីតាំងរស់នៅប្រមូលផ្តុំ របស់ជនបរទេស តាមសណ្ឋាគារ ផ្ទះសំណាក់ រីសត ផ្ទះជួល និងទីតាំងកាស៊ីណូ ដើម្បីទប់ស្កាត់ និងបង្ក្រាប សកម្មភាព ជួញដូរមនុស្ស ជាពិសេសបទល្មើសបច្ចេកវិទ្យា (Online Scams) ឱ្យមានប្រសិទ្ធភាពខ្ពស់ ៕
ចែករំលែកព័តមាននេះ