ទីក្រុងដាកា៖ ជំងឺកញ្ជ្រឹលកំពុងតែវាយលុកខ្លាំងនៅប្រទេសបង់ក្លាដែស និងសម្លាប់កុមារតូចៗជាង៥០០នាក់។ នេះបើយោងតាមរបាយការណ៍របស់រដ្ឋាភិបាលចេញផ្សាយនៅថ្ងៃនេះ។ ដូច្នេះវាជាការផ្ដាច់ផ្ដិលជីវិតដោយសារកញ្ជ្រឹលដ៏ច្រើនមិនធ្លាប់មាននៅក្នុងប្រទេសបង់ក្លាដែសនារយៈពេលជាច្រើនទសវត្សចុងក្រោយ។ មន្ទីរពេទ្យនានានៅរដ្ឋធានីដាកាត្រូវចង្អៀតពេញប៊ឹបដោយកុមារកើតកញ្ជ្រឹល និងប៉ាម៉ាក់របស់ពួកគេដែលនាំកូនទៅមើលជំងឺ។
ចំនួនកុមារដែលស្លាប់ចេះតែកើនឡើងឥតឈប់ឈរ។ ត្រឹមតែរយៈពេល២៤ម៉ោងចុងក្រោយនេះ កុមារ១៣នាក់បានស្លាប់។ ដូច្នេះ ចំនួនកុមារស្លាប់សរុបកើនឡើងដល់៥១២នាក់។ នេះបើយោងតាមតួលេខរបស់នាយកដ្ឋានសុខាភិបាលដែលបូកសរុបចំនួនចាប់តាំងពីថ្ងៃទី១៥ ខែមីនា។ ប្រទេសនៅអាស៊ីខាងត្បូងមួយនេះបានដាក់ចេញកម្មវិធីផ្ដល់វ៉ាក់សាំងជាទូទៅដើម្បីចាត់ការជំងឺនេះ។ ចំណែកអង្គការយូនីសែហ្វក៏បានជួយជ្រោមជ្រែងលើបញ្ហានេះផងដែរ។ ប្រធានយូនីសែហ្វប្រចាំប្រទេសបង់ក្លាដែសថ្លែងថារហូតមកដល់ពេលនេះកុមារ១៨លាននាក់បានទទួលវ៉ាក់សាំងរួចហើយ។
ប៉ុន្តែនាយកដ្ឋានសុខាភិបាលអះអាងថាការចាក់វ៉ាក់សាំងនេះត្រូវការពេលជាច្រើនខែទម្រាំជ្រួតជ្រាបសព្វទីកន្លែង។ យូនីសែហ្វថ្លែងថាការផ្ដល់វ៉ាក់សាំងមានភាពខ្វះចន្លោះដោយសារមានអំពើបះបោរពីសំណាក់យុវជនដើម្បីផ្ដួលរំលំលោកស្រីហាស៊ីណាពីតំណែងកាលពីឆ្នាំ២០២៤។ ហេតុនេះ កុមារមិនតិចនាក់ទេដែលមិនបានទទួលវ៉ាក់សាំង។ កញ្ជ្រឹលជាជំងឺរាតត្បាតយ៉ាងឆាប់រហ័ស។ វាឆ្លងតាមរយៈការក្អក ឬកណ្ដាស់ ហើយគ្មានថ្នាំព្យាបាលនោះទេនៅពេលឆ្លងជំងឺនេះ។
បញ្ហាប្រឈមមានដូចជាហើមខួរក្បាល និងពិបាកដកដង្ហើម។ ជំងឺនេះអាចកើតមានចំពោះមនុស្សគ្រប់វ័យ។ ប៉ុន្តែអ្នកដែលរងគ្រោះខ្លាំងជាងគេគឺកុមារតូចៗ។ បុគ្គលិកសុខាភិបាលឱ្យដឹងថាកុមារដែលរងគ្រោះខ្លាំងជាងគេគឺកុមារខ្វះអាហារូបត្ថម្ភ និងកុមារដែលមកពីគ្រួសារមានប្រាក់ចំណូលទាប។ គ្រួសារខ្លះភ្លេចទាំងនាំកូនទៅទទួលវ៉ាក់សាំង ឬទទួលវ៉ាក់សាំងហើយក៏មិនសូវមានប្រសិទ្ធភាពដោយសារកង្វះជីវជាតិបំប៉នរាងកាយ៕ ប្រភព៖ Channel News Asia
ចែករំលែកព័តមាននេះ