អភិបាលខេត្តកំពង់ចាម ៖ «គិតត្រឹមពាក់កណ្តាលខែនេះ ជំងឺគ្រុនឈា.មចំនួន ១៥៣០ករណី មានការកើនឡើងគួរឱ្យព្រួយបារម្ភ»
- កំពង់ចាម
ខេត្តកំពង់ចាម ៖ «គិតរហូតមកដល់ពាក់កណ្ដាលខែកក្កដាគឺមានអ្នកជំងឺចំនួន១៥៣០ករណីត្រូវបានសង្ស័យមានជំងឺគ្រុនឈាម ក្នុងនោះបណ្ដាលឲ្យស្លាប់ចំនួន៤ករណី” ។នេះជាប្រសាសន៍លើកឡើងរបស់ឯកឧត្តមអ៊ុន ចាន់ដាអភិបាលខេត្ត នៅក្នុងឱកាសពិធីបើកយុទ្ធនាការប្រយុទ្ធជម្ងឺគ្រុនឈាមក្រោមប្រធានបទ”គ្មានដង្កូវទឹក គ្មានមូសខ្លាជំងឺគ្រុនឈាម» ដោយធ្វើឡើងនៅបរិវេណសាលាស្រុកចំការលើ នាព្រឹកថ្ងៃទី១៦កក្កដា ឆ្នាំ២០២៦ ដែលមានអ្នកចូលរួមចំនួនជាង៥០០នាក់។
លោកវេជ្ជបណ្ឌិតវ៉ា សាវុធ ប្រធានមន្ទីរសុខាភិបាលខេត្តបានលើកឡើងថា តំបន់ដែលបានរាយការណ៍ករណីកើតច្រើនគួរឲ្យកត់សម្គាល់រួមមាន: ស្រុកស្រីសន្ធរជាពិសេសឃុំមានជ័យនិងឃុំបារាយណ៍ ក្នុងអំឡុងខែមិថុនានិងកក្កដា។ស្ថានភាពនេះទាមទារឲ្យអាជ្ញាធរមន្ត្រីសុខាភិបាលនិងសហគមន៍នៅក្នុងតំបន់ពាក់ព័ន្ធបង្កើនការតាមដានការអប់រំសុខភាពការលុបលំបាត់ជម្រកមូសនិងបញ្ជូនអ្នកជំងឺមកព្យាបាលឲ្យបានឆាប់រហ័ស។ ជំងឺគ្រុនឈាមបានចាប់ផ្ដើមកើនឡើងចាប់ពីសប្តាហ៍ទី១៧ និងបន្តកើនឡើងដល់សប្តាហ៍ទី២៨។
ការកើនឡើងនេះ កើតឡើងស្របពេលរដូវវស្សាដែលបង្កើតទីតាំងដក់ទឹកកាន់តែច្រើននិងអំណោយផលការកកើតដង្កូវទឹកនិងការកើនឡើងនៃមូសខ្លាញីដែលជាភ្នាក់ងារចំលងជំងឺគ្រុនឈាម។
លោកបណ្ឌិតលាង ឬទ្ធា តំណាងមជ្ឈមណ្ឌលជាតិប្រយុទ្ធនិងជំងឺគ្រុនចាញ់ បារ៉ាស៊ីតសាស្ត្រនិងបាណកសាស្ត្រ បានលើកឡើងថា ជំងឺគ្រុនឈាមនៅកម្ពុជាកំពុងមាននិន្នាការកើនឡើងក្នុងរដូវវស្សាឆ្នាំ២០២៦ គិតត្រឹមសប្តាហ៍ទី២៧មានករណីសរុបចំនួនប្រហែល២ម៉ឺនករណី និងករណីធ្ងន់ធ្ងរមួយចំនួន ដែលចំនួននេះប្រហាក់ប្រហែលនិងឆ្នាំមុន។
ការកើនឡើងនៃជំងឺគ្រុនឈាមពាក់ព័ន្ធនិងទឹកភ្លៀងធ្លាក់ ទឹកដក់ ការកើនឡើងសីតុណ្ហភាព កំណើនទឹកភ្លៀង ដែលធ្វើឲ្យមានវត្ថុដក់ទឹក ដែលជាជម្រកដង្កូវទឹកកើនឡើង។ ជាការឆ្លើយតបនិងការកើនឡើងចំនួនមូសខ្លា សូមអំពាវនាវដល់ប្រជាពលរដ្ឋគ្រប់រូប ត្រូវចូលរួមលុបបំបាត់វត្ថុដក់ទឹក។និងជុំវិញផ្ទះគ្របនិងសំអាតពាង អាងនិងធុងស្តុកទឹកត្រូវដាក់ថ្នាំអាបែត ត្រូវគ្រប់គ្រងសំបកកង់កំប៉ុង ដប ផើងនិងសម្ភារៈដែលអាចដក់ទឹក។
ឯកឧត្តមអ៊ុន ចាន់ដា អភិបាលខេត្តមានប្រសាសន៍គូសបញ្ជាក់ថា គិតត្រឹមពាក់កណ្ដាលខែកក្កដា ឆ្នាំ២០២៦ ជំងឺគ្រុនឈាម ត្រូវបានរកឃើញមានចំនួន១៥៣០ ករណី ក្នុងរយៈពេលដូចគ្នាឆ្នាំ២០២៥កន្លងទៅ ឃើញថាមានការកើនឡើង៧២៣ ករណីស្មើ៨៩,៦% នេះជាការរីករាលដាលគួរឲ្យព្រួយបារម្ភនិងភ័យខ្លាច បណ្ដាលឱ្យមានអ្នកស្លាប់ចំនួន៤នាក់។ដូច្នេះត្រូវតែចូលរួមទាំងអស់គ្នា ដើម្បីទប់ស្កាត់បង្ការឲ្យបានទាន់ពេលវេលាកុំឲ្យមានការរីករាលដាលនៃជម្ងឺ។ អាជ្ញាធរសូមក្រើនរំលឹកធ្វើយ៉ាងណាគេងនៅក្នុងមុងដែលជ្រលក់ថ្នាំ កុំឱ្យមានប្រភពទឹកកខ្វក់នៅជិតផ្ទះរបស់យើង។
តាមរយៈលោកមេភូមិ មេឃុំ ពេលដែលត្រឡប់ទៅកាន់មូលដ្ឋានវិញត្រូវបន្តយកចិត្តទុកដាក់ខិតខំផ្សព្វផ្សាយនិងបាញ់ថ្នាំសម្លាប់មូស ចាក់មេក្រូដើម្បីឲ្យពលរដ្ឋយល់ដឹងជ្រួតជ្រាបពីពិធីការពារកុំឲ្យឆ្លងជំងឺគ្រុនឈាមនៅក្នុងសហគមន៍និងធានាបាននូវសុវត្ថិភាព៕
ចែករំលែកព័តមាននេះ