ខេត្តមណ្ឌលគិរី ៖ ទោះជាត្រូវឆ្លងកាត់ផ្លូវលំបាកយ៉ាងណាក៏ដោយ កម្លាំងមន្ត្រីឧទ្យានុរក្ស និងភ្នាក់ងារសហគមន៍ នៅតែបន្តយុទ្ធនាការចុះល្បាតយ៉ាងសស្រាក់សស្រាំ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ នៅក្នុងភូមិសាស្ត្រការពារ ។ជាក់ស្តែង…
ខេត្តមណ្ឌលគិរី ៖ ទោះជាត្រូវឆ្លងកាត់ផ្លូវលំបាកយ៉ាងណាក៏ដោយ កម្លាំងមន្ត្រីឧទ្យានុរក្ស និងភ្នាក់ងារសហគមន៍ នៅតែបន្តយុទ្ធនាការចុះល្បាតយ៉ាងសស្រាក់សស្រាំ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ នៅក្នុងភូមិសាស្ត្រការពារ ។
ជាក់ស្តែង នៅថ្ងៃទី១៧ ខែឧសភា ឆ្នាំ២០២៦ លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី បានដឹកនាំបញ្ជាផ្ទាល់ ដោយមានការចូលរួមពីមន្ត្រីការិយាល័យដែនជម្រកសត្វព្រៃស្រែពក ភ្នំណាមលៀរ ដែនជម្រកសត្វព្រៃកែវសីមា ព្រមទាំងភ្នាក់ងារល្បាតសហគមន៍ បានរួមគ្នាចុះបំពេញបេសកកម្មល្បាតយ៉ាងសកម្ម នៅចំណុចអូរអង្កាល់ ស្ថិតក្នុងភូមិឡាំម៉េះ ឃុំប៊ូស្រា ស្រុកពេជ្រាដា ខេត្តមណ្ឌលគិរី ។
នៅក្នុងប្រតិបត្តិការចុះរុករកនេះ ក្រុមការងារជំនាញបានប្រទះឃើញសកម្មភាពល្មើសច្បាប់មួយកន្លែង ដែលត្រូវជនមិនស្គាល់មុខលួចលាក់កាប់រំលំឈើប្រភេទ «ឈើទាល» រួចអារជ្រៀកធ្វើជាក្តារជញ្ជាំងផ្ទះ បានចំនួន ១២០សន្លឹក (មានខ្នាតមុខកាត់ ០.២០ម៉ែត្រ គុណ ៣.៥ម៉ែត្រ គុណ ៣.៥ម៉ែត្រ) នៅត្រង់ចំណុចមាត់អូរ ដែលជាតំបន់ដាច់ស្រយាល និងមានផ្លូវធ្វើដំណើរលំបាកខ្លាំង ។
លោក ហាស់ វិបុល បានឲ្យដឹងថា បន្ទាប់ពីបានពិនិត្យ និងរុករកជុំវិញបរិវេណទីតាំងកើតហេតុ ក្រុមការងារបានរកឃើញ និងធ្វើការរាប់គល់ឈើទាលដែលរងការកាប់បំផ្លាញ មានចំនួនរហូតដល់ ១៩គល់ ដែលសុទ្ធសឹងតែជាឈើមានអាយុកាលច្រើនឆ្នាំ ដោយមានមុខកាត់ធំៗចាប់ពី ៥០សង់ទីម៉ែត្រ ទៅដល់ ១០០សង់ទីម៉ែត្រ (១ម៉ែត្រ)។ នៅក្នុងពេលកំពុងអនុវត្តប្រតិបត្តិការនោះ ក្រុមកម្លាំងជំនាញពុំបានជួបប្រទះ ឬឃាត់ខ្លួនជនសង្ស័យឡើយ ដោយពួកគេបានដឹងខ្លួន និងរត់គេចខ្លួនបាត់មុនពេលសមត្ថកិច្ចទៅដល់។ក្រុមកម្លាំងល្បាតចម្រុះបានធ្វើការរុះរើ និងកម្ទេចចោលនូវរោងស្នាក់នៅខុសច្បាប់របស់ក្រុមជនល្មើសចំនួន ០១ទីតាំង ដែលពួកគេបានសង់ឡើងសម្រាប់ជ្រកកោនធ្វើសកម្មភាពអារឈើ។ ចំពោះវត្ថុតាងក្តារជញ្ជាំងឈើទាលទាំងអស់ ត្រូវបានមន្ត្រីជំនាញដកហូត និងចាត់ការបន្តទៅតាមនីតិវិធីច្បាប់៕
ចែករំលែកព័តមាននេះ