រាជធានីភ្នំពេញ ៖ លោកដុកទ័រម្នាក់ ផ្នែកវះកាត់ នៃមន្ទីរពេទ្យព្រះកុសុមៈ ដោយសារតែជាប់រវល់វះកាត់សង្គ្រោះអ្នកជំងឺ លោកអត់បានដេកពេញ១យប់ ខណៈពេលគាត់បើករថយន្ត ១គ្រឿង ម៉ាកBYD…
រាជធានីភ្នំពេញ ៖ លោកដុកទ័រម្នាក់ ផ្នែកវះកាត់ នៃមន្ទីរពេទ្យព្រះកុសុមៈ ដោយសារតែជាប់រវល់វះកាត់សង្គ្រោះអ្នកជំងឺ លោកអត់បានដេកពេញ១យប់ ខណៈពេលគាត់បើករថយន្ត ១គ្រឿង ម៉ាកBYD ទៅផ្ទះងងុយដេកខ្លាំងពេក ក៏ងោក១ភាំង។ ពេលនោះ ក៏រេ ចង្កូតជ្រុលទៅបុកក្បាលរបាំពុះចែកបុកទ្រូងផ្លូវពេញទំហឹង បណ្ដាលឲ្យរថយន្តរបស់គាត់រងការខូចខាតខ្ទេចមុខយ៉ាងដំណំ នេះបើតាមការអះអាងប្រាប់ឲ្យដឹងពីសំណាក់លោកឪពុករបស់លោកដុកទ័ររូបនោះ ដែលបានទៅកាន់កន្លែងកើតហេតុខាងលើ ។
ឧប្បត្តិហេតុនោះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី១៨ ខែឧសភា ឆ្នាំ២០២៦ នៅតាមមហាវិថីសហព័ន្ធរុស្ស៊ី ស្ថិតនៅខាងលិចអតីតអាកាសយានដ្ឋានអន្តរជាតិភ្នំពេញ ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
លោកដុកទ័ររូបនោះ មិនត្រូវបានស្គាល់អត្តសញ្ញាណនោះទេ នៅមុនពេលកើតហេតុ គាត់បានបើកបររថយន្ត ១គ្រឿង ម៉ាក BYD ពណ៍ស ពាក់ស្លាកលេខកម្ពុជា RDR. 3699 ។ ធ្វើដំណើរក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ ស្រាប់តែរេ ចង្កូតជ្រុលទៅបុកក្បាលរបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តខ្ទេចមុខយ៉ាងដំណំ។ ដោយឡែកក្បាលរបាំថ្មនោះ ខូចខាតបន្តិចបន្តួចប៉ុណ្ណោះ ហើយគាត់មិនបានរងរបួសទេ បន្ទាប់មកក៏បានទុករថយន្តចោល រួចបានចាកចេញទៅបាត់ និងបានប្រាប់ឲ្យឪពុករបស់គាត់ទៅកាន់កន្លែងកើតហេតុមើលរថយន្ត ។
បើតាមបុរស ដែលជាឪពុករបស់លោកដុកទ័ររូបនោះបាននិយាយថា កូនប្រុសគាត់គឺជាដុកទ័រ ផ្នែកវះកាត់នៅមន្ទីរពេទ្យព្រះកុសុមៈ (ពេទ្យលោកសង្ឃ) ដោយឡែក ពេញ១យប់ថ្ងៃទី១៧ ខែឧសភា កូនប្រុសគាត់(ដុកទ័រ)បានវះកាត់ជួយសង្គ្រោះអ្នកជំងឺ មិនបានដេកនោះទេ ជាហេតុងងុយដេកខ្លាំង។ លុះដល់វេលារសៀលថ្ងៃកើតហេតុ ទើបបើករថយន្ត ១គ្រឿងខាងលើ ត្រលប់ទៅផ្ទះនៅតាមផ្លូវលេខជាតិ៥១ ទាំងងងុយដេក ប៉ុន្តែបុរសនោះ ពុំបានបញ្ជាក់ថា ផ្ទះគាត់ស្ថិតនៅក្នុងស្រុកអង្គស្នួល ខេត្តកណ្ដាល ឬនៅក្នុងស្រុកសំរោងទង ខេត្តកំពង់ស្ពឺនោះទេ ។ ខណៈពេលទៅដល់ត្រង់ចំណុចកើតហេតុ កូនប្រុសគាត់ ក៏បានងោក ១ភាំង ហើយក៏បានរេ ចង្កូតរថយន្តជួបគ្រោះថ្នាក់បុកទ្រូងផ្លូវបែបនេះតែម្ដង ។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅទី៣ និងនគរបាលចរាចរណ៍ខណ្ឌពោធិ៍សែនជ័យ បានចុះទៅកាន់ទីនោះ រួចរាយការណ៍ជូននគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ឲ្យចុះទៅស្ទូចនាំយករថយន្តខាងលើទៅរក្សាទុក រង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ