ទីក្រុងប៉េកាំង៖ គ្រោះរញ្ជួយដីកម្រិត៥,២រ៉ិចទ័របានវាយប្រហារខេត្តក្វាងស៊ីនៃប្រទេសចិនភាគខាងត្បូងកាលពីព្រឹកមិញបណ្ដាលឱ្យស្លាប់មនុស្ស២នាក់ និងធ្វើឱ្យអគារជាច្រើនបាក់រលំ។ មនុស្សរាប់ពាន់នាក់ត្រូវបង្ខំចិត្តជម្លៀសខ្លួនចេញពីលំនៅដ្ឋានរបស់ខ្លួនជាបន្ទាន់។ នេះបើយោងតាមការផ្សាយរបស់សារព័ត៌មានរបស់រដ្ឋ។ ទីភ្នាក់ងារព័ត៌មានស៊ីនហួផ្សាយថាគ្រោះរញ្ជួយដីនេះវាយប្រហារទីក្រុងលាវចូវ ខេត្តក្វាងស៊ីនៅវេលាម៉ោង១២:២១រំលងអធ្រាត្រ។ ក្រៅពីមនុស្សស្លាប់២នាក់ មនុស្សម្នាក់បាត់ខ្លួននៅឡើយ។
ទូរទស្សន៍ស៊ីស៊ីធីវីបានកំណត់អត្តសញ្ញាណជនរងគ្រោះជាប្ដីប្រពន្ធនឹងគ្នា ប្ដីអាយុ៦៣ឆ្នាំ រីឯប្រពន្ធអាយុ៥៣ឆ្នាំ។ ទូរទស្សន៍នេះផ្សាយបន្តទៀតថាក្រុមការងារខាងស្វែងរក និងជួយសង្គ្រោះនៅតែបន្តការងាររបស់ខ្លួនដើម្បីស្វែងរកអ្នកបាត់ខ្លួន។ យោងតាមស៊ីស៊ីធីវី អគារ១៣ខ្នងបានបាក់រលំដោយសារការរញ្ជួយដីនេះ។ ប្រជាជនជាង៧ពាន់នាក់ត្រូវបានអាជ្ញាធរជម្លៀសខ្លួនទៅរកកន្លែងសុវត្ថិភាព។
តាមរយៈវីឌីអូដែលផ្សព្វផ្សាយដោយស៊ីស៊ីធីវី គេឃើញប្រជាជនរត់ប្រញាយចេញពីអគារខ្ពស់ៗក្រោយការរញ្ជួយ។ ទូរទស្សន៍ក៏បង្ហាញរូបគំនរបេតុងបាក់បែកខាងក្រៅផ្ទះដែលបានបាក់រលំ។ គេឃើញបុគ្គលិកផ្នែកជួយសង្គ្រោះដើរកាត់គំនរបាក់បែក និងឃើញសត្វសុនខជាច្រើនក្បាលក៏ខំដើរកាត់ទីនោះដែរដើម្បីស្វែងរកអ្នកដែលអាចនៅរស់រានមានជីវិត។ ភ្នាក់ងារផ្នែកសង្គ្រោះបន្ទាន់ក៏ប្រើប្រាស់គ្រឿងចក្រដើម្បីរើកកាយបេតុងផងដែរ។
កិច្ចខិតខំប្រឹងប្រែងក្នុងការជួយសង្គ្រោះនៅតែបន្តធ្វើដូចភ្លៀងរលឹម។ អាជ្ញាធរចិនបន្តការងារជួយសង្គ្រោះរបស់ខ្លួនក្រោយហេតុការណ៍រញ្ជួយដីនេះ។ គេបានចាត់ក្រុមការងារជាពួកៗដើម្បីបំពេញការងារនៅកន្លែងបាក់បែក និងដាក់ចេញវិធានការជម្លៀសមនុស្សរស់នៅក្នុងតំបន់នោះ។ រហូតមកដល់ពេលនេះទៅហើយ គេនៅតែមិនទាន់រកឃើញអ្នកបាត់ខ្លួនទៀត។ នេះបើយោងតាមទីភ្នាក់ងារព័ត៌មានស៊ីនហួ។ ចំណែកទូរទស្សន៍ស៊ីស៊ីធីវីផ្សាយថាសកម្មភាពជួយសង្គ្រោះនៅតែបន្តធ្វើ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ