ក្រសួងព័ត៌មានបើកយុទ្ធនាការ «និយាយថាទេចំពោះព័ត៌មានក្លែងក្លាយជំហានទី២»
- ភ្នំពេញ
រាជធានីភ្នំពេញ ៖ ក្រសួងព័ត៌មានបានបើកយុទ្ធនាការ «និយាយថាទេ ចំពោះព័ត៌មានក្លែងក្លាយជំហានទី២ (Say No to Fake News)»…
រាជធានីភ្នំពេញ ៖ ក្រសួងព័ត៌មានបានបើកយុទ្ធនាការ «និយាយថាទេ ចំពោះព័ត៌មានក្លែងក្លាយជំហានទី២ (Say No to Fake News)» នៅវិទ្យាល័យ ហ៊ុន សែន ប៊ុន រ៉ានី វត្តភ្នំ ដែលជាយុទ្ធនាការដ៏មានសារៈសំខាន់បំផុត ខណៈពេលបច្ចុប្បន្ននេះ ប្រជាជនកម្ពុជា រួមទាំងប្អូនៗសិស្សានុ សិស្សបានប្រើប្រាស់ទូរសព្ទច្រើន ហើយក៏អាចនឹងងាយរងគ្រោះដោយសារព័ត៌មានក្លែងក្លាយផងដែរ។
ថ្លែងក្នុងពិធីបើក នាព្រឹកថ្ងៃទី១៨ ខែឧសភា ឆ្នាំ២០២៦ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងយុទ្ធនាការនិយាយថាទេចំពោះព័ត៌មានក្លែងក្លាយ ដែលមានការចូលរួមពីសិស្សានុសិស្សនៃវិទ្យាល័យ ហ៊ុន សែន ប៊ុន រ៉ានី វត្តភ្នំ ជាង២៥០០នាក់យ៉ាងដូច្នេះថា ជាការពិតព័ត៌មានក្លែងក្លាយបានផ្តល់ផលអវិជ្ជមានដល់សង្គមជាតិ ដែលចាំបាច់យើងត្រូវតែចូលរួមក្នុងការទប់ស្កាត់វា។
បើតាមឯកឧត្តមរដ្ឋមន្ត្រី ដើម្បីប្រឆាំងនឹងព័ត៌មានក្លែងក្លាយ ទី១-ត្រូវមានដែលមានប្រភពច្បាស់លាស់ ទី២-ត្រូវមើលថា ព័ត៌មានមួយនេះ មានគេផ្សព្វផ្សាយច្រើនគ្នាដែរទេ ទី៣-ត្រូវគិតថាវាពិតជាត្រឹមត្រូវដែរឬទេមុននឹងជឿ តែយកល្អយើងត្រូវជឿទៅលើប្រភពផ្លូវការ ដែលជាប្រព័ន្ធផ្សព្វផ្សាយរបស់រដ្ឋ និងប្រព័ន្ធផ្សព្វផ្សាយឯកជន ដែលមានការដកស្រង់ព័ត៌មានពីប្រភពច្បាស់លាស់មកធ្វើការចុះផ្សាយ សូមកុំឱ្យមើលព័ត៌មានណាដែលគ្មានប្រភពច្បាស់លាស់ដែលអាចជាព័ត៌មានមិនពិត តែបើមកពីប្រភពផ្លូវការ គឺជាព័ត៌មានដែលត្រឹមត្រូវ។
ឯកឧត្តមរដ្ឋមន្ត្រីបានគូសបញ្ជាក់ថា ដើម្បីចូលរួមប្រឆាំងនឹងព័ត៌មានក្លែងក្លាយឱ្យមានប្រសិទ្ធភាព គឺសូមកុំចែករំលែកព័ត៌មានក្លែងក្លាយ ដោយក្នុងករណីដែលប្អូនៗយល់ថាព័ត៌មានមួយនេះវាមិនត្រឹមត្រូវទេ សូមកុំចែករំលែកបន្តឱ្យសោះ ព្រោះថាកាលបើយើងចែករំលែកបន្តនូវព័ត៌មានក្លែងក្លាយអាចនាំឱ្យយើងប្រឈម មុខនឹងផ្លូវច្បាប់ ដែលសិស្សានុសិស្សយើងត្រូវតែចៀសវាងការប្រឈមនឹងផ្លូវច្បាប់ព្រោះយើងកំពុងតែសិក្សាត្រូវប្រឹងសិក្សារៀនសូត្រ និងនាំគ្នាចូលរួមទប់ស្កាត់ព័ត៌មានក្លែងក្លាយទាំងអស់ គ្នា។
ឯកឧត្តមរដ្ឋមន្ត្រីមានប្រសាសន៍ថា យុទ្ធនាការនិយាយថាទេចំពោះព័ត៌មានក្លែងក្លាយនេះនឹងត្រូវធ្វើនៅតាមសាលារៀននៅទូទាំងប្រទេសបន្ទាប់ពីយុទ្ធនាការនៅវិទ្យាល័យ ហ៊ុន សែន ប៊ុន រ៉ានី វត្តភ្នំនាពេលនេះ ដែលជាការជួបជុំដ៏សំខាន់ពីសំណាក់តំណាងមន្ទីរព័ត៌មានរាជធានី ខេត្ត និងអ្នកពាក់ព័ន្ធសម្រាប់យកទៅរៀបចំបន្តនៅតាមបណ្តាសាលារៀននានានៅទូទាំងប្រទេស ក្នុងគោលបំណងលើកកម្ពស់ចំណេះដឹងអំពីអក្ខរកម្មព័ត៌មាន និងប្រព័ន្ធផ្សព្វផ្សាយ ដើម្បីទប់ស្កាត់ការរីកសាយភាយនូវព័ត៌មានក្លែងក្លាយនៅកម្ពុជា ជាពិសេសចំពោះសិស្សានុសិស្សនៅកម្រិតមធ្យមសិក្សាដែលងាយក្លាយជាជនរងគ្រោះនៃព័ត៌មានក្លែងក្លាយ៕
ចែករំលែកព័តមាននេះ