តម្លៃប្រេងហក់ឡើង ក្រោយលោក ត្រាំ ព្រមានអ៉ីរ៉ង់អំពីការចរចាសន្តិភាពដែលជាប់គាំង
អន្តរជាតិ ៖ តម្លៃប្រេងឆៅពិភពលោកបានហក់ឡើង នៅថ្ងៃទី១៨ ខែឧសភា ឆ្នាំ២០២៦ បន្ទាប់ពីប្រធានាធិបតីអាមេរិក លោក ដូណាល់ ត្រាំ…
អន្តរជាតិ ៖ តម្លៃប្រេងឆៅពិភពលោកបានហក់ឡើង នៅថ្ងៃទី១៨ ខែឧសភា ឆ្នាំ២០២៦ បន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បានព្រមានអ៉ីរ៉ង់ឱ្យប្រញាប់ចុះកិច្ចព្រមព្រៀងសន្តិភាព ដោយថា «ពេលវេលាកំពុងដើរទៅហើយ» ខណៈដែលការចរចាដើម្បីបញ្ចប់សង្គ្រាមនៅតែជាប់គាំង។
នេះបើយោងតាមប្រភពពី BBC បានចេញផ្សាយប្រេងឆៅ Brent ស្តង់ដាពិភព លោកបានកើនឡើង ១,៧% ដល់តម្លៃ ១១១,១៣ ដុល្លារអាមេរិកក្នុង១បារ៉ែល ខណៈប្រេងជួញដូរនៅសហរដ្ឋអាមេរិក (WTI) កើនឡើង ២,១% ដល់តម្លៃ ១០៧,៦២ដុល្លារអាមេរិកក្នុង១បារ៉ែល។
ទីផ្សារថាមពលបានស្ថិតក្នុងស្ថានភាពមិនអំណោយផល បន្ទាប់ពីអ៉ីរ៉ង់បានបិទច្រកសមុទ្រហ័រមូស (Hormuz) ដើម្បីសងសឹកចំពោះការវាយប្រហាររបស់សហរដ្ឋអាមេរិក និងអ៊ីស្រាអែលមកលើខ្លួន ដែលបានចាប់ផ្តើមតាំងពីថ្ងៃទី២៨ ខែកុម្ភៈ ឆ្នាំ២០២៦ ដ្បិតប្រេងឆៅ និងឧស្ម័នធម្មជាតិរាវ (LNG) ប្រហែល១ភាគ៥ របស់ពិភពលោកជាធម្មតាឆ្លងកាត់ផ្លូវដឹកជញ្ជូនដ៏តូចចង្អៀតនេះ។
លោក ត្រាំ បានសរសេរសារលើបណ្តាញទំនាក់ទំនងសង្គម Truth Social កាលពីថ្ងៃទី១៧ ខែឧសភា ឆ្នាំ២០២៦ (ម៉ោងនៅសហរដ្ឋអាមេរិក) ដោយព្រមានអ៉ីរ៉ង់យ៉ាងដូច្នេះថា ពួកគេគួរតែប្រញាប់ប្រញាល់ឱ្យបានលឿន រហ័ស បើមិនដូច្នោះទេ ពួកគេនឹងមិនមាននៅសេសសល់អ្វី
ឡើយ។ ពេលវេលាគឺមានតម្លៃណាស់»។
ទន្ទឹមនឹងនេះ ប្រព័ន្ធផ្សព្វផ្សាយអ៊ីរ៉ង់បានរាយការណ៍ថា សហរដ្ឋអាមេរិកមិនបានផ្តល់ការយល់ព្រម ឬការបន្ទន់ឥរិយាបថជាក់ស្តែងណាមួយ នៅក្នុងលិខិតឆ្លើយតបរបស់ខ្លួន ទៅកាន់សំណើចុងក្រោយរបស់អ៉ីរ៉ង់ ដើម្បីបញ្ចប់ជម្លោះនោះទេ ។ ស្របពេលទីភ្នាក់ងារសារព័ត៌មានអ៊ីរ៉ង់ Mehr ក៏បានរាយការណ៍ថា កង្វះការសម្របសម្រួលពីសហរដ្ឋអាមេរិកនឹងនាំឱ្យមានភាពជាប់គាំងនៅក្នុងការចរចា ៕
ចែករំលែកព័តមាននេះ