រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចចូលសង្ងំក្នុងរថយន្តព្រូស មួយគ្រឿង ខណៈម្ចាស់រថយន្តបើកមិនដឹងខ្លួន ក៍ត្រូវជនសង្ស័យចាប់ខ្ទប់មាត់ និងមានការប្រវាយប្រតប់គ្នា ម្ចាស់រថយន្តបានបើកទ្វាររត់គេច និងស្រែកអោយគេជួយ ស្រាប់តែជនសង្ស័យបើករថយន្តគេច…
រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចចូលសង្ងំក្នុងរថយន្តព្រូស មួយគ្រឿង ខណៈម្ចាស់រថយន្តបើកមិនដឹងខ្លួន ក៍ត្រូវជនសង្ស័យចាប់ខ្ទប់មាត់ និងមានការប្រវាយប្រតប់គ្នា ម្ចាស់រថយន្តបានបើកទ្វាររត់គេច និងស្រែកអោយគេជួយ ស្រាប់តែជនសង្ស័យបើករថយន្តគេច ហើយម្ចាស់ប្តឹងសមត្ថកិច្ចដេញតាម ធ្វើអោយជនសង្ស័យបើករត់ជ្រុលទៅបុករះរថយន្ត២គ្រឿងនិងម៉ូតូកង់បី១មួយគ្រឿង របស់ពលរដ្ឋធ្វើដំណើរតាមផ្លូវ ទើបសមត្ថកិច្ចចាប់ឃាត់បាន ។
ហេតុការណ៍ខាងលើ បង្កការភ្ញាក់ផ្អើលកើតឡើងកាលពីវេលាម៉ោង៦និង២០នាទីយប់ថ្ងៃទី១៧ខែឧសភាឆ្នាំ២០២៦ នៅចំណុចទល់មុខអគ្គិសនី សាខាចាក់អង្រែ តាមបណ្ដោយផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ហើយឃាត់ខ្លួនជនសង្ស័យបាននៅទល់មុខក្រសួងមហាផ្ទៃ ផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ប្រភពព័ត៌មានបានអោយដឹងថា ជនរងគ្រោះម្ចាស់រថយន្ត ជាមន្ត្រីអគ្គិសនីកម្ពុជាម្នាក់ បានបើករថយន្តម៉ាក toyota priusពណ៌ទឹកប្រាក់ ពាក់ស្លាកលេខ ភ្នំពេញ 2BT-9321 ដើរមើលកុងទ័រភ្លើង ពេលនោះជនរងគ្រោះ ក៍មិនដឹងថាជនសង្ស័យ បានលួចឡើងជិះរថយន្ដរបស់គាត់តាំងពីពេលណាមកដែរ ខណៈដែលគាត់ធ្វើដំណើរតាមបណ្ដោយផ្លូវជាតិលេខ២ ក៍ស្រាប់តែជនសង្ស័យរូបនោះបានធ្វើសកម្មភាពយកដៃខ្ទប់មាត់គាត់ មិនដឹងថាគោលបំណងចង់ប្លន់ឬបំណងអ្វីផ្សេងៗនោះទេ ធ្វើឲ្យគាត់ជាម្ចាស់រថយន្តភ័យស្លន់ស្លោបានបើករថយន្តមកឈប់នៅមុខអគ្គិសនី សាខាចាក់អង្រែ និងមានការប្រទាញប្រទង់គ្នា ធ្វើឲ្យរូបគាត់ជាម្ចាស់រថយន្តបើកទ្វារចេញមកក្រៅ ស្រែកឆោឡោអោយគេជួយ ។
ប្រភពព័ត៌មានបានបន្តថា ចំណែកជនសង្ស័យវិញបានបន្តបើករថយន្តរបស់គាត់ទៅមុខទៀត តែមានប្រជាពលរដ្ឋ និងសមត្ថកិច្ចមូលដ្ឋានសហការជាមួយនឹងកម្លាំងសមត្ថកិច្ចខណ្ឌចំការមន ដេញតាមពីក្រោយ និងធ្វើអោយជនសង្ស័យបើករថយន្ត ដល់មុខក្រសួងមហាផ្ទៃ ផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន ជ្រុលទៅបុករះរថយន្តរបស់ពលរដ្ឋចំនួន២គ្រឿង និងម៉ូតូកង់បីឥណ្ឌា១គ្រឿង បណ្ដាលឲ្យរងការខូចខាត ទើបសមត្ថកិច្ចកាក់ជាប់ និងឃាត់ចាប់វាយខ្នោះជនសង្ស័យយកសួរនាំនៅប៉ុស្តិ៍នគរបាលរដ្ឋបាលចាក់អង្រែលើតែម្តង ។
ក្រោយកើតហេតុ ម្ចាស់រថយន្តជាជនរងគ្រោះក៍បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចាក់អង្រែលើ ដើម្បីអោយសមត្ថកិច្ចចាត់ការជនសង្ស័យតាមនិតិវិធីផងដែរ ។ ចំណែកមធ្យោបាយ៣គ្រឿងរងការខូចខាត ត្រូវម្ចាស់យកទៅធ្វើការជួសជុលដោយខ្លួនឯង ៕
ចែករំលែកព័តមាននេះ