អន្តរជាតិ ៖ សង្គ្រាមនៅអ៉ីរ៉ង់បានធ្វើឱ្យក្រុមហ៊ុនលើសកលលោក ខាតបង់យ៉ាងហោចណាស់ ២៥ពាន់លានដុល្លារអាមេរិក ហើយកំពុងបន្តកើនឡើងថែមទៀត ដោយសារការកើនឡើងតម្លៃថាមពល ក៏ដូចជាការរអាក់រអួលខ្សែសង្វាក់ផ្គត់ផ្គង់ និងការបិទច្រកសមុទ្រហ័រមូស (Hormuz)។…
អន្តរជាតិ ៖ សង្គ្រាមនៅអ៉ីរ៉ង់បានធ្វើឱ្យក្រុមហ៊ុនលើសកលលោក ខាតបង់យ៉ាងហោចណាស់ ២៥ពាន់លានដុល្លារអាមេរិក ហើយកំពុងបន្តកើនឡើងថែមទៀត ដោយសារការកើនឡើងតម្លៃថាមពល ក៏ដូចជាការរអាក់រអួលខ្សែសង្វាក់ផ្គត់ផ្គង់ និងការបិទច្រកសមុទ្រហ័រមូស (Hormuz)។ នេះបើតាមប្រភពពី Reuters ចេញផ្សាយនៅថ្ងៃទី១៨ ខែឧសភា ឆ្នាំ២០២៦ ។
ការពិនិត្យឡើងវិញនូវសេចក្តីថ្លែងការណ៍របស់បណ្តាក្រុមហ៊ុនចម្រុះ ចាប់តាំងពីការចាប់ផ្តើមសង្គ្រាមមជ្ឈិមបូព៌ារវាងសហរដ្ឋអាមេរិកជាមួយអ៊ីស្រាអែលលើអ៊ីរ៉ង់ ដោយក្រុមហ៊ុនដែលបានចុះបញ្ជីនៅសហរដ្ឋអាមេរិក អឺរ៉ុប និងអាស៊ី ផ្តល់របាយការណ៍ដ៏គួរឱ្យព្រួយបារម្ភមួយចំពោះផលវិបាករបស់ពួកគេ ដែលកំពុងតស៊ូជាមួយតម្លៃថាមពលដែលកើនឡើង ខ្សែសង្វាក់ផ្គត់ផ្គង់ដែលជាប់គាំង និងការបិទ និងរឹតបន្តឹងនៅច្រកសមុទ្រហ័រមូស ដែលជាផ្លូវដឹកជញ្ជូនដ៏សំខាន់ដោយអ៉ីរ៉ង់។
យ៉ាងហោចណាស់ មានក្រុមហ៊ុនចម្រុះចំនួន២៧៩លើកឡើងថា សង្គ្រាមមជ្ឈិមបូព៌ា គឺជាកត្តាជំរុញឱ្យពួកគេចាត់វិធានការការពារខ្លួន ដើម្បីកាត់បន្ថយផលប៉ះពាល់ផ្នែកហិរញ្ញវត្ថុ រួមទាំងការដំឡើងថ្លៃទំនិញ និងកាត់បន្ថយផលិតកម្ម ។ វិធានការទាំងនោះ រួមមាន ការផ្អាកការបែងចែកភាគលាភ ការព្យួរការងារបុគ្គលិកបណ្តោះអាសន្ន ការគិតថ្លៃបន្ថែមលើសេវាប្រេងឥន្ធនៈ ឬការស្វែងរកជំនួយសង្គ្រោះបន្ទាន់ពីរដ្ឋាភិបាលប្រទេសរបស់ពួកគេផងដែរ។
វិស័យដែលរងគ្រោះខ្លាំងជាងគេ ពីសង្គ្រាមមជ្ឈិមបូព៌ានោះ គឺអាកាសចរណ៍ ដោយទទួលរងសម្ពាធយ៉ាងខ្លាំង ដោយត្រូវរ៉ាប់រងលើថ្លៃប្រេងឥន្ធនៈបន្ថែមដល់ទៅ ១៥ ពាន់លានដុល្លារ។
តំបន់អឺរ៉ុប និងអាស៊ី គឺជាតំបន់រងផលប៉ះពាល់ខ្លាំងជាងគេ ដោយសារការពឹងផ្អែកខ្ពស់លើការនាំចូលប្រេង និងថាមពលពីតំបន់មជ្ឈិមបូព៌ា ។ បណ្តាអ្នកវិភាគព្រមានថា ផលប៉ះពាល់ពិតប្រាកដទៅលើប្រាក់ចំណេញក្រុមហ៊ុននានា នឹងស្តែងចេញឱ្យឃើញកាន់តែច្បាស់នៅក្នុងរបាយការណ៍ហិរញ្ញវត្ថុប្រចាំត្រីមាសទី២ និងឆមាសទី២ ខាងមុខនេះ។
ភាពចលាចលនេះ គឺជាព្រឹត្តិការណ៍ចុងក្រោយបង្អស់ក្នុងចំណោមព្រឹត្តិការណ៍សកលដ៏ច្របូកច្របល់ជាបន្តបន្ទាប់សម្រាប់អាជីវកម្មពិភពលោក បន្ទាប់ពីជំងឺរាតត្បាតកូវីដ១៩ និងការឈ្លានពានរបស់រុស្ស៊ីលើអ៊ុយក្រែន ហើយក៏កំពុងបង្កើតការរំពឹងទុកសម្រាប់រយៈពេលដែលនៅសល់នៃឆ្នាំនេះ ដោយសារមិនទាន់ឃើញពន្លឺណាមួយ សម្រាប់កិច្ចព្រមព្រៀងដើម្បីបញ្ចប់សង្គ្រាមនេះនោះទេ ៕
ចែករំលែកព័តមាននេះ