រាជធានីភ្នំពេញ ៖ ប្រភពព័ត៌មានបានឱ្យដឹងថា នៅព្រឹកថ្ងៃទី២ សីហា សាលាដំបូងរាជធានីបានប្រគល់ដីកាចាប់ខ្លួនឱ្យទៅសមត្ថកិច្ចទាំង ២ស្ថាប័នហើយ គឺនគរបាលជាតិ និងកងរាជអាវុធហត្ថដែលជាមន្ត្រីនគរបាលយុត្តិធម៌ឱ្យស្វែងរក ចាប់ខ្លួននាងជួន ចាន់រតនា ហៅក្អយ ដើម្បីយករថយន្ត៣
រាជធានីភ្នំពេញ ៖ ប្រភពព័ត៌មានបានឱ្យដឹងថា នៅព្រឹកថ្ងៃទី២ សីហា សាលាដំបូងរាជធានីបានប្រគល់ដីកាចាប់ខ្លួនឱ្យទៅសមត្ថកិច្ចទាំង២ស្ថាប័នហើយ គឺនគរបាលជាតិ និងកងរាជអាវុធហត្ថដែលជាមន្ត្រីនគរបាលយុត្តិធម៌ឱ្យស្វែងរកចាប់ខ្លួននាងជួន ចាន់រតនា ហៅក្អយ ដើម្បីយករថយន្ត៣គ្រឿងសងទៅដើមបណ្តឹងវិញ ។ ប្រភពបានបន្តថា លោកចៅក្រមអនុប្រធានសាលាដំបូង បានសម្រេចចេញដីកាបញ្ជាឱ្យនាំខ្លួននាងក្អយ ដើម្បីយកមកសាកសួរពាក់ព័ន្ធលើបណ្តឹងរំលោភលើសេចក្តីទុកចិត្ត ពោលគឺបោករថយន្តគេ៥គ្រឿង យកទៅបញ្ចាំហើយគេចខ្លួនបាត់ ។ ប៉ុន្តែក្រោយមកសងគេបាន២គ្រឿងវិញ នៅសល់៣គ្រឿងទៀត នេះមិនទាន់បូកជាមួយពាក្យបណ្តឹងរបស់លោកប្រាក់ វុទ្ធី ដែលនាងក្អយបោករថយន្តអស់៣គ្រឿងនោះទេ ។
តាមការឱ្យដឹងពីមន្ត្រីសាលាដំបូងថា នាងក្អយមានពាក្យបណ្តឹងដាក់ចូលសាលាដំបូងចំនួន៥ សរុបមានរថយន្តចំនួន១២គ្រឿង ដែលត្រូវនាងក្អយបោកយករបស់គេទៅបញ្ចាំ និងមិនបានគោរពកិច្ចសន្យាថែមទាំងគេចខ្លួនបាត់ទៀត។ ពាក្យបណ្តឹងរបស់ដើមបណ្តឹងទាំង៥ ស្ថិតនៅលើដៃព្រះរាជអាជ្ញារង៥រូបដែរ ហើយបណ្តឹងទាំងនោះមានព្រះរាជអាជ្ញារងខ្លះបានចោទប្រកាន់ជាផ្លូវការ និងចាត់បញ្ជូនទៅខាងចៅក្រមរួចហើយដែរ ។ ចំណែកបណ្តឹងខ្លះត្រូវព្រះរាជអាជ្ញារងមិនទាន់ចោទប្រកាន់ទេ ស្ថិតនៅក្នុងការពិចារណា និងកំពុងកោះហៅអ្នកពាក់ព័ន្ធទៅសាកសួរ។
ចំពោះនាងក្អយវិញ មានដីកាជាច្រើនបានបញ្ជូនទៅដល់ដៃ ហើយក៏មានដីកាកោះហៅខ្លះមិនទាន់បានទៅដល់ដៃនៅឡើយទេ ។ មូលហេតុចុងក្រោយនេះ ព្រោះលំនៅឋានទាំងប៉ុន្មានដែលជាកម្មសិទ្ធិរបស់នាងក្អយ ត្រូវធ្លាក់លើដៃអ្នកដទៃទៅហើយ ពោលគឺនាងក្អយលក់ខ្ទេច លក់ខ្ទី វេចបង្វិចគេចខ្លួនរបៀបជា «រំដួលដូរដី» ។
ដីកាបញ្ជាឱ្យនាំខ្លួនប្រៀបដូចដាវអាជ្ញាសឹករបស់លោកចៅក្រមអនុប្រធានសាលាដំបូងរាជធានីភ្នំពេញ ពេលនេះបានប្រគល់ឱ្យទៅសមត្ថកិច្ចជាមន្ត្រីនគរបាលយុត្តិធម៌ គឺនគរបាល និងកងរាជអាវុធហត្ថរួចហើយ។ ដូច្នេះអ្នកផងចាំមើល តើសមត្ថកិច្ចណាចាប់នាងក្អយយកទៅជូនតុលាការបានមុន៕
ចែករំលែកព័តមាននេះ