ទីក្រុងកៀវ៖ រុស្ស៊ីបានប្រើប្រាស់ដ្រូនជាច្រើនរយគ្រឿងវាយប្រហារអ៊ុយក្រែនកាលពីយប់មិញ។ រុស្ស៊ីក៏បានប្រគល់សាកសពយុទ្ធជនពលីរបស់អ៊ុយក្រែន៥២៨នាក់ផងដែរបន្ទាប់ពីមានការដូរឈ្លើយសឹកគ្នា។ មនុស្សម្នាក់ស្លាប់ដោយសារការវាយប្រហាររបស់រុស្ស៊ី។ កងទ័ពអាកាសអ៊ុយក្រែនអះអាងថារុស្ស៊ីបញ្ជូនដ្រូន២៩៤គ្រឿងទៅវាយប្រហារ។ នៅក្នុងចំណោមនោះ អ៊ុយក្រែនបាញ់ទម្លាក់២៦៩គ្រឿង។
នៅតំបន់ខឺសុន អគារខ្ពស់ៗចំនួន៥ខ្នង និងផ្ទះរបស់ប្រជាជន១៩ខ្នងរងការខូចខាតដោយសារការវាយប្រហារដែលបណ្ដាលឱ្យស្លាប់មនុស្សម្នាក់ និងរបួស២៣នាក់។ នេះបើយោងតាមការបង្ហើបឱ្យដឹងពីអភិបាលតំបន់នេះគឺលោកអូឡិចសាន់ដឺ ប្រូគូឌីន (Oleksandr Prokudin)។ នៅតំបន់អូដេសា, ខាគីវ និងស៊ូមី ហេដ្ឋារចនាសម្ព័ន្ធសំខាន់ៗសុទ្ធតែរងការវាយប្រហារពីរុស្ស៊ី។ ទីតាំង៣៩កន្លែងនៅអូដេសាគ្មានភ្លើងអគ្គិសនីប្រើប្រាស់ទេបន្ទាប់ពីបណ្ដាញចែកចាយអគ្គីសនីរងការខូចខាត។ ដូច្នេះធ្វើឱ្យប៉ះពាល់មនុស្ស២២០០០នាក់។
នៅតំបន់ខាគីវ ហេដ្ឋារចនាសម្ព័ន្ធដឹកជញ្ជូនសំខាន់ៗរងការខូចខាត ក្នុងនោះមានផ្លូវមួយខ្សែ, ស្ថានីយរថភ្លើងក្រោមដី២កន្លែង, បណ្ដាញទំនាក់ទំនងប្រព័ន្ធដឹកជញ្ជូនអេឡិចត្រូនិច, រថយន្តបឺសប្រើអគ្គិសនីមួយគ្រឿង និងចំណតរថយន្តសាធារណៈ។ មនុស្ស៧នាក់រងរបួសនៅតំបន់ស៊ូមីបន្ទាប់ពីការិយាល័យធ្វើការមួយកន្លែង រថយន្តគិលានសង្គ្រោះ រថយន្តខ្នាតតូច និងរថយន្តជាច្រើនគ្រឿងរងការវាយប្រហារ។ ទន្ទឹមនឹងនោះ រុស្ស៊ីក៏មិនរួចខ្លួនដែរ។ អ៊ុយក្រែនបានបញ្ជូនដ្រូនវាយប្រហារស្លាប់មនុស្សម្នាក់នៅតំបន់បែលហ្គោរ៉ូត។ នេះបើយោងតាមអាជ្ញាធរមូលដ្ឋាន។
ការវាយប្រហារកាលពីយប់មិញនោះកើតឡើងចំពេលដែលរុស្ស៊ីប្រគល់សាកសពទាហានអ៊ុយក្រែន៥២៨នាក់។ មជ្ឈមណ្ឌលឈ្លើយសឹកអ៊ុយក្រែនបានបង្ហោះសារនៅលើបណ្ដាញសង្គមថាជាលទ្ធផលនៃកិច្ចខិតខំប្រឹងប្រែងធ្វើមាតុភូមិនិវត្តយុទ្ធជនពលីទាំងនោះ នៅទីបញ្ចប់សាកសព៥២៨នាក់ត្រូវបានប្រគល់ទៅឱ្យអ៊ុយក្រែនវិញ។ ក្រុមអ្នកស៊ើបអង្កេត និងអ្នកជំនាញនឹងខិតខំកំណត់អត្តសញ្ញាណរបស់អ្នកទាំងនោះ។ កាលពីមុននោះមួយថ្ងៃ ប្រទេសទាំង២បានដូរឈ្លើយសឹកគ្នាម្ខាងៗ២០៥នាក់៕ ប្រភព៖ Euro News
ចែករំលែកព័តមាននេះ