ទីក្រុងម៉ានីឡា៖ ប្រទេសហ្វ៊ីលីពីនប្ដេជ្ញាសហការជាមួយតុលាការព្រហ្មទណ្ឌអន្តរជាតិតបតាមសំណើរបស់តុលាការនេះដើម្បីចាប់ខ្លួនអ្នកនយោបាយម្នាក់ដែលកំពុងរត់គេចខ្លួនបន្ទាប់ពីត្រូវសមត្ថកិច្ចតាមចាប់កាលពីដើមសប្ដាហ៍នេះ។ ទោះបីអាជ្ញាប្រើប្រាស់កងកម្លាំងចូលទៅចាប់ដល់ក្នុងអគារព្រឹទ្ធសភាក៏ដោយ ក៏អ្នកនយោបាយរូបនោះអាចរត់គេចខ្លួនបាន ព្រមទាំងមានការបាញ់កាំភ្លើងថែមទៀតផង។
រដ្ឋមន្ត្រីក្រសួងយុត្តិធម៌ហ្វ៊ីលីពីនថ្លែងថារដ្ឋាភិបាលរបស់លោកបានទទួលដីកាពី ICC ដើម្បីចាប់ខ្លួនសមាជិកព្រឹទ្ធសភាឈ្មោះដឺឡា រ៉ូសា (dela Rosa) ដែលធ្លាប់ជាអគ្គស្នងការនគរបាលជាតិ។ តុលាការព្រហ្មទណ្ឌអន្តរជាតិបានចេញដីកាចាប់សមាជិកព្រឹទ្ធសភាវ័យ៦៤ឆ្នាំរូបនេះកាលពីថ្ងៃចន្ទពីបទប្រព្រឹត្តឧក្រិដ្ឋកម្មប្រឆាំងមនុស្សជាតិ។ គាត់ជាមេខ្លោងធំនៅក្នុងសង្គ្រាមប្រឆាំងគ្រឿងញៀនកាលពីជំនាន់លោកឌូតឺតេនៅកាន់អំណាច។ មនុស្សរាប់ពាន់នាក់បានស្លាប់នៅក្នុងយុទ្ធនាការនេះ។
រដ្ឋមន្ត្រីហ្វ៊ីលីពីនខាងលើនេះថ្លែងថាយើងនឹងអនុវត្តតាមសំណើរបស់ ICC។ អាជ្ញាធរកំពុងរង់ចាំសេចក្ដីសម្រេចពីតុលាការកំពូលហ្វ៊ីលីពីនដើម្បីដោះស្រាយបណ្ដឹងតវ៉ារបស់សមាជិកព្រឹទ្ធសភារូបនោះពាក់ព័ន្ធនឹងនីត្យានុកូលភាពនៃដីកាចាប់ខ្លួន។ ដំណឹងស្ដីពី ICC ត្រៀមចេញដីកាចាប់ខ្លួនគាត់កាលពីខែវិច្ឆិកា ឆ្នាំមុនបានធ្វើឱ្យលោកដឺឡា រ៉ូហ្សាបំភៀសខ្លួនពីសាធារណជនម្ដងហើយ។ ប៉ុន្តែកាលពីថ្ងៃចន្ទសប្ដាហ៍នេះ គាត់បង្ហាញខ្លួនជាថ្មីដើម្បីត្រៀមប្រកួតប្រជែងនៅក្នុងការបោះឆ្នោតប្រធានាធិបតី។
បន្ទាប់ពីឃើញកម្លាំងសមត្ថកិច្ចរង់ចាំគាត់នៅវិមានព្រឹទ្ធសភា អតីតអគ្គស្នងការនគរបាលរូបនេះក៏បានរកវិធីការពារខ្លួននៅក្នុងអគារនោះ។ ពីរថ្ងៃក្រោយមក ទិដ្ឋភាពនៅក្នុងព្រឹទ្ធសភាពោរពេញដោយភាពចលាចលនៅពេលមានការផ្ទុះអាវុធរាប់សិបគ្រាប់។ ទាហានហ្វ៊ីលីពីនព្យាយាមឡើងតាមជណ្ដើរអគារដើម្បីព្យាយាមចាប់ខ្លួនគាត់។ គេមិនទាន់ដឹងច្បាស់ថាតើភាគីខាងណាជាអ្នកបាញ់កាំភ្លើងទេ។ ប៉ុន្តែប្រធានព្រឹទ្ធសភាអះអាងថានៅពេលនេះ ដឺឡា រ៉ូហ្សាលែងស្ថិតនៅក្នុងអគារនោះតទៅទៀតហើយ៕ ប្រភព៖ Al Jazeera
ចែករំលែកព័តមាននេះ