ខេត្តបាត់ដំបង ៖ ក្រុមកុមារកំព្រាប្រហែលជាង១០០នាក់នៅក្នុងមណ្ឌលមូលនិធិក្តី សង្ឃឹមនៃកុមារកម្ពុជាដែលមានទីតាំងនៅក្នុងភូមិរំចេក២ សង្កាត់រតនៈ ក្រុងបាត់ដំបងបានបះបោរពេញបរិវេណនៃមណ្ឌលដោយមានលើកបដាពាក្យ ស្លោកផង កាលពីវេលាម៉ោង១១ព្រឹក ថ្ងៃទី២ សីហា ដើម្បីប្រឆាំង
ខេត្តបាត់ដំបង ៖ ក្រុមកុមារកំព្រាប្រហែលជាង១០០នាក់នៅក្នុងមណ្ឌលមូលនិធិក្តីសង្ឃឹមនៃកុមារកម្ពុជាដែលមានទីតាំងនៅក្នុងភូមិរំចេក២ សង្កាត់រតនៈ ក្រុងបាត់ដំបងបានបះបោរពេញបរិវេណនៃមណ្ឌលដោយមានលើកបដាពាក្យស្លោកផង កាលពីវេលាម៉ោង១១ព្រឹក ថ្ងៃទី២ សីហា ដើម្បីប្រឆាំងទៅនឹងអ្វីដែលពួកគេនិយាយថា ជាការបិទសិទ្ធិសេរីភាពកុមារ និងមានការប្រព្រឹត្តអំពើពុករលួយពីប្រធានមណ្ឌល និងមន្ត្រីក្រោមឱវាទដែលជាសាច់ញាតិនឹងគ្នា។
បាតុកម្មតវ៉ារបស់ក្រុមកុមារកំព្រាដែលមិនធ្លាប់មានពីមុនមកនេះធ្វើឱ្យមានការភ្ញាក់ផ្អើលយ៉ាងខ្លាំងដល់សមត្ថកិច្ច និងអង្គការក្រៅរដ្ឋាភិបាលនានា ជាពិសេសអង្គការការពារសិទ្ធិមនុស្សនានាក្នុងខេត្តបាត់ដំបង។ សំឡេងស្រែកកងរំពងពេញបរិវេណនៃមណ្ឌលដោយមានលើកបដាព្រោងព្រាតផង ខណៈដែលទ្វាររបងត្រូវបានបិទជិត និងអមដោយឆ្មាំសន្តិសុខយ៉ាងរឹងមាំ។ គេឃើញក្រុមកុមារត្រេកអរយ៉ាងខ្លាំងពេលដែលឃើញក្រុមសមត្ថកិច្ចទៅដល់រួមទាំងមានវត្តមានក្រុមអង្គការការពារសិទ្ធិមនុស្សផង។ ពួកគេបានរត់សំដៅទៅរកសមត្ថកិច្ច និងមន្ត្រីអង្គការ ក្នុងទឹកមុខញញឹមរាក់ទាក់ដែលមើលទៅទំនងពួកគេខកខានញញឹមជាយូរមកហើយ។ ជាមួយគ្នានេះគេឃើញកុមារតូចៗបានប្រជ្រៀតគ្នាណែនណាន់តាន់តាប់ដើម្បីសុំបញ្ចេញយោបល់ដែលពួកគេយល់ថា ជាអំពើអយុត្តិធម៌សម្រាប់ពួកគេប្រាប់ទៅសមត្ថកិច្ច មន្ត្រីសិទ្ធិមនុស្ស និងអ្នកកាសែត។
កុមារីបួន បូរី អាយុ១២ឆ្នាំ និយាយថា នាងមករស់នៅក្នុងមណ្ឌលនេះរយៈពេលជាង៣ឆ្នាំមកហើយ។ ពួកនាងលើកបដាតវ៉ានេះគឺប្រឆាំងនឹងប្រធានមណ្ឌលដែលលួចកិបកេងលុយរបស់កុមារកំព្រា និងបិទសិទ្ធិសេរីភាពកុមារ ។
រីឯនាង វិទូ ស្រីដាំ អាយុ១៤ឆ្នាំ និយាយថា ប្រធានមណ្ឌលឈ្មោះឌី សំរេច ភេទស្រី បានរឹតបន្តឹងយ៉ាងខ្លាំងចំពោះសិទ្ធិសេរីភាពកុមារ និងប្រព្រឹត្តអំពើពុករលួយ។ ពេលមានការឧបត្ថម្ភសម្លៀកបំពាក់ ឬស្បែកជើងពីប្រទេសអូស្ត្រាលី ប្រធានមណ្ឌលបានឱ្យពួកនាងជញ្ជូនស្បែកជើង ឬសម្លៀកបំពាក់ល្អៗទៅទុកក្នុងរថយន្តរបស់គាត់រួចយករបស់អន់ៗមកចែកឱ្យកុមារកំព្រា ។ លើសពីនេះទៀតប្រធានផ្នែកគណនេយ្យឈ្មោះលាង ស៊ីថារ័ត្ន ភេទស្រី បានកាត់ប្រាក់ខែពួកនាងស្ទើរពាក់កណ្តាលជាប្រចាំដោយមិនបញ្ជាក់ពីមូលហេតុឡើយ ហើយសូម្បីតែអាហារក៏មិនឱ្យហូបគ្រប់គ្រានដែរ។
យុវជនឈ្មោះយ៉ត ប៊ុនឡាយ អាយុ១៨ឆ្នាំ បញ្ជាក់ប្រាប់ថា ប្រធានមណ្ឌលតែងតែព្រមានជាប្រចាំថា នឹងបណ្តេញចេញពីមណ្ឌលបើអ្នកណាហ៊ានតវ៉ាប្រឆាំង ឬមិនស្តាប់ការណែនាំ។ កុមារតូចៗដែលមិនស្តាប់បង្គាប់ត្រូវគេយកទៅបង្ខាំងទុកក្នុងបន្ទប់អគារ តែមិនធ្វើទារុណកម្មទេ។
ខណៈកុមារតូចៗកំពុងផ្តល់បទសម្ភាសន៍ជាមួយអ្នកកាសែត និងសមត្ថកិច្ច គេឃើញបុរសជនជាតិហ្វ៊ីលីពីនម្នាក់ដែលទទួលខុសត្រូវក្នុងមណ្ឌលនេះដែរបានចាប់អូសដៃពួកគេចេញមិនឱ្យផ្តល់ព័ត៌មានដល់អ្នកកាសែតឡើយ តែកុមារតូចៗទាំងនោះព្យាយាមរត់គេច ហើយនិយាយរឿងអាស្រូវនេះដដែល។
ពួកកុមារកំព្រាទាំងនោះបានសំណូមពរយ៉ាងទទូចដល់សមត្ថកិច្ច ឬអាជ្ញាធរ ឬមន្ត្រី ការពារសិទ្ធិមនុស្សឱ្យជួយធ្វើយ៉ាងណាដកប្រធានមណ្ឌលចេញ និងដកប្រធានផ្នែកគណនេយ្យផង ព្រោះអ្នកទាំង២ជាបងប្អូនថ្លៃនឹងគ្នា ។ ម្យ៉ាងទៀតជួយការពារសិទ្ធិរបស់ពួកគេផង ព្រោះកំពុងប្រឈមមុខនឹងការបណ្តេញចេញពីមណ្ឌល ហើយអាចធ្វើឱ្យពួកគេគ្មានកន្លែងសិក្សាឡើយ។
ប្រធានអង្គការមូលនិធិក្តីសង្ឃឹមនៃកុមារកម្ពុជា លោកស្រី ឌី សំរេច មិនអាចសុំការបំភ្លឺបានទេកាលពីព្រឹកថ្ងៃទី២ សីហា ដោយទូរស័ព្ទចូលច្រើនលើកច្រើនសា តែគ្មានអ្នកទទួល។ រីឯលោកស្រី លាង ស៊ីថារ័ត្ន ប្រធានផ្នែកគណនេយ្យនៃអង្គការនេះដែលរងការចោទប្រកាន់ពីកុមារកំព្រាដែរនោះបានឆ្លើយប្រាប់តាមទូរស័ព្ទយ៉ាងខ្លីថា «ខ្ញុំបានដឹងរឿងនេះ តែខ្ញុំសុំមិនឆ្លើយ ព្រោះខ្ញុំមានអ្នកទទួលខុសត្រូវនៅក្នុងមណ្ឌលហើយ» ។ ទោះជាយ៉ាងណាក្តី គាត់មិនប្រាប់ឈ្មោះអ្នកទទួលខុសត្រូវនោះទេ។
លោកស៊ុន តឹក មន្ត្រីសម្របសម្រួលរបស់អង្គការលីកាដូខេត្តបាត់ដំបងដែលបានទៅកាន់មណ្ឌលនោះដែរបានថ្លែងថា វាជាការត្រឹមត្រូវដែលពួកកុមារកំព្រាលើកបដាតវ៉ាទាមទារ ឬប្រឆាំងនូវអ្វីដែលពួកគេយល់ថា អយុត្តិធម៌សម្រាប់ពួកគេ ប៉ុន្តែលោកថា នោះជារឿងផ្ទៃក្នុងរបស់អង្គការ។
មន្ត្រីសិទ្ធិមនុស្សដដែលប្រាប់ថា អង្គការនេះមានកុមារកំព្រាសរុប១១០នាក់ ប្រុស៦១នាក់ ហើយមានអាយុចាប់ពី១ឆ្នាំដល់២៣ឆ្នាំ។ លោកបានជួបជាមួយលោកភីតធឺបេតថ្លឺ ជនជាតិអូស្ត្រាលីមានតួនាទីជាជំនួយការតំណាងមូលនិធិក្នុងប្រទេសនៃអង្គការនេះ ហើយលោកប្រាប់ថា ក្រុមក្មេងៗទាំងនោះបានបង្ហាញពីការមិនពេញចិត្តចំពោះការដឹកនាំរបស់ប្រធានមណ្ឌលដែលទើបផ្លាស់ប្តូរថ្មីនេះ។ លោកនឹងដោះស្រាយបញ្ហានេះដោយស្នើឱ្យអង្គការការពារសិទ្ធិមនុស្សផ្អាកសកម្មភាពសិន។
លោកស៊ុន តឹក និយាយថា លោកនឹងឃ្លាំមើលសកម្មភាពរបស់អង្គការនេះបន្តទៀតពីព្រោះបើមានការគាបសង្កត់ បិទសិទ្ធិសេរីភាព ឬកេងប្រវ័ញ្ចប្រាក់ខែរបស់កុមារកំព្រាដូចការលើកឡើងរបស់ពួកគេមែន លោកយល់ថា វាជាអំពើល្មើសច្បាប់ និងរំលោភសិទ្ធិមនុស្សធ្ងន់ធ្ងរបំផុត ដូច្នេះស្ថាប័នមានសមត្ថកិច្ចពាក់ព័ន្ធត្រូវតែចាត់វិធានការ ៕
ចែករំលែកព័តមាននេះ