ខេត្តកំពង់ចាម: ពិតជាគួរឱ្យសរសើរដល់វីរៈយុទ្ធជន ស៊ីម ម៉េងលី អាយុ៤០ឆ្នាំ ជាកម្លាំងជួរមុខចំណុះឱ្យកងពលលេខ ៦ប្រចាំខេត្តឧត្តរមានជ័យ ក្នុងពេលបាញ់ទប់ទល់ការឈ្លានពានពីសំណាក់ទ័ពថៃគ្រាប់កាំភ្លើងបានហោះមកធ្លាក់ដូចទឹកភ្លៀង ប៉ុន្តែទឹកដោះម្ដាយថ្លៃពុំបានត្រូវរងរបួសមួយគ្រាប់ណានោះទេ។តែគួរឱ្យអាណិតអាសូរបែរជាស្លាប់ដោយសារជំងឺគាំងបេះដូងទៅវិញ ជាមួយនោះត្រូវបានអង្គភាពដឹកតាមរថយន្តយកមកធ្វើបុណ្យនៅស្រុកកំណើតក្នុងភូមិទឹកចេញ ឃុំព្រែកក្របៅ ស្រុកកងមាស ខេត្តកំពង់ចាម ។
លោកយាយវ៉ន អ៊ឹម អាយុ៧៨ឆ្នាំ បានប្រាប់ឲ្យដឹងថា ក្រោមការគិតគូរពីសំណាក់ឯកឧត្តមអ៊ុន ចាន់ដាអភិបាលខេត្តព្រមទាំងសហការីបាននាំយកថវិការសម្ដេចតេជោនិងថវិការបស់រដ្ឋបាលខេត្តមកប្រគល់ជូនគាត់ដល់ផ្ទះដោយធ្វើឡើងនារសៀលថ្ងៃទី១៣ ខែឧសភា ឆ្នាំ២០២៦ ចំពោះថវិកាដែលទទួលបាននេះគឺយកទូទាត់សងថ្លៃជំពាក់បុណ្យសពកូនប្រុសរបស់គាត់ហើយថវិកាដែលនៅសល់មួយផ្នែកទៀតទុកសម្រាប់ចាយវាយក្នុងគ្រួសារព្រោះគាត់នឹងប្ដីឈ្មោះសែម ស៊ីម អាយុ៨០ ឆ្នាំចាស់ណាស់ទៅហើយរកអ្វីមិនកើតទេ។
លោកយាយបានរំលឹកឱ្យដឹងថា កូនប្រុសរបស់គាត់ដែលស្លាប់នេះគឺជាកូនទី៦ក្នុងចំណោមបងប្អូន៧នាក់ហើយបានចូលបម្រើជាទាហានមកដល់សព្វថ្ងៃមានរយៈពេល១៥ឆ្នាំ។ កូនប្រុសរូបនេះធ្លាប់មានប្រពន្ធ តែដោយសារប្រពន្ធស្រឡាញ់មិនស្មោះត្រង់ ក៏បានចាកចោលកូនប្រុសគាត់ ក្រោយមកបានសុខចិត្តរស់នៅពោះម៉ាយមិនយកប្រពន្ធទៀតនោះទេ។
ជាក់ស្ដែងនាពេលកន្លងទៅកម្លាំងទ័ពថៃបានធ្វើការឈ្លានពានមកលើបូរណភាពទឹកដីកម្ពុជាគ្រានោះកូនប្រុសគាត់នៅប្រចាំសមរភូមិជួរមុខប្រាសាទតាក្របីបន្ទាប់មកនៅប្រាសាទតាមាន់ក្នុងខេត្តឧត្តរមានជ័យ មុនពេលចម្បាំងម្ដងៗកូនប្រុសតែងតែទូរសព្ទមកជួបម្ដាយឱ្យអុជធូបបន់ស្រន់ គ្រប់ពេលវេលាកូនប្រុសឈ្មោះម៉េងលី តែងតែនឹកដល់ម្ដាយគ្រប់ពេល។
លោកយាយលើកឡើងថានៅពេលដែលគ្រាប់ប្លោងរបស់ទ័ពថៃបាញ់ធ្លាក់មកចំដើមឈើនិងមានអំបែងជះប្រសាចរួមទាំងគល់ឈើប៉ើង តែកូនរូបនេះគឺបានសុខសប្បាយរហូតមិនមានបញ្ហាណាមួយនោះទេ។ ក្នុងពេលដែលមានការឈ្លានពានពីសំណាក់ទ័ពថៃទាំងពីរលើក គឺកូនប្រុសរបស់គាត់បានជៀសផុតពីគ្រោះថ្នាក់ដល់អាយុជីវិត។
តែក្រោយពីសភាពការណ៍ព្រំដែនកម្ពុជា-ថៃ ស្ងប់ស្ងាត់ក្រោយមកកូនប្រុសរូបនេះមិនស្រួលខ្លួន បានឱ្យទាហានបម្រើការក្នុងអង្គភាពជាមួយគ្នាកោសខ្យល់ឱ្យរាងស្រួលខ្លួនបន្តិចនិងទទួលទានបបរមានកម្លាំងស្រួលខ្លួន ក្រោយមកទៀតជំងឺធ្វើទុក្ខពេលនោះត្រូវបានបញ្ជូនមកកាន់មន្ទីរពេទ្យពុំទាន់នឹងដល់ផងក៏បានស្លាប់ដោយសារគាំងបេះដូងនៅថ្ងៃទី១មេសា ឆ្នាំ២០២៦ ហើយត្រូវបានរថយន្តអង្គភាពដឹកយកមកធ្វើបុណ្យនៅស្រុកកំណើតក្នុងស្រុកកងមាស ខេត្តកំពង់ចាម។
ឯកឧត្តមអ៊ុន ចាន់ដា អភិបាលខេត្តកំពង់ចាម មានប្រសាសន៍លើកឡើងថា ដោយពិនិត្យមើលឃើញស្ថានភាពជីវភាពរបស់លោកតាលោកយាយមានការលំបាកក៏បានឲ្យលោកមេឃុំព្រែកក្របៅ ជួយសម្រួលធ្វើបានក្រីក្រជូនដើម្បីងាយស្រួលទៅព្យាបាលនៅមន្ទីរពេទ្យដោយមិនបាច់ចំណាយថវិកា។
ជាមួយនោះអាជ្ញាធរមូលដ្ឋានត្រូវធ្វើការយកចិត្តទុកដាក់ចំពោះលោកតាលោកយាយ ត្រូវជាឪពុកម្ដាយរបស់វីរៈយុទ្ធជនជួរមុខដែលបានពលីក្នុងបុព្វហេតុការពារជាតិ ៕
ចែករំលែកព័តមាននេះ