ទីក្រុងប៉េកាំង៖ លោកត្រាំ និងលោកស៊ីជីនពីងត្រៀមជួបគ្នាកម្រិតកំពូលដើម្បីជជែកគ្នាអំពីបញ្ហារសើបជាច្រើនដែលធ្វើឱ្យប្រទេសមហាអំណាចទាំង២ហាក់ដូចជាមិនសូវស៊ីសង្វាក់គ្នា។ របៀបវារៈសំខាន់ៗមានដូចជាបញ្ហាអ៊ីរ៉ង់ បញ្ហាជម្លោះពាណិជ្ជកម្ម និងបញ្ហាកោះតៃវ៉ាន់។ លោកស៊ីនឹងទទួលស្វាគមន៍លោកត្រាំនៅក្នុងពិធីបដិសណ្ឋារកិច្ចដ៏អ៊ឹកអធិកមួយមុនពេលលោកទាំង២ចាប់ផ្ដើមពិភាក្សាគ្នានៅម៉ោង១០ព្រឹកនៅមហាវិមានប្រជាជន។
មេដឹកនាំទាំង២ក៏នឹងចូលរួមពិធីលៀងសាយភោជន៍នៅវិមានដដែលនេះផងដែរនៅពេលល្ងាច។ លោកត្រាំនឹងទៅទស្សនាប្រាសាឋានសួគ៌ជាទីដែលអតីតព្រះចៅអធិរាជចិនសម័យបុរាណតែងតែយាងមកបែរបន់សូមឱ្យដំណាំទទួលបានផលល្អ។ លោកត្រាំទៅប្រទេសចិនលើកនេះក៏មានបុគ្គលសំខាន់ៗខាងវិស័យធុរកិច្ចអមដំណើរទៅជាមួយផងដែរដូចនាយកប្រតិបត្តិក្រុមហ៊ុនអឹនវីឌា (Nvidia) និងលោកអ៊ីឡនម៉ាស់ (Elon Musk) ថៅកែក្រុមហ៊ុនតេសស្លាជាដើម។
លោកត្រាំថ្លែងដោយក្ដីសង្ឃឹមថានឹងស្វាគមន៍គ្នាយ៉ាងរាក់ទាក់ជាមួយលោកស៊ីជីនពីងដែលលោកជឿជាក់ថាទំនាក់ទំនងជាឯកជនរវាងលោកទាំង២មានភាពរឹងមាំ។ លោកចាត់ទុកលោកស៊ីគ្រប់គ្រងប្រទេសដោយកណ្ដាប់ដៃដែក។ នៅលើបញ្ជីប្រធានបទដែលត្រូវនិយាយមានដូចជាកិច្ចព្រមព្រៀងលើវិស័យកសិកម្ម, ការទិញ-លក់យន្តហោះ និងប្រធានបទដទៃទៀត។ មុនពេលចាកចេញដំណើរពីវ៉ាស៊ីនតោន លោកត្រាំបានបង្ហោះសារនៅលើបណ្ដាញសង្គម និងជំរុញឱ្យលោកស៊ីជីនពីងបើកទូលាយសម្រាប់ក្រុមហ៊ុនរបស់អាមេរិក។
ក្រសួងការបរទេសចិនប្រកាសស្វាគមន៍ដំណើរទស្សនកិច្ចរបស់លោកត្រាំ។ ក្រសួងប្រកាសថាប្រទេសចិនត្រៀមខ្លួនសហការជាមួយអាមេរិកជានិច្ចដើម្បីពង្រីកកិច្ចសហប្រតិបត្តិការ និងដោះស្រាយបញ្ហាខ្វែងគំនិតគ្នា។ ប៉ុន្តែប្រទេសចិនដែលលោកត្រាំទៅបំពេញទស្សនកិច្ចលើកនេះខុសគ្នាស្រឡះពីប្រទេសចិនដែលលោកធ្លាប់ទៅកាលពី៩ឆ្នាំមុន។ ម៉្យាងទៀត បញ្ហាពាណិជ្ជកម្ម និងភាពតានតឹងផ្នែកភូមិសាស្ត្រនយោបាយនៅតែជាបញ្ហាដែលមិនទាន់ដោះស្រាយចេញដដែល។
សង្គ្រាមអ៊ីរ៉ង់អាចនឹងប៉ះពាល់គោលជំហររបស់លោកត្រាំនៅពេលពិភាក្សាជាមួយលោកស៊ី។ លោកត្រាំថ្លែងដោយក្ដីសង្ឃឹមថានឹងបានពិភាក្សាគ្នាពិស្ដារអំពីបញ្ហាអ៊ីរ៉ង់ដែលជាប្រទេសលក់ប្រេងឆៅច្រើនជាងគេទៅឱ្យចិន។ ត្រាំនិយាយយ៉ាងទទូចថាវ៉ាស៊ីនតោនមិនត្រូវការជំនួយពីចិនក្នុងការដោះស្រាយបញ្ហាអ៊ីរ៉ង់ទេ។ ប៉ុន្តែរដ្ឋមន្ត្រីការបរទេសអាមេរិកប្រើសម្ដីផ្សេងពីនេះ។ លោករូប៊ីអូថ្លែងដោយក្ដីសង្ឃឹមថានឹងបញ្ចុះបញ្ចូលប្រទេសចិនដើម្បីនិយាយជាមួយអ៊ីរ៉ង់ឱ្យពួកគេងាកចេញពីអ្វីដែលពួកគេកំពុងធ្វើនៅឈូងសមុទ្រពែក្ស៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ