ទីក្រុងគូឡាឡាំពួរ៖ ទីភ្នាក់ងារល្បាតដែនសមុទ្ររបស់ម៉ាឡេស៊ីបានបើកយុទ្ធនាការស្វែងរក និងជួយសង្គ្រោះអ្នកបាត់ខ្លួន១៤នាក់ក្រោយការលិចទូកមួយគ្រឿងដែលគេជឿជាក់ថាដឹកអ្នកចំណាកស្រុកខុសច្បាប់ជនជាតិឥណ្ឌូណេស៊ី ហើយបានលិចនៅឆ្នេរសមុទ្រខាងលិចកាលពីថ្ងៃចន្ទ។ អ្នកនេសាទម្នាក់បានជូនដំណឹងនេះទៅអាជ្ញាធរបន្ទាប់ពីគាត់ឃើញជនរងគ្រោះអណ្ដែតនៅលើផ្ទៃទឹកមិនឆ្ងាយប៉ុន្មានពីកោះផាងគ័រ (Pangkor)។ នេះបើយោងតាមលោកមហាម៉ាត់ ស៊ូគ្រី ខូតូប (Mohamad Shukri Khotob) ជានាយកគ្រប់គ្រងលំហសមុទ្រប្រចាំរដ្ឋភេរ៉ាក់ (Perak) ថ្លែងនៅក្នុងសេចក្ដីប្រកាស។
នាវានេសាទត្រីមួយគ្រឿងជួយសង្គ្រោះជនជាតិឥណ្ឌូណេស៊ីបាន២៣នាក់ ក្នុងនោះមានស្ត្រី៧នាក់។ ពួកគេត្រូវបាននាំខ្លួនទៅជួបនគរបាលជើងទឹកដើម្បីរៀបចំឯកសារ និងស៊ើបអង្កេតជាបន្តទៀត។ លទ្ធផលស្រាវជ្រាវបឋមបង្ហាញថាទូកដែលលិចនោះដឹកមនុស្ស៣៧នាក់ និងបានចាកចេញដំណើរពីទីក្រុងគីសារ៉ាន់ (Kisaran) ប្រទេសឥណ្ឌូណេស៊ី កាលពីថ្ងៃទី៩ ខែឧសភា។ គោលដៅរបស់ពួកគេគឺតម្រង់ឆ្ពោះទៅរកទីក្រុងគូឡាឡាំពួរ និងកោះប៉េណាំង (Penang)។
លោកមហាម៉ាត់ ស៊ូគ្រីថ្លែងថាសម្រាប់ពេលនេះ ជនរងគ្រោះដែលនៅសល់មិនទាន់កំណត់អត្តសញ្ញាណនៅឡើយទេ។ អាជ្ញាធរនៅតែបន្តការស្វែងរកដដែល។ ឧបទ្ទវហេតុតែងតែកើតមានជារឿយៗនៅលើលំហសមុទ្រស្ថិតនៅចន្លោះប្រទេសឥណ្ឌូណេស៊ី និងម៉ាឡេស៊ី។ ភាគច្រើនបណ្ដាលមកពីទូកដឹកអ្នកដំណើរផ្ទុកមនុស្សលើសចំណុះ។
ទូកទាំងនោះដឹកអ្នកចំណាកស្រុកជាលក្ខណៈធ្វើដំណើររសាត់អណ្ដែតបែបផ្សងព្រេងដើម្បីស្វែងរកជីវិតកាន់តែប្រសើរ។ ពួកគេរកការងារធ្វើនៅតាមចម្ការ ឬរោងចក្រនៃប្រទេសម៉ាឡេស៊ី។ គេប៉ាន់ស្មានថាជនជាតិឥណ្ឌូណេស៊ីចន្លោះពីមួយសែនទៅពីរសែននាក់ធ្វើដំណើរផ្សងព្រេងបែបនេះជារៀងរាល់ឆ្នាំ។ ពួកគេច្រើនចាញ់បោកមេខ្យល់ដែលនិយាយពន្យុះឱ្យពួកគេចាកចោលមាតុភូមិដើម្បីកេងចំណេញពីការដឹកជញ្ជូនមនុស្សខុសច្បាប់។ នេះបើយោងតាមអ្នកដែលធ្វើការពាក់ព័ន្ធនឹងបញ្ហាចំណាកស្រុក៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ