វាយប្រហារដោយដ្រូននៅស៊ូដង់ ស្លា.ប់ជនស៊ីវិល៨៨០នាក់
ប្រទេសស៊ូដង់ ៖ អ.ស.ប ថ្លែង កាលពីថ្ងៃទី១១ ឧសភា ថា ជនស៊ីវិលយ៉ាងតិច៨៨០នាក់ បានត្រូវស្លាប់ ក្នុងការវាយប្រហារដោយដ្រូននៅស៊ូដង់…
ប្រទេសស៊ូដង់ ៖ អ.ស.ប ថ្លែង កាលពីថ្ងៃទី១១ ឧសភា ថា ជនស៊ីវិលយ៉ាងតិច៨៨០នាក់ បានត្រូវស្លាប់ ក្នុងការវាយប្រហារដោយដ្រូននៅស៊ូដង់ រវាងខែមករា និងខែមេសា ឆ្នាំនេះ ។ អ.ស.ប ព្រមានថា ការវាយប្រហារទាំងនេះជម្រុញឲ្យជម្លោះធ្លាក់ចូលក្នុងដំណាក់ការថ្មីកាន់តែបង្ហូរឈាមថែមទៀត ជាង៣ឆ្នាំក្រោយចាប់ផ្ដើមសង្គ្រាមស៊ីវិលក្នុងប្រទេសនេះមក ។
ការវាយប្រហារគ្នាដោយប្រើដ្រូនរបស់កងទ័ពស៊ូដង់ និងកងកម្លាំងប៉ារា ដែលច្បាំងដណ្ដើមអំណាចគ្នាចាប់តាំងពីខែមេសា ឆ្នាំ២០២៣ មក កាន់តែរីកធំឡើងក្នុងទូទាំងប្រទេស រយៈពេលប៉ុន្មានខែចុងក្រោយនេះ។ យោងតាមការិយាល័យសិទ្ធិមនុស្សអ.ស.ប និងក្រុមរបស់ខ្លួននៅស៊ូដង់ថា ការវាយប្រហារដោយដ្រូនបណ្ដាលឲ្យជនស៊ីវិលស្លាប់ដល់យ៉ាងតិច៨៨០នាក់ គឺជាង៨០%នៃជនស៊ីវិលស្លាប់ទាំងអស់ ទាក់ទិននឹងជម្លោះរវាងពីខែមករា ទៅខែមេសា នៃឆ្នាំនេះ។
លោកVOLKER TURK អ្នកទទួលខុសត្រូវខាងសិទ្ធិមនុស្សរបស់អ.ស.បថ្លែងថា ដ្រូនប្រដាប់អាវុធពេលនេះ ក្លាយជាមូលហេតុសំខាន់នៃការស្លាប់បណ្ដាជនស៊ីវិល ។ ការប្រើប្រាស់កាន់តែខ្លាំងឡើងនៃដ្រូន អាចឲ្យការប្រយុទ្ធនៅតែបន្ត ដោយគ្មានការធូរស្រាលទោះជាក្នុងរដូវភ្លៀង ។ លោកបន្តថាការកើនឡើងនៃការប្រទូស្តរ៉ាយគ្នានាបណ្ដាសប្ដាហ៍ខាងមុខ អាចពង្រីកសង្គ្រាមរហូតដល់បណ្ដារដ្ឋនៅភាគកណ្ដាល និងភាគខាងកើតប្រទេស ជាមួយការស្លាប់ជនស៊ីវិលកាន់តែច្រើនក្នុងតំបន់កាន់តែធំ។
តាមលោកVOLKER TURK ថា ប្រសិនបើគ្មានការចាត់វិធានការសមស្របឲ្យបានទាន់ពេលទេ នោះជម្លោះដែលបណ្ដាលឲ្យមនុស្សច្រើនសិបពាន់នាក់ស្លាប់រួចហើយនិងមានជនភៀសខ្លួនដល់ជាង១១លាននាក់ ហើយធ្វើឲ្យតំបន់ជាច្រើនធ្លាក់ក្នុងគ្រោះអត់ឃ្លាន នឹងធ្លាក់ចូលក្នុងដំណាក់កាលថ្មីកាន់តែបង្ហូរឈាមថែមទៀត ៕
ចែករំលែកព័តមាននេះ