ចំណេះដឹង៖ យោងតាមការចុះផ្សាយពីប្រភពបរទេស ការស្ងោរស៊ុបគឺជាកិច្ចការផ្ទះបាយដ៏សាមញ្ញ ប៉ុន្តែសំណួរថា “តើគួរស្រង់ពពុះចេញឬទេ?” នៅតែជាចម្ងល់សម្រាប់មនុស្សជាច្រើន។ ការពិត ពពុះដែលអណ្ដែតលើទឹកស៊ុបមិនមែនសុទ្ធតែជាកាកសំណល់ដែលត្រូវបោះចោលទាំងអស់នោះទេ ដោយអ្នកត្រូវបែងចែកតាមរយៈពណ៌របស់វា៖

ពពុះដែលមានពណ៌ត្នោត ឬក្រហមក្រម៉ៅ គឺជាពពុះដែលអណ្ដែតឡើងដំបូងគេនៅពេលទឹកចាប់ផ្ដើមពុះ។ វាគឺជាឈាមដែលនៅសេសសល់ក្នុងសរសៃឈាមតូចៗនៃសាច់ រួមជាមួយធូលីដី ឬភាពមិនស្អាតដែលតោងជាប់នឹងសាច់។ ពពុះប្រភេទនេះហើយដែលបង្កឱ្យសាច់មានក្លិនឆ្អាម ទឹកស៊ុបល្អក់ និងមើលទៅមិនគួរឱ្យចង់ញ៉ាំ ដូច្នេះអ្នកចាំបាច់ត្រូវតែស្រង់វាចេញឱ្យអស់ភ្លាមៗ។ ផ្ទុយទៅវិញ ពពុះពណ៌សថ្លាដែលអណ្ដែតឡើងតាមក្រោយ គឺជាសារធាតុប្រូតេអ៊ីន និងជាតិខ្លាញ់ល្អដែលរលាយចេញពីសាច់នៅក្រោមសីតុណ្ហភាពខ្ពស់។ ពពុះប្រភេទនេះមានផ្ទុកអាស៊ីតអាមីណូដែលជួយឱ្យទឹកស៊ុបមានរសជាតិផ្អែមឈ្ងុយឆ្ងាញ់ ដូច្នេះបើអ្នកស្រង់វាចេញអស់ វានឹងធ្វើឱ្យសាច់ស្ងោរនោះស្ងួត និងបាត់បង់ជាតិជៅ។

ដើម្បីឱ្យ​ស្ងោរស៊ុបមានពណ៌ស្អាត និងរសជាតិឆ្ងាញ់ អ្នកគួរដាក់សាច់ចូលក្នុងទឹកត្រជាក់ រួចទើបដុតភ្លើងឱ្យពុះសន្សឹមៗ ដើម្បីឱ្យជាតិកខ្វក់ចេញមកក្រៅបានអស់។ បន្ទាប់ពីស្រង់ពពុះខ្មៅចេញរួច ទើបបន្ថែមអំបិល និងខ្ទឹមក្រហមដើម្បីបង្កើនក្លិនឈ្ងុយ។ ជាចុងក្រោយ នៅពេលសាច់ឆ្អិន ការស្រង់សាច់ទៅត្រាំក្នុងទឹកកកភ្លាមៗ នឹងជួយឱ្យសាច់ហាប់ណែន មានពណ៌សផ្កាឈូកស្អាត និងរក្សាភាពទន់ល្មើយពីខាងក្នុងបានយ៉ាងល្អបំផុត៕