ទីក្រុងវ៉ាស៊ីនតោន៖ លោកដូណាល់ត្រាំប្រកាសកាលពីយប់មិញនូវបទឈប់បាញ់រយៈពេលបីថ្ងៃរវាងរុស្ស៊ី និងអ៊ុយក្រែន ហើយនឹងមានការដោះដូរឈ្លើយសឹកគ្នាទៅវិញទៅមកផងដែរ។ បទឈប់បាញ់នឹងអនុវត្តនៅថ្ងៃទី៩, ទី១០ និងទី១១ ខែឧសភាចំពេលដែលរុស្ស៊ីរំលឹកខួប៨១ឆ្នាំនៃទិវាជ័យជម្នះលើរបបណាហ្ស៊ីអាល្លឺម៉ង់។ ក្នុងនោះក៏មានការហែក្បួនព្យុហយាត្រាកងទ័ពផងដែរ។ លោកត្រាំបានបង្ហោះសារនៅលើបណ្ដាញសង្គមថាលោកបានស្នើសុំឱ្យផ្អាកអរិភាពនឹងគ្នារវាងរុស្ស៊ី និងអ៊ុយក្រែន ហើយសំណើរបស់លោកត្រូវថ្នាក់ដឹកនាំប្រទេសទាំង២ឯកភាពទទួលយករួចហើយ។
លោកសរសេររៀបរាប់បន្តទៀតថាបទឈប់បាញ់នឹងរួមបញ្ចូលទាំងការផ្អាកសកម្មភាពចល័តកងទ័ពគ្រប់យ៉ាង ហើយនិងការដូរឈ្លើយសឹកគ្នាម្ខាងៗមួយពាន់នាក់។ លោកអះអាងថាលោកជាអ្នកស្នើសុំដោយផ្ទាល់ ហើយលោកពិតជាអរគុណណាស់ចំពោះលោកពូទីន និងលោកហ្សេឡិនស្គីដែលយល់ព្រមទទួលយកសំណើនេះ។ លោកហ្សេឡិនស្គីបានចុះហត្ថលេខាលើក្រឹត្យកាលពីយប់មិញដែលមានន័យថាទីក្រុងម៉ូស្គូអាចរៀបចំពិធីរំលឹកខួបដោយគ្មានការរំខានទេ។ ប៉ុន្តែលោកបញ្ជាក់ថាបទឈប់បាញ់នេះអនុវត្តតែនៅទីកន្លែងរៀបចំពិធីរំលឹកខួបនេះប៉ុណ្ណោះ ហើយមិនអនុវត្តនៅទីកន្លែងដទៃទៀតនៃប្រទេសរុស្ស៊ីនោះទេ។
លោកហ្សេឡិនស្គីថ្លែងថាបទឈប់បាញ់នឹងចាប់ផ្ដើមនៅថ្ងៃសៅរ៍នេះនៅវេលាម៉ោង១០ព្រឹក ម៉ោងនៅទីក្រុងកៀវ។ មុនពេលរៀបចំពិធីហែក្បួនព្យុហយាត្រា រុស្ស៊ីចាប់ផ្ដើមពង្រឹងសន្តិសុខនៅទីក្រុងម៉ូស្គូព្រោះបារម្ភខ្លាចមានការវាយប្រហារដោយដ្រូនពីសំណាក់យោធាអ៊ុយក្រែន។ អ៊ុយក្រែនឥឡូវនេះមិនធម្មតាទេ បានអភិវឌ្ឍបច្ចេកវិទ្យាទំនើបអាចបញ្ជូនដ្រូនហោះចម្ងាយរាប់ពាន់គីឡូម៉ែត្រទៅវាយប្រហារឆ្ងាយៗដល់ក្នុងទឹកដីរុស្ស៊ីរួមទាំងទីក្រុងម៉ូស្គូផងដែរ។ ទីក្រុងកៀវចោទប្រកាន់ថារុស្ស៊ីបានអ្នករំលោភបទឈប់បាញ់ដែលរុស្ស៊ីខ្លួនឯងជាអ្នកស្នើសុំមុនគេ។
បន្ទាប់ពីរុស្ស៊ីធ្វើខុសនឹងលក្ខខណ្ឌនៃបទឈប់បាញ់កាលពីថ្ងៃពុធ ហើយលោកហ្សេឡិនស្គីសច្ចាថានឹងចាត់វិធានការឆ្លើយតបដោយសមស្របឱ្យដូចអ្វីដែលគេធ្វើដាក់ខ្លួន វិមានក្រឹមឡាំងចាប់ផ្ដើមពង្រឹងសន្តិសុខបន្ថែមពីលើវិធានការសន្តិសុខដែលមានស្រាប់។ ក្នុងនោះក៏មានការរឹតបន្តឹងសន្តិសុខកាន់តែខ្លាំងសម្រាប់លោកពូទីនផងដែរព្រោះលោកនឹងធ្វើជាអធិបតីនៃពិធីហែក្បួនព្យុហយាត្រានោះ។ យោងតាមរបាយការណ៍ពីភ្នាក់ងារសម្ងាត់អ៊ុយក្រែន វិមានក្រឹមឡាំងក៏ដាក់ពង្រាយប្រព័ន្ធការពារដែនអាកាសចាប់ពីថ្នាក់តំបន់រហូតដល់ទីក្រុងម៉ូស្គូផងដែរ៕ ប្រភព៖ យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ