រាជធានីភ្នំពេញ ៖ ជនសង្ស័យម្នាក់ត្រូវប៉ូលិសប៉ុស្តិ៍សង្កាត់ដង្កោចាប់ខ្លួន បានក្រោយពេលលួចម៉ូតូប្រជាពលរដ្ឋ១គ្រឿង ខណៈម្ចាស់ទុកនៅវាលស្រែហើយជាប់រវល់ស្ទូងដក ស្រាប់តែជននេះលួចបានជិះគេចខ្លួន តែម្ចាស់ឃើញក៏ស្រែកឆោឡោនិងប្តឹងប៉ូលិសដេញតាមចាប់ បាន។
រាជធានីភ្នំពេញ ៖ ជនសង្ស័យម្នាក់ត្រូវប៉ូលិសប៉ុស្តិ៍សង្កាត់ដង្កោចាប់ខ្លួនបានក្រោយពេលលួចម៉ូតូប្រជាពលរដ្ឋ១គ្រឿង ខណៈម្ចាស់ទុកនៅវាលស្រែហើយជាប់រវល់ស្ទូងដក ស្រាប់តែជននេះលួចបានជិះគេចខ្លួន តែម្ចាស់ឃើញក៏ស្រែកឆោឡោនិងប្តឹងប៉ូលិសដេញតាមចាប់បាន។
ហេតុការណ៍នេះបានកើតឡើងកាលពីវេលាម៉ោង៥និង២០នាទីល្ងាចថ្ងៃទី១ ខែសីហា ឆ្នាំ២០១១ នៅចំណុចវាលស្រែ ស្ថិតក្នុងភូមិសំបួរ សង្កាត់សាក់សំពៅ ខណ្ឌដង្កោ ។ ជនសង្ស័យឈ្មោះអូន សុង អាយុ៣៨ឆ្នាំ មានស្រុកកំណើតនៅភូមិកំពង់ក្រួស ឃុំកំពង់ក្រួស ស្រុកកំពង់រោទ៍ ខេត្តស្វាយរៀង ។ ចំណែកឯម៉ូតូដែលជននោះលួចធុនសេ១២៥ ស៊េរីឆ្នាំ២០០៨ ពណ៌ខ្មៅ ពាក់ស្លាកលេខភ្នំពេញ 1W-4516 ជាកម្មសិទ្ធិរបស់ស្ត្រីឈ្មោះអេង គឹមលាង អាយុ៤៧ឆ្នាំ ជាកសិករ មានទីលំនៅក្នុងភូមិកំរែង សង្កាត់សាក់សំពៅ ។
តាមប្រភពព័ត៌មានបានឱ្យដឹងថា នៅមុនពេលកើតហេតុស្ត្រីឈ្មោះអេង គឹមលាង បានជិះម៉ូតូចេញពីផ្ទះទៅដកស្ទូងនៅវាលស្រែត្រង់ចំណុចខាងលើ ដែលពេលទៅដល់បានទុកម៉ូតូនៅលើផ្លូវរួចចុះទៅដកស្ទូងឆ្ងាយពីម៉ូតូ ។ ខណៈនោះ ជនសង្ស័យបានដើរទៅជិតរួចធ្វើសកម្មភាពកាច់សោ.កបានសម្រេចហើយឡើងជិះគេចខ្លួនយ៉ាងលឿនសំដៅចូលរាជធានីភ្នំពេញ ប៉ុន្តែនៅពេលជិះម៉ូតូចេញទៅត្រូវម្ចាស់ឃើញទាន់ក៏ស្រែកឆោឡោបង្កឱ្យមានការភ្ញាក់ផ្អើលព្រមទាំងប្តឹងប៉ូលិសឱ្យជួយអន្តរាគមន៍ភ្លាមៗ ដែរ ។
បន្ទាប់ពីទទួលបានព័ត៌មានភ្លាម កម្លាំងប៉ូលិសប៉ុស្តិ៍សង្កាត់ដង្កោបានចេញស្ទាក់ដោយសហការជាមួយប៉ូលិសប៉ុស្តិ៍ផ្សេងៗទៀត ។ មួយសន្ទុះក្រោយមកក៏ប្រទះឃើញមុខសញ្ញាជនសង្ស័យនិងភិនភាគម៉ូតូដែលម្ចាស់រាយការណ៍ក៏ឃាត់ឱ្យឈប់ ប៉ុន្តែជននោះមិនព្រមឈប់ទេ ហើយប៉ូលិសក៏ដេញតាមរហូតដល់ស្ពានដែកផ្លូវចំការដូង ស្ថិតក្នុងភូមិសំបួរ សង្កាត់ដង្កោ ទើបជននោះផ្តួលម៉ូតូចោលរត់គេចខ្លួន ។ ប្រភពដដែលបានបន្តទៀតថា ជនសង្ស័យបានរត់ចូលទៅពួនសម្ងំនៅក្នុងទឹកបឹង ហើយត្រូវកម្លាំងប៉ូលិសប៉ុស្តិ៍សង្កាត់ដង្កោ និងប៉ុស្តិ៍ដែលនៅជាប់គ្នានោះធ្វើការរុករកនិងឡោមព័ទ្ធព្រមទាំងចាប់ខ្លួនបាន ។ បន្ទាប់មកក៏បាននាំទៅប៉ុស្តិ៍ធ្វើការសាកសួរមួយជំហានរួចបញ្ជូនបន្តទៅកាន់ផ្នែកប៉ូលិសព្រហ្មទណ្ឌខណ្ឌដង្កោ ដើម្បីសាកសួរបន្ថែមនិងកសាងសំណុំរឿងបញ្ជូនទៅតុលាការ។
នៅក្នុងវិធានការទប់ស្កាត់ចោរលួចម៉ូតូតាមវាលស្រែនេះ ប៉ូលិសនៃអធិការដ្ឋានស្រុកអង្គស្នួល ខេត្តកណ្តាល បានរឹតបន្តឹងការល្បាត និងធ្វើការផ្សព្វផ្សាយដាស់តឿនជាប្រចាំដល់បងប្អូនប្រជាកសិករដែលជិះម៉ូតូទៅធ្វើស្រែឱ្យមានការប្រុងប្រយ័ត្នជាប់ជានិច្ចកុំឱ្យមានការបាត់បង់ មិនតែប៉ុណ្ណោះបានណែនាំឱ្យពួកគាត់ បើទុកម៉ូតូនៅផ្ទះបានសុំទុកនៅផ្ទះវិញមានសុវត្ថិភាពជាង មិនចាំបាច់ជិះទៅស្រែនោះឡើយ ។
ការផ្សព្វផ្សាយខាងលើបានធ្វើឡើងយូរមកហើយ ឱ្យតែដល់ពេលរដូវវស្សាមកដល់ ព្រោះនៅក្នុងស្រុកអង្គស្នួល មានប្រជាពលរដ្ឋភាគច្រើនជាង៩០ភាគរយជាកសិករ ។ ម្យ៉ាងទៀតសម័យនេះជាសម័យទំនើបពួកគាត់មួយចំនួនមានលទ្ធភាពទិញម៉ូតូល្អស៊េរីទំនើបៗជិះ ហើយពេលទៅធ្វើស្រែអ្នកដែលមានស្រែស្ថិតនៅឆ្ងាយពីផ្ទះបន្តិច តែងនាំគ្នាជិះម៉ូតូទៅធ្វើការដកស្ទូងនៅវាលស្រែខុសប្លែកពីសម័យដើមដែលពួកគាត់ចេញពីផ្ទះទៅធ្វើស្រែ គឺថ្មើរជើង ឬក៏បររទេះគោប៉ុណ្ណោះ ។ ទាក់ទិនទៅនឹងបញ្ហានោះ គឺជាកង្វល់មួយសម្រាប់សមត្ថកិច្ចប៉ូលិសដែលជាអ្នកការពារសុវត្ថិភាព ព្រោះខ្លាចពេលដែលប្រជាពលរដ្ឋរវល់តែស្ទូងដកភ្លេចខ្លួនត្រូវចោរលួចយកម៉ូតូទៅបាត់ ឬចោរប្រដាប់អាវុធទៅភ្ជង់ប្លន់យកជាដើម ៕
ចែករំលែកព័តមាននេះ