ម្ចាស់មេដាយមាសអូឡាំពិកក្រុងប៉េកាំងឆ្នាំ២០០៨ម៉ៃឃើល ហ្វ៊ែលបានកំណត់គោលដៅយ៉ាងមុតមាំរបស់ខ្លួនក្នុងការចូលដណ្តើមមេដាយមាសនៅឯព្រឹត្តិការប្រកួតអូឡាំពិកក្រុងឡុងដ៍ឆ្នាំ២០១២នៅប្រទេសអង់គ្លេស។
នៅទីនោះហ្វ៊ែលមានបំណងយ៉ាងមុតមាំចូលរួមប្រកួតប្រជែងជាមួយកីឡាករជើងខ្លាំងអូស្ត្រាលីIan Thorpe។ កីឡាករThorpeបានវិលចូលប្រកួតវិញបន្ទាប់ពីបានលាឈប់ពីការប្រកួតនានាក្នុងឆ្នាំ២០០៦។ ចូលរួមប្រកួតនៅទីក្រុងឡុងដ៍ឆ្នាំក្រោយThorpeនឹងផ្តោតលើវិញ្ញាសាហែលទឹក៣ប្រភេទក្នុងនោះមានហែលសេរីចម្ងាយ២០០ម៉ែត្រ ហែលបណ្តាក់សេរីចម្ងាយ១០០ម៉ែត្រនិង២០០ម៉ែត្រ។
កាលពីប្រកួតកីឡាអូឡាំពិកក្រុងអាតែនឆ្នាំ២០០៤ កីឡាករហ្វ៊ែល កីឡាករThorpeព្រមទាំងកីឡាករPieter van den Hoogenband បានបង្កើតនូវការប្រណាំងប្រជែងគ្នាដ៏អស្ចារ្យមួយ។ ហ្វ៊ែលសង្ឃឹមថា ការប្រជែងដ៏អស្ចារ្យនោះនឹងកើតមានជាថ្មីម្តងទៀតនៅទីក្រុងឡុងដ៍ឆ្នាំក្រោយ។
ថ្លែងកាលពីដើមសប្តាហ៍នេះនៅទីក្រុងសៀងហៃ ហ្វ៊ែលបានបញ្ជាក់ថា៖ «ការហែលសេរីចម្ងាយ២០០ម៉ែត្របានក្លាយជាវិញ្ញាមួយដែលផ្តល់នូវការសប្បាយ។ បើអាចទទួលបានឱកាសប្រកួតប្រជែងជាមួយកីឡាករThorpeម្តងទៀតវាគឺជាអ្វីមួយដែលខ្ញុំកំពុងទន្ទឹងរង់ចាំ។ ខ្ញុំធ្លាប់បានប្រកួតប្រជែងជាមួយគេ២លើកប៉ុណ្ណោះក្នុងពេលកន្លងមក ហើយការវិលត្រឡប់ចូលប្រកួតវិញគឺជារឿងរំភើបរីករាយបំផុត »។
ហ្វ៊ែលគឺជាកីឡាករម្នាក់ដែលទទួលបានជោគជ័យបំផុតក្នុងអាជីព ខណៈគេដណ្តើមបានមេដាយមាសដល់ទៅ៨គ្រឿងអំឡុងការប្រកួតកីឡាអូឡាំពិកក្រុងប៉េកាំងឆ្នាំ២០០៨។ ប៉ុន្តែការប្រកួតជ្រើសរើសជើងឯកពិភពលោកនៅទីក្រុងសៀងហៃដែលទើបតែបញ្ចប់ទៅនេះ ហ្វ៊ែលបញ្ចប់ត្រឹមចំណាត់ថ្នាក់លេខ២ប៉ុណ្ណោះលើវិញ្ញាសាហែលសេរីចម្ងាយ២០០ម៉ែត្រ។ គេបានបរាជ័យក្រោមថ្វៃដៃកីឡាករមិត្តរួមជាតិខ្លួនរីយ៉ាន ឡូចឆ៍។
ទោះជាយ៉ាងណា ហ្វ៊ែលបានបញ្ជាក់ថា ការចូលរួមរបស់គេក្នុងព្រឹត្តិការនៅក្រុងសៀងហៃគឺដើម្បីវាស់ពីកម្រិតសមត្ថភាពរបស់គេប៉ុនណាងាយស្រួលឲ្យគេរៀបចំខ្លួនមុនការប្រកួតនៅទីក្រុងឡុងដ៍ឆ្នាំក្រោយ ។ បញ្ចប់ការប្រកួតនៅសៀងហៃនេះ ហ្វ៊ែលដណ្តើមបានមេដាយមាស៤គ្រឿង ប្រាក់២និងសំរឹទ្ធិមួយ ៕
ចែករំលែកព័តមាននេះ