ប្រទេសកូរ៉េទាំង២ ៖ តាមទីភ្នាក់ងារព័ត៌មានកូរ៉េខាងត្បូងYONHAPថា កូរ៉េខាងត្បូងនឹងបន្តនយោបាយសន្តិសហវិជ្ជមានសំដៅបង្កើតសន្តិភាពជាមួយកូរ៉េខាងជើង ក៏ទោះបីប្រទេសនេះ ទើបកែប្រែរដ្ឋធម្មនុញ្ញរបស់ខ្លួន សំដៅបង្កើតការចែកគ្នាដាច់រវាងកូរ៉េទាំង២ក្ដី ។ នេះបើតាមសេចក្ដីប្រកាសរបស់វិមានប្រធានាធិបតីកូរ៉េខាងត្បូង កាលពីថ្ងៃទី៧…
ប្រទេសកូរ៉េទាំង២ ៖ តាមទីភ្នាក់ងារព័ត៌មានកូរ៉េខាងត្បូងYONHAPថា កូរ៉េខាងត្បូងនឹងបន្តនយោបាយសន្តិសហវិជ្ជមានសំដៅបង្កើតសន្តិភាពជាមួយកូរ៉េខាងជើង ក៏ទោះបីប្រទេសនេះ ទើបកែប្រែរដ្ឋធម្មនុញ្ញរបស់ខ្លួន សំដៅបង្កើតការចែកគ្នាដាច់រវាងកូរ៉េទាំង២ក្ដី ។ នេះបើតាមសេចក្ដីប្រកាសរបស់វិមានប្រធានាធិបតីកូរ៉េខាងត្បូង កាលពីថ្ងៃទី៧ ឧសភា។
ខុន្ទកាល័យប្រធានាធិបតីកូរ៉េខាងត្បូងគូសបញ្ជាក់ថា រដ្ឋាភិបាលនឹងពិនិត្យដោយលម្អិតការកែប្រែរដ្ឋធម្មនុញ្ញរបស់កូរ៉េខាងជើង។ ផ្អែកលើការពិនិត្យនោះ រដ្ឋាភិបាលនឹងបន្តជាប់ជានិច្ច នយោបាយសន្តិសហវិជ្ចមានរបស់ខ្លួន សម្រាប់ឧបទ្វីបកូរ៉េ ។ រដ្ឋធម្មនុញ្ញកែប្រែថ្មីរបស់កូរ៉េខាងជើងត្រដាងដោយក្រសួងបង្រួបបង្រួមកូរ៉េខាងត្បូង កាលពីថ្ងៃទី៦ ឧសភា ឆ្លុះបញ្ចាំងពីការផ្លាស់ប្ដូរនយោបាយរបស់មេដឹកនាំកូរ៉េខាងជើង លោកគីម ជុងអ៊ុន ដែលបានបង្ហាញកាលពីឆ្នាំ២០១៣ ចាត់ទុកកូរ៉េខាងត្បូង ជាប្រទេសមួយដាច់ដោយឡែកស្រឡះ ពុំមែនជាដៃគូសម្រាប់ការបង្រួបបង្រួមជាយថាហេតុឡើយ ។
រដ្ឋធម្មនុញ្ញកែប្រែថ្មីលុបចោលការបកស្រាយមុន ពីការបង្រួបបង្រួមកូរ៉េដោយកំណត់ពីដែនដីកូរ៉េខាងជើង តែមិននិយាយយោងណាមួយពីកូរ៉េខាងត្បូងឡើយ ។ ទោះបីយ៉ាងណា រដ្ឋធម្មនុញ្ញកែប្រែថ្មីនេះ មិនចែងថា កូរ៉េខាងត្បូងជាសត្រូវឡើយ ខណៈតាមការពិត លោកគីមជុងអ៊ុន ចាត់ទុកកូរ៉េទាំង២ថា ជាប្រទេសប្រទូស្តរ៉ាយគ្នា និងចាត់ទុកកូរ៉េខាងត្បូងថាជាប្រជាជាតិដែលប្រទូស្តរ៉ាយបំផុត។
ការកែប្រែរដ្ឋធម្មនុញ្ញកូរ៉េខាងជើងនេះ សំដៅជាពិសេសបោះចោលទិសដៅបង្រួបបង្រួមកូរ៉េទាំង២ ព្រមទាំងទទួលស្គាល់រដ្ឋ២ ដាច់ដោយឡែកពីគ្នានៅឧបទ្វីបកូរ៉េ។ ភ្នាក់ងារស៊ើបការណ៍ជាតិកូរ៉េខាងត្បូងយល់ឃើញថា ការប្រទូស្តរ៉ាយគ្នារវាងកូរ៉េទាំង២តាមមើលទៅ នឹងត្រូវកាត់បន្ថយយ៉ាងខ្លាំង ក៏ទោះបីមានការទទួលស្គាល់រដ្ឋ២ក៏ដោយ។ រដ្ឋធម្មនុញ្ញថ្មីរបស់កូរ៉េខាងជើងនោះបានពង្រឹងលក្ខន្តិកៈនិងអំណាចរបស់លោកគីមជុងអ៊ុនប្រធានគណៈកម្មាធិការកិច្ចការរដ្ឋដោយឲ្យលោកក្លាយជាប្រមុខរដ្ឋ ។
រដ្ឋធម្មនុញ្ញកែប្រែថ្មីរបស់កូរ៉េខាងជើង កំណត់ដែរពីដែនដីជាតិកូរ៉េខាងជើងដែលមានព្រំដែនភាគខាងជើងជាប់ជាមួយចិន និងរុស្ស៊ី និងភាគខាងត្បូងជាប់ជាមួយកូរ៉េខាងត្បូង ព្រមទាំងកំណត់ដែនទឹកនិងដែនអាកាសរបស់ខ្លួនដែលបែបនេះជាការបញ្ចប់គំនិតប្រង្រួបបង្រួមកូរ៉េ ៕
ចែករំលែកព័តមាននេះ