ខេត្តកែប ៖ វិថីតេជោសន្តិភាពឆ្នេរអង្កោល មិនត្រឹមតែជាសមិទ្ធផលរូបវន្តដ៏រឹងមាំប៉ុណ្ណោះទេ ប៉ុន្តែបាននិងកំពុងក្លាយជាមេដែកឆក់យកបេះដូងភ្ញៀវទេសចរ តាមរយៈការលើកកម្ពស់សោភ័ណភាពខេត្តកែប ឱ្យកាន់តែមានរបៀបរៀបរយ និងស្រស់បំព្រង ។ ជាក់ស្តែងក្រសួងសាធារណការ…
ខេត្តកែប ៖ វិថីតេជោសន្តិភាពឆ្នេរអង្កោល មិនត្រឹមតែជាសមិទ្ធផលរូបវន្តដ៏រឹងមាំប៉ុណ្ណោះទេ ប៉ុន្តែបាននិងកំពុងក្លាយជាមេដែកឆក់យកបេះដូងភ្ញៀវទេសចរ តាមរយៈការលើកកម្ពស់សោភ័ណភាពខេត្តកែប ឱ្យកាន់តែមានរបៀបរៀបរយ និងស្រស់បំព្រង ។
ជាក់ស្តែងក្រសួងសាធារណការ និងដឹកជញ្ជូន បានប្រកាសនាថ្ងៃទី៧ ខែឧសភា ឆ្នាំ២០២៦នេះថា ៖ វិថីតេជោសន្តិភាពឆ្នេរអង្កោល បាន និងកំពុងដើរតួនាទីជាខ្សែផ្លូវលើកសម្រស់ទេសចរណ៍ខេត្តកែបឱ្យកាន់តែស្រស់ស្អាត និងមានរបៀបរៀបរយ តាមរយៈការបង្កើតឱ្យមានចំណតរថយន្ត ផ្លូវជិះកង់ និងផ្លូវថ្មើរជើងសម្រាប់ការដើរកម្សាន្តរបស់បងប្អូនប្រជាពលរដ្ឋ និងភ្ញៀវទេសចរជាតិ-អន្តរជាតិនានា ។
ក្រសួងសាធារណការ និងដឹកជញ្ជូន បានបន្តថា បន្ថែមពីនេះ វិថីនេះក៏ជាខ្សែផ្លូវតភ្ជាប់ពីក្រុងកែបទៅកាន់តំបន់សហគមន៍ទេសចរណ៍ និងនេសាទនៅក្នុងឃុំអង្កោល និងលាតសន្ធឹងឆ្លងកាត់តំបន់កសិកម្ម តំបន់ស្រែអំបិល តំបន់ព្រៃកោងកាង និងតភ្ជាប់ជាមួយផ្លូវខេត្តលេខ១៣៣២ ក្នុងទិសដៅទៅមករវាងស្រុកដំណាក់ចង្អើរ និងច្រកលក ខេត្តកំពត(ព្រំដែនកម្ពុជា-វៀតណាម) រួមទាំងតភ្ជាប់ជាមួយហេដ្ឋារចនាសម្ព័ន្ធខ្សែផ្លូវមួយចំនួននៅក្នុងភូមិសាស្ត្រខេត្តកែប ដើម្បីភ្ជាប់ទៅកាន់តំបន់ទីប្រជុំជន តំបន់ភូមិឋាន និងតំបន់ផ្សេងៗទៀតនៅក្នុងខេត្តកែប។
សូមជម្រាបជូនថា វិថីតេជោសន្តិភាពឆ្នេរអង្កោលនេះ មានប្រវែងសរុប ១២ ៦៤៥ម៉ែត្រ ស្ថិតនៅភូមិកែប និងភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប ហើយត្រូវបានសម្ពោធបើកឱ្យប្រើប្រាស់កាលពីថ្ងៃទី១១ ខែវិចិ្ឆកា ឆ្នាំ២០២៤៕
ចែករំលែកព័តមាននេះ