រថយន្តដង្ហែក្បួនលោក ត្រាំ ប្រទះឃើញបើកបរនៅទីក្រុងប៉េកាំង មុនដំណើរទស្សនកិច្ចសប្តាហ៍ក្រោយ
ទីក្រុងប៉េកាំង ៖ មុនពេលប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ទៅដល់ទីក្រុងប៉េកាំង ប្រទេសចិន…
ទីក្រុងប៉េកាំង ៖ មុនពេលប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ទៅដល់ទីក្រុងប៉េកាំង ប្រទេសចិន នៅថ្ងៃទី១៤ ខែឧសភា ឆ្នាំ២០២៦ សម្រាប់ដំណើរទស្សនាកិច្ចរយៈពេល២ថ្ងៃ ប៉ុន្តែរថយន្តការពារកម្រិតខ្ពស់ក្នុងក្បួនរថយន្តរបស់លោក ត្រូវបានប្រទះឃើញបើកបរក្នុងទីក្រុងប៉េកាំងរួចទៅហើយ។ នេះបើតាមប្រភពពីកាសែត South China Morning Post ចេញផ្សាយនៅថ្ងៃទី៧ ខែឧសភា ឆ្នាំ២០២៦។
យោងតាមរូបភាពមួយចំនួនដែលត្រូវបានចែកចាយលើបណ្តាញសង្គមចិន កាលពីថ្ងៃទី៦ ខែឧសភា បានបង្ហាញពីរថយន្ត SUV ពណ៌ខ្មៅ ២ គ្រឿងកញ្ចក់ពណ៌ខ្មៅក្រឹបជាមួយផ្លាកលេខរដ្ឋាភិបាលអាមេរិក ត្រូវបានប្រទះឃើញលើផ្លូវហាយវ៉េមួយក្នុងទីក្រុងប៉េកាំង ដែលជាសញ្ញានៃការចាប់ផ្តើមការពង្រឹងសន្តិសុខយ៉ាងខ្លាំង សម្រាប់ព្រឹត្តិការណ៍ការទូតដ៏សំខាន់បំផុតប្រចាំឆ្នាំនេះ គឺកិច្ចប្រជុំកំពូលចិន-សហរដ្ឋអាមេរិក។
បណ្តាញសង្គមចិនកំពុងតែផ្ទុះការជជែកដេញដោលពាក់ព័ន្ធនឹងរូបភាពបង្ហាញពីរថយន្ត Chevrolet Suburban ដ៏រឹងមាំ២គ្រឿងរបស់ភ្នាក់ងារសេវាសម្ងាត់សហរដ្ឋអាមេរិក (US Secret Service) ដែលតែងបម្រើជារថយន្តការពារចម្បងក្នុងក្បួនរថយន្តប្រធានាធិបតីអាមេរិក អមដំណើររថយន្តដឹកប្រធានាធិបតីដែលមានរហស្សនាមថា «The Beast»។
រថយន្ត SUV ទាំងនេះ ត្រូវបានរាយការណ៍ថាបានដឹកមកដល់ទឹកដីប្រទេសចិនក្នុងរយៈពេលប៉ុន្មានថ្ងៃថ្មីៗនេះ តាមរយៈយន្តហោះដឹកជញ្ជូន C-17 Globemaster III របស់កងទ័ពអាកាសអាមេរិក។ ចាប់តាំងពីថ្ងៃទី១ ខែឧសភាមក យន្តហោះ C-17 ជាច្រើនគ្រឿងបានចុះចតនៅអាកាសយានដ្ឋានអន្តរជាតិក្រុងប៉េកាំង ដោយដឹកជញ្ជូនបណ្តាឧបករណ៍ឯកទេសសម្រាប់ដំណើរទស្សនកិច្ចរបស់ប្រធានាធិបតី រួមទាំងរថពាសដែក ឧបករណ៍ទំនាក់ទំនងសេវាសម្ងាត់ និងក្រុមការងារសន្តិសុខកម្រិតខ្ពស់ផងដែរ។
យ៉ាងណាមិញ គេមិនទាន់ឃើញវត្តមានកំពូលរថយន្តដឹកប្រធានាធិបតីអាមេរិក «The Beast» នៅឡើយទេ ដោយបង្កើតសំនួរជាច្រើនក្នុងចំណោមអ្នកនិយមលេងបណ្តាញសង្គមចិនថា តើ «The Beast» មកដល់ទីក្រុងប៉េកាំងហើយឬនៅ?
គួរបញ្ជាក់ថា «The Beast» ដែលត្រូវបានគេចាត់ទុកយ៉ាងទូលំទូលាយថាបន្ទាយចល័តដ៏រឹងមាំនោះ គឺជារថយន្តពាសដែក Limousine របស់ប្រធានាធិបតីអាមេរិកផលិតដោយក្រុមហ៊ុន Cadillac ដែលជាបុត្រសម្ពន្ធរបស់ក្រុមហ៊ុន General Motors (GM)។ យោងតាមក្រុមហ៊ុន GM បានបង្ហាញថា កំណែទម្រង់បច្ចុប្បន្នគឺផ្អែកទៅលើម៉ូដែល Cadillac CT6 ហើយត្រូវបានដាក់ឱ្យប្រើប្រាស់លើកដំបូងក្នុងឆ្នាំ ២០១៨ អំឡុងពេលដំណើរទស្សនកិច្ចរបស់លោក ត្រាំ ទៅកាន់ទីក្រុងញូវយ៉ក។
លក្ខណៈពិសេសរបស់ «The Beast» ដែលមានតម្លៃ ១,៥ លានដុល្លារអាមេរិកក្នុង១គ្រឿងនោះ ដោយតួរថយន្តត្រូវបានផលិតពីដែកថែប អាលុយមីញ៉ូម សេរ៉ាមិច និងទីតានីញ៉ូមមានកម្រាស់រហូតដល់ ២០,៣ សង់ទីម៉ែត្រ ទម្ងន់ប្រហែល ៦ ៨០០ គីឡូក្រាម ទៅ ៩ ១០០ គីឡូក្រាម ដែលអាចការពារគ្រាប់កាំភ្លើង និងការវាយប្រហារដោយកាំភ្លើងធំ។ បង្អួចទៀតសោត បំពាក់ដោយកញ្ចក់ការពារគ្រាប់កាំភ្លើងច្រើនស្រទាប់កម្រាស់ ៧,៦ សង់ទីម៉ែត្រ។
កំពូលរថយន្តដែលមានកៅអីចំនួន៧មួយនេះ ក៏ត្រូវបានរាយការណ៍ថាប្រព័ន្ធមើលឃើញពេលបើកបរយប់ងងឹត កាណុងបាញ់ឧស្ម័នបង្ហូរទឹកភ្នែក របាំងផ្សែង និងដៃទ្វារអគ្គិសនីដ៏ទំនើបផងដែរ។ កាប៊ីនបិទជិតដែលមានការផ្គត់ផ្គង់អុកស៊ីសែនផ្ទាល់ខ្លួន ដើម្បីការពារប្រឆាំងនឹងការវាយប្រហារអាវុធគីមី និងអាចបូមខ្យល់បរិសុទ្ធចូលក្នុងកាប៊ីនក្នុងករណីមានការវាយប្រហារ។ មិនតែប៉ុណ្ណោះ វាមានទូទឹកកកតូចមួយ ដែលរក្សាទុកឈាមដែលមានប្រភេទដូចគ្នាទៅនឹងឈាមរបស់ប្រធានាធិបតី ដើម្បីត្រៀមលក្ខណៈផ្ទេរឈាមជាបន្ទាន់ក្នុងករណីរងរបួស។
រថយន្តក៏បំពាក់ឧបករណ៍ពិសេសអនុញ្ញាតឱ្យរថយន្តនៅតែអាចបើកបរបាន ទោះបីជាសំបកកង់ត្រូវគេបាញ់ធ្លាយ ឬបំផ្លាញក៏ដោយ ព្រមទាំងបំពាក់បច្ចេកវិទ្យាទំនើបបំផុតជាច្រើនផ្សេងទៀត រួមមានប្រព័ន្ធអ៊ីនធឺណិត បណ្តាញទូរស័ព្ទមានសុវត្ថិភាពខ្ពស់ ពិសេសឧបករណ៍សម្រាប់បញ្ជូនកូដសម្ងាត់បញ្ជាឱ្យប្រើប្រាស់អាវុធនុយក្លេអ៊ែរនុយក្នុងករណីអាសន្ន៕
ចែករំលែកព័តមាននេះ