ទីក្រុងហ្សឺណែវ៖ អង្គការសុខភាពពិភពលោកថ្លែងថាមេរោគហាន់តាវីរុសដែលរីករាលដាលនៅក្នុងនាវាទេសចរណ៍នោះមិនអាចក្លាយជាការឆ្លងរាលដាលកម្រិតទូទាំងពិភពលោកដូចជំងឺកូវីដ១៩ជាដាច់ខាត។ ប៉ុន្តែគេរំពឹងថាមេរិគនេះរាតត្បាតជាបន្តទៀត។ អង្គការនេះបញ្ជាក់ថាករណីឆ្លងមេរោគនេះ៥នាក់ត្រូវគេបញ្ជាក់ថាពិត។ លទ្ធភាពនៃការឆ្លងច្រើនឡើងៗអាចនឹងកើតមានព្រោះមេរោគនេះអាចសម្ងំនៅក្នុងខ្លួនមនុស្សរហូតដល់ទៅ៦សប្ដាហ៍មុននឹងចេញរោគសញ្ញា។ នៅក្នុងសន្និសីទសារព័ត៌មានថ្ងៃនេះ អ្នកជំនាញខាងជំងឺឆ្លងរបស់អង្គការសុខភាពពិភពលោកចង់បែងចែកឱ្យដាច់ពីគ្នារវាងមេរោគនេះ និងមេរោគកូវីដ១៩។
មន្ត្រីរូបនេះចង់បញ្ជាក់ត្រង់កន្លែងនេះឱ្យច្បាស់ថានេះមិនមែនជាមេរោគសា ឬកូវីដទី២ទេ។ នេះមិនមែនជាការចាប់ផ្ដើមនៃមេរោគកូវីដឡើយ។ នេះជាមេរោគដែលឆ្លងរាលដាលនៅក្នុងកប៉ាល់។ លោកស្រីពន្យល់ថារបៀបឆ្លងរាលដាលរបស់មេរោគហាន់តាវីរុសខុសគ្នាពីមេរោគកូរ៉ូណាវីរុស។ វីរុសនេះឆ្លងតាមរយៈការមានទំនាក់ទំនងជិតស្និទ្ធជាមួយនឹងមនុស្សម្នាក់ទៀត។ អាជ្ញាធរកំពុងចាត់វិធានការសម្អាតកប៉ាល់នោះដើម្បីជាការបង្ការមិនឱ្យមេរោគនេះឆ្លងទៅអ្នកដទៃទៀត។
អាជ្ញាធរនៅទ្វីបអឺរ៉ុបក៏បានអះអាងផងដែរថាករណីរាតត្បាតនៃមេរោគហាន់តាវីរុសនៅមានកម្រិតទាបនៅឡើយទេ។ អ្នកនាំពាក្យសហភាពអឺរ៉ុបថ្លែងថាបើយោងតាមភស្តុតាងដែលប្រមូលបាន ហានិភ័យនៃការផ្ទុះមេរោគនេះនៅអឺរ៉ុបមានកម្រិតទាប។ រហូតមកដល់ពេលនេះ ហាន់តាវីរុសបានសម្លាប់មនុស្ស៣នាក់នៅលើនាវាទេសចរណ៍ និងធ្វើឱ្យមនុស្ស៨នាក់ធ្លាក់ខ្លួនឈឺ។ នោះជានាវាទេសចរណ៍ដោតទង់ជាតិប្រទេសហូឡង់ឈ្មោះហុនឌាស (Hondius) ដែលកំពុងនៅទីទើរៗលើឆ្នេរសមុទ្រប្រទេសខេបវើត (Cape Verde) ដោយមានមនុស្សជិត១៥០នាក់នៅលើនោះ។
នាវានេះចាកចេញដំណើរពីប្រទេសអាហ្សង់ទីនកាលពីថ្ងៃទី១ ខែមេសា ហើយគ្រោងឈប់សម្រាកនៅតំបន់អង់តាក់ទិច, កោះហ្វកលែន (Falkland) និងទីតាំងជាច្រើនទៀតតាមផ្លូវធ្វើដំណើររបស់ខ្លួន។ នាយកអង្គការសុខភាពពិភពលោក លោកតេដ្រូស ថ្លែងថាអ្នកជំងឺបីនាក់ដែលសង្ស័យថាបានឆ្លងមេរោគហាន់តាវីរុសត្រូវបានជម្លៀសចេញតាមយន្តហោះទៅព្យាបាលជំងឺនៅប្រទេសហូឡង់។ លោកបានបង្ហោះសារនៅលើបណ្ដាញអ៊ិចថាសម្រាប់ដំណាក់កាលនេះ ហានិភ័យជាទូទៅដោយសារមេរោគនេះនៅមានកម្រិតទាបនៅឡើយទេ។ សូមជម្រាបថាមេរោគហាន់តាវីរុសច្រើនរស់នៅក្នុងខ្លួនសត្វកកេរ៕ ប្រភព៖ យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ