ខេត្តតាកែវ ៖ កាលពីរសៀលថ្ងៃទី២៩ កក្កដា កន្លងមកមានករណីគ្រោះថ្នាក់ចរាចរណ៍មួយកើតឡើងនៅតាមបណ្តោយផ្លូវ ជាតិលេខ៣ត្រង់ចំណុចចន្លោះបង្គោលគីឡូម៉ែត្រលេខ៩០-៩១ស្ថិតក្នុង ភូមិយាយឡ ឃុំត្រាំកក់ ស្រុកត្រាំកក់ បណ្តាលឱ្យបុរសអ្នកជិះកង់ម្នាក់ស្លា.ប់នៅលើចិញ្ចើមផ្លូវដោយ
ខេត្តតាកែវ ៖ កាលពីរសៀលថ្ងៃទី២៩ កក្កដា កន្លងមកមានករណីគ្រោះថ្នាក់ចរាចរណ៍មួយកើតឡើងនៅតាមបណ្តោយផ្លូវជាតិលេខ៣ត្រង់ចំណុចចន្លោះបង្គោលគីឡូម៉ែត្រលេខ៩០-៩១ស្ថិតក្នុងភូមិយាយឡ ឃុំត្រាំកក់ ស្រុកត្រាំកក់ បណ្តាលឱ្យបុរសអ្នកជិះកង់ម្នាក់ស្លាប់នៅលើចិញ្ចើមផ្លូវដោយសាររថយន្តកូរ៉េពណ៌សពាក់ស្លាកលេខ២A០០៦៧ កំពតធ្វើដំណើរស្របទិសគ្នាពីកើតទៅលិចជ្រុលទៅបុកកង់នៅលើចិញ្ចើមផ្លូវខាងឆ្វេងជិតចំណតរថយន្តក្រុង។
អ្នកដំណើរដែលចូលហូបបាយនៅក្នុងហាងក្បែរកន្លែងកើតហេតុនិយាយថា បុរសឈ្មោះក្រូច អើង អាយុ៦១ឆ្នាំ នៅភូមិយាយឡ ឃុំត្រាំកក់ បន្ទាប់ពីជួសជុលកង់ហើយក៏ជិះឆ្លងផ្លូវជាតិសំដៅទៅផ្ទះរបស់គាត់ ហើយស្របពេលនោះរថយន្តកូរ៉េពណ៌សបើកបរដោយឈ្មោះកង វី ភេទប្រុស អាយុ៥០ឆ្នាំ នៅភូមិពស់ពង ឃុំនារាយណ៍ ស្រុកឈូក ខេត្តកំពត មកដល់ជិតព្យាយាមជាន់ហ្វ្រាំង តែទាំងអ្នកជិះកង់ និងរថយន្តនៅតែប្រជែងគ្នាទៅមុនក៏ជ្រុលទៅបុកកង់នៅលើចិញ្ចើមផ្លូវខាងឆ្វេង។ អ្នកឃើញហេតុការណ៍មួយចំនួនទៀតនិយាយថា រថយន្តបើកមិនសូវលឿនប៉ុន្មានទេ ក៏ប៉ុន្តែមិនដឹងថា យ៉ាងម៉េចបានជាបុកអ្នកជិះកង់ដួលបោកក្បាលបែកស្លាប់បែបនេះ។
តាមប៉ូលិសប៉ុស្តិ៍រដ្ឋបាលឃុំត្រាំកក់ និយាយថា ម្ចាស់រថយន្តពេលបុកហើយមិនរត់គេចទៅណាទេ គឺបានចុះទៅមើលជនរងគ្រោះ ហើយដើរទៅកាន់ប៉ុស្តិ៍រដ្ឋបាលតែម្តង។ ដោយមនោសញ្ចេតនាអាណិតអាសូរជនរងគ្រោះ អ្នកបើកបររថយន្តបានផ្តល់ប្រាក់ចំនួន៥លាន៣០ម៉ឺនរៀលដល់ក្រុមគ្រួសារដើម្បីយកសពទៅធ្វើបុណ្យតាមប្រពៃណី។
រថយន្តនិងអ្នកបើកបរត្រូវប៉ូលិសស្រុកត្រាំកក់បញ្ជូនទៅកាន់ស្នងការដ្ឋានខេត្តតាកែវដើម្បីចាត់ការតាមច្បាប់។ តាមការឱ្យដឹងពីលោកអ៊ុន សារិន ស្នងការរងទទួលបន្ទុកផ្នែកចរាចរណ៍ថា តាមផ្លូវច្បាប់រថយន្តដែលបុកមនុស្សស្លាប់ជាទោសមួយធ្ងន់ណាស់ ដូច្នេះលោកពុំអាចដោះស្រាយបានត្រឹមស្នងការដ្ឋាននគរបាលទេ គឺត្រូវបញ្ជូនទៅតុលាការ ៕
ចែករំលែកព័តមាននេះ