អន្តរជាតិ ៖ តម្លៃប្រេងឆៅអន្តរជាតិបានកើនឡើងយ៉ាងខ្លាំង ខណៈសហរដ្ឋអាមេរិក និងអ៊ីរ៉ង់ កាលពីថ្ងៃទី ៤ ខែឧសភា ឆ្នាំ ២០២៦ ចាប់ផ្តើមការវាយប្រហារថ្មី ដើម្បីគ្រប់គ្រងច្រកសមុទ្រហ័រមូស (Hormuz​) បានធ្វើឱ្យបទឈប់បាញ់ដ៏ផុយស្រួយរវាងភាគីទាំងពីរកំពុងឈានទៅរកភាពបរាជ័យ ។ នេះបើតាមប្រភពពី Aljazeera, Reuters និងប្រភពផ្សេងទៀតបានចេញផ្សាយ ។

តម្លៃប្រេងឆៅប្រភេទ Brent ដែលជាតម្លៃគោលសម្រាប់ពិភពលោក បានកើនឡើងជិត ៦% កាលពីថ្ងៃទី ៤ ខែឧសភា ដល់ ១១៤,៤៤ដុល្លារអាមេរិកនៅក្នុងមួយបារ៉ែល ។ ប៉ុន្តែតម្លៃបានធ្លាក់ចុះបន្តិចនៅព្រឹកថ្ងៃទី ៥ ខែឧសភា ដោយជួញដូរនៅក្នុងតម្លៃ ១១២,៩ដុល្លារគិតត្រឹមម៉ោង ១២ ថ្ងៃត្រង់ (ម៉ោងនៅកម្ពុជា) ។

ការកើនឡើងចុងក្រោយបានកើតឡើង បន្ទាប់ពីយោធាអាមេរិកបានប្រកាសថា ខ្លួនបានកម្ទេចទូកតូចៗ ៦គ្រឿងរបស់អ៊ីរ៉ង់ ជាការឆ្លើយតបទៅនឹងការវាយប្រហាររបស់អ៊ីរ៉ង់ទៅលើបណ្តាកប៉ាល់ដឹកជញ្ជូនក្នុងច្រកសមុទ្រហ័រមូស ។ មិនតែប៉ុណ្ណោះ កំពង់ផែប្រេងមួយនៅក្នុងប្រទេសអេមីរ៉ាតអារ៉ាប់រួម​ ដែលជាទីតាំងមូលដ្ឋានយោធាធំមួយរបស់អាមេរិក ក៏រងការវាយប្រហារដោយមីស៊ីល និងដ្រូនរបស់អ៊ីរ៉ង់ផងដែរ ។

ភាពតានតឹងថ្មីនេះកើតឡើង បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃទី ៤ ខែឧសភា កន្លងទៅបានប្រកាសចាប់ផ្តើម​បេសកកម្ម​ជើង​ទឹក​ថ្មី​មួយមានឈ្មោះ​ថា គម្រោងសេរីភាព ឬ Project Freedom ដើម្បី​ជួយ​សង្គ្រោះ​បណ្តា​កប៉ាល់ និង​នាវិក​ប្រហែល២ម៉ឺន​នាក់ ដែល​កំពុង​ជាប់​គាំង​​ក្នុង​ច្រក​សមុទ្រ​ហ័​រ​មូស ឱ្យ​ចាកចេញ​ដោយ​សុវត្ថិភាព​ ។

ទោះបីជាការប្រកាសពីលោកប្រធានាធិបតី ត្រាំ យ៉ាងណាក៏ដោយ ក៏បណ្តាក្រុមហ៊ុនដឹកជញ្ជូនហាក់នៅតែស្ទាក់ស្ទើរក្នុងការឆ្លងកាត់ផ្លូវទឹកនេះ ដោយសារតែបារម្ភអំពីសុវត្ថិភាព បន្ទាប់ពីមានរបាយការណ៍អំពីការវាយប្រហារកប៉ាល់ដឹកជញ្ជូនពីសំណាក់អ៊ីរ៉ង់ ។

មួយវិញទៀត បើទោះបីជាយោធាអាមេរិកបានរាយការណ៍ថា កប៉ាល់ដឹកទំនិញអាមេរិក២គ្រឿងបានធ្វើដំណើរឆ្លងកាត់ច្រកសមុទ្រហ័រមូស បន្ទាប់ពីការប្រកាសរបស់លោក ត្រាំ យ៉ាងក៏ក្តី ក៏សកម្មភាពចរាចរណ៍ផ្លូវទឹកក្នុងតំបន់នេះ នៅមិនទាន់មានសញ្ញាបង្ហាញពីការវិលត្រឡប់ទៅរកសភាពមមាញឹកខ្លាំងឡើងវិញនៅឡើយទេ ។

ជាមួយគ្នានោះដែរ លោក Stephen Cotton អគ្គលេខាធិការសហព័ន្ធកម្មករដឹកជញ្ជូនអន្តរជាតិ (ITF) បានសង្កត់ធ្ងន់ថា មិនគួរមានការស្នើសុំឱ្យកប៉ាល់ធ្វើដំណើរឆ្លងកាត់ច្រកសមុទ្រហ័រមូស ដែលកំពុងមានជម្លោះនោះទេ លុះត្រាតែមានការធានាសុវត្ថិភាពពេញលេញ ៕