ទីក្រុងម៉ូស្គូ៖ ថ្ងៃនេះ អ៊ុយក្រែនបញ្ជូនដ្រូនហោះប្រសាចទាំងហ្វូងៗទៅវាយប្រហារកំពង់ផែព្រីម៉ស់ (Primorsk) នៅសមុទ្របាល់ទិចបណ្ដាលឱ្យមានភ្លើងឆេះសន្ធោសន្ធៅ។ នេះបើយោងតាមអ្វីដែលអភិបាលតំបន់កើតហេតុខាងលើ លោកអាឡិចសាន់ដឺ ដ្រូសដឹនកូ (Alexander Drozdenko)…
ទីក្រុងម៉ូស្គូ៖ ថ្ងៃនេះ អ៊ុយក្រែនបញ្ជូនដ្រូនហោះប្រសាចទាំងហ្វូងៗទៅវាយប្រហារកំពង់ផែព្រីម៉ស់ (Primorsk) នៅសមុទ្របាល់ទិចបណ្ដាលឱ្យមានភ្លើងឆេះសន្ធោសន្ធៅ។ នេះបើយោងតាមអ្វីដែលអភិបាលតំបន់កើតហេតុខាងលើ លោកអាឡិចសាន់ដឺ ដ្រូសដឹនកូ (Alexander Drozdenko) បង្ហោះសារនៅលើតេឡេក្រាម។ ហេតុការណ៍នេះកើតឡើងចំពេលដែលអ៊ុយក្រែនបើកយុទ្ធនាការវាយប្រហារពេញផ្ទៃប្រទេសរុស្ស៊ី។
លោកដ្រូសដឹនកូថ្លែងថាដ្រូនជាង៦០គ្រឿងត្រូវបានយោធារុស្ស៊ីបាញ់ទម្លាក់កាលពីយប់មិញនៅតំបន់ឡេនីនក្រាត (Leningrad)។ ក្រោយការវាយប្រហារទៅលើកំពង់ផែព្រីម៉ស់នោះមិនមានការហៀរប្រេងចេញមកខាងក្រៅទេ។ ប្រសិនបើមានរឿងនេះកើតឡើងមែនប្រាកដជាវីវរធំជាមិនខានព្រោះទីនេះជាកន្លែងស្តុកទុកប្រេងដ៏ធំសម្រាប់នាំចេញ។ ភ្លើងដែលឆេះក្រោយការវាយប្រហារនោះក៏ត្រូវបានពន្លត់អស់ផងដែរ។
ព្រីម៉ស់ជាច្រកផ្លូវសម្រាប់នាំចេញប្រេងដ៏ធំបំផុតមួយរបស់រុស្ស៊ី អាចស្តុកទុកប្រេងបាន១លានបារ៉ែលក្នុងមួយថ្ងៃៗ។ កំពង់ផែនេះរងការវាយប្រហារជាច្រើនដងមកហើយត្រឹមតែរយៈពេលប៉ុន្មានខែចុងក្រោយនេះប៉ុណ្ណោះ។ អ៊ុយក្រែនកំពុងសម្រុកវាយប្រហារហេដ្ឋារចនាសម្ព័ន្ធថាមពលរបស់រុស្ស៊ី ហើយក៏វាយប្រហារគោលដៅដទៃទៀតផងដែរនៅពេលដែលដំណើរការចរចាដែលមានអាមេរិកធ្វើជាអ្នកសម្របសម្រួលនោះហាក់ដូចជានៅទ្រឹងមួយកន្លែង។
យោធាអ៊ុយក្រែនក៏បានវាយប្រហារកប៉ាល់ដឹកប្រេងរបស់រុស្ស៊ី២គ្រឿងនៅលើដែនសមុទ្រដែលជាច្រកចេញចូលនៃកំពង់ផែនៅសមុទ្រខ្មៅផងដែរ។ នេះបើយោងតាមការអះអាងរបស់លោកហ្សេឡិនស្គី។ លោកថ្លែងថាកប៉ាល់ទាំងនេះត្រូវគេប្រើប្រាស់ដើម្បីដឹកជញ្ជូនប្រេងឆៅយ៉ាងសកម្ម។ ប៉ុន្តែចាប់ពីពេលនេះតទៅ ពួកគេលែងអាចធ្វើដូច្នេះបានតទៅទៀតហើយ។ លោកថាសមត្ថភាពវាយប្រហាររបស់អ៊ុយក្រែនរយៈចម្ងាយឆ្ងាយនឹងបន្តធ្វើយ៉ាងខ្លាំងក្លាទាំងនៅលើលំហសមុទ្រ លើអាកាស និងនៅលើដី៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ