សុខភាព៖ យោងតាមការចុះផ្សាយពីប្រភពបរទេស បើទោះបីជាអង្គុយក្នុងបន្ទប់ម៉ាស៊ីនត្រជាក់ត្រជាក់ស្រួលក៏ដោយ ក៏បុគ្គលិកការិយាល័យជាច្រើនកំពុងធ្លាក់ក្នុង “អន្ទាក់” នៃជំងឺគ្រួសក្នុងតម្រងនោមដោយមិនដឹងខ្លួន។

បើតាមការព្រមានពីវេជ្ជបណ្ឌិតជំនាញ ក្នុងរដូវក្ដៅ រាងកាយបាត់បង់ជាតិទឹកខ្លាំងតាមរយៈញើស ប៉ុន្តែសម្រាប់អ្នកធ្វើការក្នុងម៉ាស៊ីនត្រជាក់ ពួកគេមិនសូវមានអារម្មណ៍ស្រេកទឹក ទើបបង្កជាទម្លាប់ផឹកទឹកតិច។ កត្តានេះធ្វើឱ្យទឹកនោមខាប់ និងបង្កើនកំហាប់សារធាតុរ៉ែដូចជា កាល់ស្យូម និងអាស៊ីតអ៊ុយរិក រហូតកកក្លាយជាគ្រួស។ ជាពិសេស ការរង់ចាំរហូតដល់ស្រេកទឹកទើបផឹក គឺជាកំហុសដ៏ធំ ព្រោះនៅពេលនោះរាងកាយបានខ្វះជាតិទឹកធ្ងន់ធ្ងររួចទៅហើយ។ បន្ថែមលើនេះ ការញ៉ាំអាហារប្រៃ គ្រឿងស្រវឹង និងភេសជ្ជៈផ្អែមក្នុងរដូវក្ដៅ ក៏ជាអ្នកជួយរុញច្រានឱ្យជំងឺនេះវិវត្តកាន់តែលឿនផងដែរ​៕