ខេត្តកំពង់ឆ្នាំង ៖ តាមព័ត៌មានពីលោកង៉ាន ណានី ប្រធានមន្ទីរកសិកម្មខេត្តបានឱ្យដឹងថា ក្នុងរដូវវស្សាដែលគិតត្រឹមថ្ងៃទី២៥ កក្កដា កន្លងទៅទូទាំងខេត្តបានសម្រេចភ្ជួររាស់ផ្ទៃដីសរុបចំនួន១៥៥.៤៨៦ហិកតា ក្នុងនោះភ្ជួរដោយគោ-ក្របីបានចំនួន៧៨.៧០៧ហិកតា។ សាបស្រូវ
ខេត្តកំពង់ឆ្នាំង ៖ តាមព័ត៌មានពីលោកង៉ាន ណានី ប្រធានមន្ទីរកសិកម្មខេត្តបានឱ្យដឹងថា ក្នុងរដូវវស្សាដែលគិតត្រឹមថ្ងៃទី២៥ កក្កដា កន្លងទៅទូទាំងខេត្តបានសម្រេចភ្ជួររាស់ផ្ទៃដីសរុបចំនួន១៥៥.៤៨៦ហិកតា ក្នុងនោះភ្ជួរដោយគោ-ក្របីបានចំនួន៧៨.៧០៧ហិកតា។ សាបស្រូវវស្សាបានចំនួន១៥.៩១១ហិកតា។ ដាំស្រូវសរុបចំនួន៦៧.៩៥៥ហិកតា ស្មើនឹង៦៣,២១% លើផែនការ១០៧.៥០០ហិកតា ក្នុងនោះមាន ស្រូវស្រាល១.៨៥៧ហិកតា (ស្រូវបង្កើនរដូវអ៊ីអែ២៧៦ហិកតា) ស្រូវកណ្តាល៤៥.១៥៤ហិកតា ស្រូវធ្ងន់១៦.៩៨៦ហិកតា ស្រូវឡើងទឹក៣.៩៣០ហិកតា និងស្រូវបុកដាំ២៨ហិកតា ។
លោកបានបន្តថា បើប្រៀបធៀបឆ្នាំកន្លងទៅ ឆ្នាំនេះយើងធ្វើបានលឿនជាងព្រោះតែអំណោយផលទឹកភ្លៀង ដែលធ្វើឱ្យកសិករដាំដុះទាន់ពេលវេលា ។ បើទោះជាយ៉ាងនេះក្តីក៏នៅតំបន់ខ្លះនៃស្រុកសាមគ្គីមានជ័យបានជួបនឹងគ្រោះរាំងស្ងួតបណ្តាលឱ្យប៉ះពាល់ដល់សំណាបចំនួន១៤៥,៥ហិកតា ក្នុងនោះមានឃុំ ស្វាយជុក៧០ហិកតា ឃុំពាមចំនួន៥២ហិកតា ឃុំឈានឡើង១៨ហិកតា ឃុំត្បែងខ្ពស់២,៥ហិកតា និងឃុំស្វាយ៣ហិកតា ។ ឃុំទាំងនោះពុំមានប្រភពទឹកទេ ប៉ុន្តែនៅឃុំពាមមានស្ទឹងមួយដែលមានបណ្តោយប្រមាណ២គីឡូម៉ែត្រ ។
ដោយឡែកដំណាំស្បៀងរួមផ្សំវិញគឺអនុវត្តបាន៦.២២២ហិកតា ស្មើនឹង១០៩,១៦% គឺលើសផែនការ៥.៧០០ហិកតា ដែលក្នុងនោះមាន ពោត១.៩៣៤ហិកតា ដំឡូងមី៦៧៦ហិកតា ដំឡូងជ្វា៥៩១ហិកតា សណ្តែកបាយ៥៤២ហិកតា ឪឡឹក២៨១ហិកតា និងបន្លែគ្រប់មុខ ២.១៩៨ហិកតា ។ ដោយឡែកសម្រាប់ជំងឺសត្វវិញមិនមានអ្វីគួរកត់សំគាល់នោះទេ។
ក្នុងឱកាសនោះលោកប្រធានមន្ទីរកសិកម្មខេត្តបានថ្លែងបែបមោទនថា លោកសង្ឃឹមយ៉ាងមុតមាំឆ្នាំនេះទិន្នផលស្រូវរដូវវស្សានឹងកើនឡើងខ្ពស់ជាងឆ្នាំកន្លងទៅ ៕
ចែករំលែកព័តមាននេះ