សុខភាព៖ យោងតាមការចុះផ្សាយពីប្រភពប្រទេស ការរមាស់ត្រចៀកគឺជាអាការៈដែលបង្កឡើងដោយមូលហេតុជាច្រើនដូចជា ស្បែកក្នុងរន្ធត្រចៀកស្ងួតពេក ការរលាកស្បែក កំណកអាចម៍ត្រចៀកច្រើនហួស ឬការដុះផ្សិតជាដើម។

ទម្លាប់ប្រើប្រាស់សំឡីត្បារត្រចៀក ឬវត្ថុរឹងទៅកូរ មិនត្រឹមតែមិនអាចដោះស្រាយបញ្ហាបានឡើយ ប៉ុន្តែវាថែមទាំងធ្វើឱ្យស្បែកកាន់តែស្ងួត និងបង្កគ្រោះថ្នាក់ធ្ងន់ធ្ងរដូចជា ការរលាករន្ធត្រចៀកក្រៅ ដុះបូស ធ្លាយក្រដាសត្រចៀក ឬប៉ះពាល់ដល់សមត្ថភាពស្ដាប់។

ដើម្បីដោះស្រាយឱ្យមានសុវត្ថិភាពបំផុត នៅពេលមានអាការៈរមាស់ លោកអ្នកគ្រាន់តែប្រើម្រាមដៃច្របាច់ ឬសង្កត់ថ្នមៗនៅផ្នែកខាងក្រៅនៃរន្ធត្រចៀកដើម្បីកាត់បន្ថយការរមាស់ជាបណ្ដោះអាសន្ន។ ប្រសិនបើអាការៈរមាស់នៅតែបន្តលើសពី ២ ទៅ ៣ ថ្ងៃ ឬមានសញ្ញាឈឺចាប់ និងហូរទឹកចេញពីត្រចៀក លោកអ្នកត្រូវប្រញាប់ទៅជួបគ្រូពេទ្យជំនាញដើម្បីពិនិត្យ និងលាងសម្អាតឱ្យបានត្រឹមត្រូវ ជាជាងការព្យាយាមដោះស្រាយដោយខ្លួនឯងដែលនាំឱ្យមានគ្រោះថ្នាក់ដល់សរីរាង្គស្ដាប់ក្នុងរយៈពេលវែង៕