សហរដ្ឋអាមេរិក ៖ មន្ត្រីជាន់ខ្ពស់ម្នាក់របស់មន្ទីរបញ្ចកោណ កាលពីថ្ងៃទី២៩ ខែមេសា ឆ្នាំ២០២៦ បានអះអាងថា ការចំណាយរបស់សហរដ្ឋអាមេរិកលើសង្គ្រាមជាមួយអ៊ីរ៉ង់ដែលកំពុងបន្ត ត្រូវបានប៉ាន់ប្រមាណថាចំនួន ២៥…
សហរដ្ឋអាមេរិក ៖ មន្ត្រីជាន់ខ្ពស់ម្នាក់របស់មន្ទីរបញ្ចកោណ កាលពីថ្ងៃទី២៩ ខែមេសា ឆ្នាំ២០២៦ បានអះអាងថា ការចំណាយរបស់សហរដ្ឋអាមេរិកលើសង្គ្រាមជាមួយអ៊ីរ៉ង់ដែលកំពុងបន្ត ត្រូវបានប៉ាន់ប្រមាណថាចំនួន ២៥ ពាន់លានដុល្លារអាមេរិក រហូតមកដល់ពេលនេះ ខណៈដែលសង្គ្រាមជិតដល់រយៈពេល ៦០ ថ្ងៃហើយ ដែលនេះជាផ្តល់នូវការប៉ាន់ស្មានជាផ្លូវការលើកដំបូងអំពីតម្លៃយោធាសម្រាប់សង្គ្រាមនេះផងដែរ។ នេះបើតាមប្រភពពី Reuters និង CBC News បានចេញផ្សាយ។
លោក Jules Hurst អនុប្រធានផ្នែកហិរញ្ញវត្ថុនៃមន្ទីរបញ្ចកោណ បានប្រាប់គណៈកម្មាធិការយោធាសភាតំណាងរាស្ត្រ រួមជាមួយរដ្ឋមន្ត្រីក្រសួងសង្គ្រាម លោក Pete Hegseth និងប្រធានសេនាធិការចម្រុះ លោក Dan Caine ថា ភាគច្រើននៃទំហំទឹកប្រាក់ ២៥ ពាន់លានដុល្លារចំណាយលើគ្រាប់រំសេវ។ ទោះយ៉ាងណា លោកមិនបានរៀបរាប់លម្អិតអំពីតម្លៃនោះរួមបញ្ចូលគ្នា និងការចំណាយដែលបានព្យាករណ៍លើការកសាងឡើងវិញ និងជួសជុលហេដ្ឋារចនាសម្ព័ន្ធមូលដ្ឋាននៅតំបន់មជ្ឈិមបូព៌ា ដែលខូចខាតក្នុងសង្គ្រាមនោះទេ។
ទន្ទឹមជាមួយគ្នា លោក Adam Smith តំណាងរាស្ត្រជាន់ខ្ពស់គណបក្សប្រជាធិបតេយ្យ ក៏បានឆ្លើយតបទៅកាន់លោក Jules Hurst ដូច្នេះថា «ខ្ញុំរីករាយដែលលោកបានឆ្លើយសំណួរនោះ ព្រោះយើងបានស្នើសុំជាយូរមកហើយ ហើយគ្មាននរណាម្នាក់ផ្តល់តួលេខឱ្យយើងនោះទេ។ ពិតណាស់ ការចំណាយចំនួន ២៥ ពាន់លានដុល្លារនេះ គឺស្មើនឹងថវិកាចំណាយទាំងមូលរបស់អង្គការ NASA សម្រាប់ឆ្នាំនេះ»។
ប៉ុន្តែទោះយ៉ាងណាក៏ដោយ តួលេខនេះ នៅតែមិនច្បាស់ទេថា តើមន្ទីរបញ្ចកោណទទួលបានទឹកប្រាក់ចំនួន ២៥ ពាន់លានដុល្លារដោយរបៀបណា ដោយសារតែប្រភពមួយបានប្រាប់ Reuters កាលពីខែមុនថា រដ្ឋបាលរបស់លោកប្រធានាធិបតី ដូណាល់ ត្រាំ បានប៉ាន់ប្រមាណថា ៦ថ្ងៃដំបូងនៃសង្គ្រាមជាមួយអ៊ីរ៉ង់បានធ្វើឱ្យសហរដ្ឋអាមេរិកខាតបង់យ៉ាងហោចណាស់ ១១,៣ ពាន់លានដុល្លាររួចទៅហើយ៕
ចែករំលែកព័តមាននេះ